VOV4.K’ho- Mờ ală cồng nha niam tàm ală tŭ cĭt tơrlòng lài, uă bơta gơn kơnờm vaccine Nano Covax rơcăng sơndră kòp Covid-19 bơh sơnrờp lơgar Việt Nam dê digơlan geh ai gơnoar ngui tàm tŭ dilah gơlik geh jơnau jal mhar tàm nhai 9 nam do. Vaccine Nano Covax bơh Học viện gah lơh sơnơm ling klàng dê kơlôi sơnơng mờ lơh gơlik neh sơrlèt gan rlau 2 tơngai cĭt tơrlòng lài.

Lài hơ̆, tơngai dơ̆ dùl geh lơh tàm nhai 12 nam 2020 bal mờ 560 nă cau dan cĭt is nàng sền swì bơta ờdo ờdă tàm kòn bơnus, tơngai dơ̆ bàr bơh nhai 2 nam do cĭt tơrlòng lài ai 554 nă cau dan cĭt is in nàng pơn jăt tai sền swì bơta ờdo ờdă mờ jòi sền bơta tơl pràn gơlik phan tam dră wơl mờ virus Sars CoV-2. Jơh bal bàr tŭ tơngai ndrờm lơh geh cồng nha niam. Tàm nhai 6 do, geh cĭt tơrlòng lài tơngai dơ̆ 3 vaccine Nano Covax bal mờ 13 rbô nă cau geh cĭt mờ ngui ding êt ngan rlau jơh 25 microgam. Jơnau kờñ bơh cĭt tơrlòng tơngai dơ̆ 3 dê là nàng kờñ pơn jăt tai sền swì bơta ờdo ờdă, gơtùi sền gàr bơh vaccine dê tàm tiah ơm kis mpồl bơtiàn neh geh kòp lơh bơtờp.

Tŭ do, Học viện gah lơh sơnơm ling klàng mờ ală anih lơh broă geh gơrềng gam jal mhar lơh ală dơ̆ cĭt tơrlòng mhar. Jơh ală broă lơh ndrờm lơh jăt niam ngan jơnau sồr, mờ bơta sồr pal geh bơh dunia dê. Nàng jăt tàm bơta hơ̆, Bộ Y tế geh tơl cơng tàng jak chài gơtùi lơh sră ai gơnoar jal mhar, ngui geh bơta pal jăt vaccine Nano Covax tàm lơgar he.

Cau mblàng Lơ Mu K’Yến