VOV4.K’ho- Ai jơnau đơs bè broă rơcang tus pơrjum nisơna bơh Quôk hội khóa 15 dê, Ủy ƀan Thường vụ Quôk hội đơs nền pal gàr bơta niam, gàr jat jơnau sồr ai tơlik den hơ̆ sồng bơyai lơh pơrjum. 4 tơngume kờp dŭ yal Quôk hội in tàm pơrjum nisơna geh: Rơndap lơh Adat tam gơl, bơta 2, 3 bơta bơh 2, 3 adat boh lam dê; Rơndap lơh gùng rơndeh ntoat rat tiah đah tô- tiah đah jum dà lơgar hờ tiah đah mat tơngai lik tơngai bơh nam 2021 tus nam 2025; Sră yal bơh Cíñ phủ dê bè kơ cế, broă lơh nam priă jền, priă jền nàng dong kờl di tŭ lam lơh broă lơh bơtàu tơnguh wơl mờ bơtàu tơnguh lơh sa- mpồl bơtiàn; Jơnau rơcang cih Nghị quyết tơrlòng lài 2, 3 kơ cế, broă lơh krơi is bơtàu tơnguh ƀòn dờng Cần Thơ.

Ƀộ trưởng, Chủ nhiệm Văn phòng Cíñ phủ ồng Trần Văn Sơn pà git, 4 tơngume tŭ do neh tơl làm bè cơng tàng, bơnàng jă nàng yal Quôk hội in. Tàm pơrjum, Củ tịc Quôk hội ồng Vương Đìñ Huệ sồr Cín phủ mờ ală anih lơh broă bơh Quôk hội dê pơgồp bal nền nòn ring bal gùng dà, jơnau đơs. Tŭ Ủy ban Thường vụ Quôk hội mờ Cíñ phủ ring bal uă, yal Quôk hội in den rơp lơh geh bơta ring bal uă. Đơs tơn jơh dơ̆ 1 pơrjum dơ̆ 6, Củ tịc Quôk hội pà git, Ủy ƀan Thường vụ Quôk hội ring bal gùng dà lam lơh pơrjum nisơna bơh Quôk hội khóa 15 dê, bulah bè hơ̆ pal gàr bơta niam ală tơngume yal tàm Quôk hội.

Cau mblàng K’Duẩn