Broă lơh Hìu jòng bơh yau kòn cau Rơđê dê geh lơh tàm ƀlàng Ƀảo tàng càr Dăk Lăk, mờ kờp jơh priă tă lơh 6 tơmàn 700 tơlak đông. Broă lơh geh 2 cờn, bă ù lơh ơnàng 460 thơk vuông, lơh mờ dơm chi geh is lơm gời. Broă lơh nàng kờñ pơgồp bơnah prap gàr, ngui niam bơta kuơ niam chài bơh yau, bơta niam krơi is bè bơhiàn yau, rài kis bơh làng bol kòn cau Rơđê dê.

Broă lơh Hìu bơhiàn bơh Tỉñ ủy Dăk Lăk dê kung geh lơh mờ dơm chi geh is lơm, jat rùp să bơh hìu rơng Tây Bắc dê, ơnàng 185 thơk vuông, mờ priă tă lơh 10 tơmàn đông. Do là anih ràng tơlik, prap gàr ală broă lơh cíñ trị, rùp hin, broă lơh bơh Đảng ƀộ càr dê kung bè ală kwang đơng lam bồ càr dê bơh ală tŭ tơngai; pơgồp bơnah sền gàr, ngui niam bơta kuơ bơh yau, là anih tiơng pơn rơ bè bơto bơtê bơhiàn kac màng.