Tàm ù tiah lơbơn niam mơkung pràn kơl dang gơ hòi gơ jà nùs nhơm cau dê bơh săp ntas cing mpoong tus, ală ùr ơruh kòn cau Rơđê lơbơn niam cơnđoà tus kềng gah drăp tơrnờm, lơnbơn niam tàm gùng tam ya jà ñô tơrnờm ờs mờng. Tơl gùng tam ya cơn đoà jơng, tơl gùng tam ya ring drĭ lơbơn niam bè jơnau còp să rềp mềr pơyoa tus mờ Yàng mờ năc kwơ. Tam ya jà ñô tơrnờm sùm geh tàm dơ̆ lơh Yàng duh khoai sa kòi pa, dơ̆ lơh Yàng duh khoai dà mbòr, dơ̆ lơh Yàng hòi dan pràn kơl dang să jan, dơ̆ tam bau mờ ală dơ̆ lơh Yàng ờs mờng bơh yau bơh ƀòn lơgar dê. Ù tiah tam ya là hìu jòng ram mhŭ, ƀlàng lơh chờ hô hơng halà kềng gah ală drăp tơrnờm, tiah tàm tơrbŏ bal cau mờ mpồl bơtiàn mờ bơta tờm niam chài kòn cau Rơđê dê.

Kra ƀòn Y Kŭt Niê (ồng Nang dê), ơm tàm ƀòn Prao, sàh Mdrak, càr Dăk Lăk, pà gĭt:“Jat bơhiàn bơh kòn cau Rơđê dê, tam ya jà ñô tơrnờm là tam ya tàm dơ̆ ƀòn lơgar geh bơta chờ hờp, tŭ geh drăp tơrnờm, ờ gŏ di tam ya tŭ hìu bơnhă geh cau chơ̆t. Cau lài do đơs là tiah tơrgùm ală klau pơnu ùr ơruh bơtòm tơrgùm bal, gùt ƀòn lơgar rê bal chờ hờp bal”.

Tam ya jà ñô tơrnờm bơh kòn cau Rơđê dê geh tơnggŏ mờ ală gùng tam ya lơbơn niam, mờ cơnđoà jơng tam ya ring ngan lòt gùt dar drăp tơrnờm. Yô màng tê lơbơn, ring niam tàm gơl gùng tam ya hòi jà, wă rò cèng bềng bơta sền dờng màng. Bulah ờ kal ke bè gùng tam ya, mơya tam ya den cèng wơl bềng bơhiàn lơh Yàng mờ gơtha ƀuơn sền gĭt, tơngŏ bơta sền dờng màng gơwèt mờ Yàng mờ ală năc kwơ dê. Bơnĕ bơnài bal mờ gùng tam ya là săp ntas hô hơng bơh cing Rơđê, mờ gùng cing rơlĕ rơlùn, ndrờm bal, lơh geh ù tiah dờng màng mờ ram mhŭ, cèng bềng bơhiàn niam chài is jơi bơtiàn dê.

Cau chài ồng Y Klôt Buôn Yă (ồng Thảo dê), ơm tàm ƀòn Hra Ea Ning, sàh Dray Bhăng, càr Dăk Lăk pà gĭt, tam ya jà ñô tơrnờm bơh kòn cau Rơđê dê là bơta tơngŏ niam ngan bơh nùs nhơm kờñ gơboh năc, là dang che tàm tơrbŏ bal ală cau tàm ƀòn lơgar, mơkung cih yal wơl rài kis li la uă bơh mpồl bơtiàn dê. Bơh gùng tam ya do, kòn cau Rơđê tơngŏ bơta pin dờn, bơta ưn ngài mờ bơta kơ̆p kờñ bè kis ring lơngai chờ hờp, hờm ram:“Tơnơ̆ tŭ lơh sir ală bơhiàn lơh Yàng duh khoai dà mbòr, lơh Yàng duh khoai pràn kơl dang să jan rơ̆p geh bơnah tam ya jà ñô tơrnờm mờ kơ̆p kờñ làng bol ƀòn lơgar chờ hờp mờ hờm ram wil tơl. Hơ̆ ngan là jơnau jà ală Yàng bơnơm, Yàng dà, mò pàng kơno săp ntas cing, gŏ gùng tam ya rơ̆p rê chờ hờp bal mờ làng bol ƀòn lơgar he dê”.

Cau chài Y Klôt Buôn Yă pà gĭt, cau tam ya sùm soh phan soh bơhiàn ờs mờng bơh kòn cau Rơđê dê (ồi kòn cau). Jat bơhiàn bơh lài do, lài mờ tŭ ñô tơrnờm, tròc dà tàm yăng tơrnờm pal geh bơ̆ bơh tàm dà mbòr bơh ƀòn dê mờ plai nhồng ro, ờ gŏ di bơ̆ bơh dà ndai, tài bơh hơ̆ là dà kwơ màng:“Dilah duh khoai mờ 3 drăp tơrnờm den geh 3 nă cau tam ya, 7 drăp tơrnờm den geh 7 nă cau tam ya. Ờs mờng khà cau tam ya bơh 5 nă cau rlau hơđang mờ sùm jat sồ yah, ờ gŏ di tam ya jat sồ yô. Lài do, lài ñô tơrnờm, tròc dà tàm yăng tơrnờm pal geh bơ̆ bơh tàm dà mbòr mờ plai nhồng ro, ờ gŏ di bơ̆ dà bơh tàm tiah ndai”.

Tam ya jà ñô tơrnờm ờ mìng là bơhiàn lơh Yàng lơm, mờ gam là dùl bơta niam rài kis dê, tiah gùng đơs crih, tàm ntrờn mờ hwềng nùs bơrlŭ bal lơh dùl. Tơl cơnđoà jơng, tơl broă tam ya ring drĭ ndrờm geh lơh mờ bơta sền dờng màng, tơngŏ bơta gĭt gơ̆p tam klăc bal đah cau mờ ù tiah brê bơnơm, Yàng mờ mpồl bơtiàn. Tàm gùng ntas cing dê mpoong mờ săp đơs ñiŏ rềp mềr bơh ƀòn lơgar dê năc lòt nhơl rơ̆p dờp geh bơta ram mhŭ, lơbơn niam mờ dờng màng tàm tơl tŭ niam chài bơh Tây Nguyên dê.