VOV4.K’ho - Mang òr (06/08), tềng đăp mờ broă đơng lam bơh Chủ tịch Quốc hội ồng Vương Đình Huệ dê, Ủy ban Thường vụ Quốc hội neh pơrjum jal mhar nàng pơgồp bal jơnau đơs bè rơndăp broă cih Nghị quyết bơh Chính phủ bè broă lơh jăt ală broă lơh jal mhar tàm broă rơcang sơndră mờ kòp Covid-19 jăt mờ Nghị quyết sồ 30 bơh Quốc hội geh tơlĭk tàm pơrjum dơ̆ sơnrờp, Quốc hội khoă 15.

        Ủy ban Thường vụ Quốc hội tơlĭk kơrnoăt ală bơta jal mhar tàm broă rơcang sơndră mờ kòp gơtờp

Mùl màl, ai ală Bộ Y tế, Quốc phòng, Kuang àng, UBND ală càr tơlik kơrnoăt crơng gơs anih tơrgùm phan kòp, sơm kòp cau gơtìp kòp Covid-19 in mờ là sră ai lơh broă mờ dan bơtơl tơngai geh ngui bơh tơngu me do, tus jơh nam 2022 mờ mìng geh ngui tàm bơta jal mhar tàm broă rơcang sơndră mờ kòp gơtờp jăt mờ broă neh geh ai lài tàm broă rơcang sơndră mờ kòp gơtờp bal mờ bơta mùl màl bơh tơl tiah dê. Đơs tàm pơrjum, Chủ tịch Quốc hội ồng Vương Đình Huệ đơs là, broă tơlĭk nghị quyết do geh kuơ màng ngan, jal mhar tàm bơta kòp gơtờp ngai sơlơ kal ke, ờ gĭt lài, lơh gơtờp tàm uă càr, ƀòn dờng, tàm hơ̆ uă ngan là ală càr, ƀòn dờng hờ đah jum dà lơgar.

Cau mblàng Ndong Brawl