Jơnau lơh nền tàm pơrjum sồ 80 bơh Ƀộ Cíñ trị khoă 13 dê bè bơtàu tơnguh niam chài Việt Nam geh ai lơh jat lài mờ dơ̆ bơyai lơh Pơrjum dờng Đảng dơ̆ 14 tơngŏ nùs nhơm lơh ngan dờng bơh Đảng dê tàm broă tă bơsong bơta kal ke mờ bơta gơ kòl bè broă lơh, bơta pràn, ngui niam pràn kơl dang bơta pràn lơbơn niam chài, lơh geh bơta pràn lam lài pa, sơlơ tơnguh tai broă lơh bơtàu tơnguh mhar, kơnhăp kơ̆ dà lơgar tàm rài pa.

Jơnau lơh nền tàm pơrjum đơs sùm gơnoar bơh phan lời wơl niam chài bè phan kwơ tơngume nàng bơt bơtàu niam chài gơguh jak, cềng bềng bơhiàn niam chài is jơi bơtiàn tàm tơngai pa. Jơnau lơh nền tàm pơrjum sền gĭt phan lời wơl niam chài geh bal phan lời wơl phan bơna mờ ờ di phan bơna nàng dùl tàm ală phan kwơ niam chài kwơ màng kờñ geh ngui geh cồng nha nàng bơtàu tơnguh kơnhăp kơ̆. Tàm Jơnau lơh nền tàm pơrjum do, broă sền gàr mờ ngui niam phan lời wơl niam chài ờ mìng là kơnòl broă tơl làm, kơnhăp kơ̆ tam klăc lơh bal mờ bơto bơtê, mpồl bơtiàn, lơh sa lơm mờ is ồn là tàm tơngai mut gơ rờm bal gùt plai ù mờ tam gơl sồ.

Ală kòn cau Bru – Vân Kiều, Chứt ơm kis jŏ nam tàm càr Quảng Bình lài do, mờ tŭ do là Quảng Trị. Tiah do geh ală phan lời wơl niam chài gơ jat bal ờ gơtùi tam cah is broă sền gàr ù tiah niam chài ƀòn lơgar, sền gàr brê, dà mờ broă lơh sa ờs mờng bơh yau. Nùs nhơm bơh Jơnau lơh nền tàm pơrjum sồ 80 bơh Ƀộ Cíñ trị dê sền gĭt prap gàr niam chài tàm bơta gơrềng bơnĕ bơnài bal mờ bơta geh is mờ bơtàu tơnguh kơnhăp kơ̆.

Cau chài Đinh Văn Chờ, kòn cau Chứt, ơm tàm ƀòn Hóa Lương, sàh Kim Điền, càr Quảng Trị đơs là, nùs nhơm geh sùm bơh Jơnau lơh nền tàm pơrjum là ai cau lơh anih tờm, tàm hơ̆ mpồl bơtiàn ngan là cau tờm bơceh lơh mờ sền gàr phan lời wơl. Ồng Đinh Văn Chờ pà gĭt:“Niam chài là tơngume bồ tơngoh kơlôi sơnơng, nùs nhơm sơlơ tơnguh tai bơta bơtàu tơnguh bơh mpồl bơtiàn dê. Geh Đảng mờ Dà lơgar sền gròi, làng bol kòn cau Chứt bol añ brơn brài ngan, geh gơtha kwơ màng uă ngan nàng geh lơh jat, prap gàr geh bơta kwơ niam chài bơh cau Chứt dê. Bơh ală tiah tus Dà lơgar lơh bè lơi nàng sùm sền gròi tus ală phan lời wơl bơh làng bol tềng đăp bơta pơhìn gơbàn roh tĕ, kờñ geh broă lơh, broă dong kờl di pal, geh bơta tàm pơrdờn, mblàng yal bơto bơtê wơl ai rài tơnơ̆ do in nàng gam sùm mờ bơtàu tơnguh phan lời wơl”.

Sền wơl tàm càr Dăk Lăk, tàm ală jơnau neh lơh nền Sền gàr mờ ngui niam bơta kwơ phan lời wơl niam chài ờ di phan bơna dà lơgar tàm ù tiah càr dê tơngai bơh nam 2023 – 2025 neh ai tơlik kơnòl broă, broă lơh geh ngan nàng kờñ sền gàr, tàm pơrdờn mờ ngui niam ală bơta kwơ is ồn bơh 3 phan lời wơl niam chài ờ di phan bơna dà lơgar, bè: Khan (yal yau) kòn cau Rơđê dê, Jơnau đơs tàm sơr pơ̆ bơr bơh kòn cau Rơđê mờ Dơ̆ gờm chờ kis jŏ kòn cau M’nông. Ngan ngồn, bè pờ ală ơdŭ mblàng yal bơto bơtê bè phan lời wơl niam chài ờ di phan bơna dà lơgar; bơt bơtàu ală broă lơh, broă rơndăp lơh lơh jat broă prap gàr, ngui niam phan lời wơl pơgồp bal mờ kơnòl broă bơtàu tơnguh lơh sa- mpồl bơtiàn bơh tiah do dê; bơt bơtàu mờ lam lơh broă lơh ală broă lơh tơrlòng lài bè ngui niam bơta kwơ phan lời wơl niam chài ờ di phan bơna pơgồp bal mờ bơtàu tơnguh lòt nhơl mpồl bơtiàn, lơh jat niam gơnoar cau tờm phan lời wơl, sùm bơyai lơh ală broă lơh ràng tơlik phan lời wơl tàm pơrjum mpồl bơtiàn, dơ̆ lơh chờ, tàm ală broă lơh lòt nhơl niam chài.... Cồng nha bơh ală lơh nền gùng dà di ngan do neh dong làng bol geh dờp bơta kwơ mờ ngui niam geh ală bơta niam chài is ồn tàm tiah do dê. Mò H’ring Mlô, kòn cau Rơđê, ơm tàm ƀòn M’Găm, sàh M’Drak, càr Dăk Lăk pà gĭt, kơnờm geh Đảng mờ Dà lơgar, làng bol ờ mìng lik klàs rƀah lơm mờ gam geh ală bơta nàng sền gàr, ngui niam bơhiàn niam chài is dê: “Hìu añ ơm tàm kềng gùng tơn, geh hìu rơng tai. Añ kơ̆p kờñ lơh sa kă bro drơng broă sa sào, phan sa làng bol kòn cau Rơđê dê bè ƀĕ tơrnờm pơgồp bal mờ ràng tơlik dròng cing jañ mồng nàng sền gàr bơhiàn niam chài is jơi bơtiàn he dê. Hìu añ geh sre, geh mìr gùt dar hìu, añ kung tam uă bơta phan tam tờm chi sa plai...".

Ală nùs nhơm pa  tàm Sră nggal Pơrjum dờng Đảng dơ̆ 14 là prap gàr phan lời wơl tàm broă lơh kwơ màng bơtàu tơnguh pràn kơl dang, tơl làm niam chài mờ cau Việt Nam. Bơtàu tơnguh niam chài mờ cau Việt Nam jat nùs nhơm Pơrjum dờng dơ̆ 14 bơh Đảng dê rơ̆p là dùl broă lơh kwơ màng dơ̆ lĕ bal, pơgồp bal mờ bơnĕ bơnài bal đah sền gàr bơhiàn ờs mờng bơh yau niam chài mờ brồ guh tus tàm tơngai pa.

Sră nggal Pơrjum dờng dơ̆ 14 Đảng dê kung sền gĭt 12 gùng dà pơlam dờng; 6 kơnòl broă tờm mờ 3 broă lơh tam gơl pràn kwơ màng. Broă lơh lơh broă neh lơh ngan ngồn ală kơnòl broă gơtùi lơh jat tơn. Tàm hơ̆, gùng dà pơlam niam chài mờ cau là tơngume nùs nhơm bơh mpồl bơtiàn, bơta pràn geh is tàm dơlam, bơta pràn mờ bơta gơn kơnờm bơtàu tơnguh bơh dà lơgar dê. Ồng Mai Xuân Thành, Phó Kwang lam bồ Sờh Niam chài, Tàp pràn să jan mờ Lòt  nhơl càr Quảng Trị pà gĭt, bơta geh ngan tàm ală tiah kơh bơnơm, prap gàr niam chài phan lời wơl jơi bơtiàn dồ ết nă cau dê mìng kơnhăp kơ̆ tŭ pơgồp bal mờ broă lơh sa kơ̆ kơl jăp ai làng bol in: “Geh ală Jơnau lơh nền tàm pơrjum bè broă lơh dong kờl ală cau chài tàm broă lơh prap gàr, mblàng bơto wơl kung bè ngui niam ală bơta kwơ niam chài tàm ù tiah do dê. Pal dong kờl nàng bơtàu tơnguh uă rài kis nùs nhơm ai ală cau chài kờñ ngan in rlau, bal mờ Dà lơgar sền gàr ală bơta kwơ niam chài. Lơh jat niam ală jơnau sồr bơh Adat Phan lời wơl, gàr niam ai ală tiah in prap gàr, ngui niam ală bơta kwơ bơh phan lời wơl niam chài ờ di phan bơna jat di jơnau sồr bơh Adat Phan lời wơl niam chài dê".