Nggùl nhai 1 pa do, Anih duh broă Làng bol sơnah ƀòn Ea Kao, càr Dăk Lăk bơyai lơh broă lơh livestream mờ tơngume “Ƀòn Tơng Jŭ, Ea Kao niam să”, pờ tơlik tơn tàm ală tơngume internet bè Facebook, Zalo OA, TikTok. Tàm rlau 1 jiơ, ù tiah ƀòn brê bơnơm, ù tiah pơrjum niam chài mờ rài kis lơh broă, lơh sa bơh làng bol kòn cau Rơđê dê geh yal tơngĭt tơn tus mờ uă ngan cau sền.

Jat ồng Trần Công Hữu, Phó Củ tịc Anih duh broă Làng bol sơnah ƀòn Ea Kao pà gĭt, broă lơh do ờ mìng lơh ngan ngồn Jơnau lơh nền tàm pơrjum sồ 57 lơm mờ gam lơh geh bơta tam gơl tàm bồ tơngoh kơlôi sơnơng yal tơngĭt uă mờ tăc bro phan bơna ƀòn lơgar dê:“Broă lơh livestream cèng bơta tề lam lơh broă bal tàñ ồi kòn cau Tơng Bông đơs is mờ ală mpồl lơh broă mpồl lơh sa kă bro tàm ù tiah sơnah ƀòn đơs bal bơtàu tơnguh lơh sa sồ tàm tơngai tus. Broă lơh ờ mìng yal tơngĭt ală bơta kwơ bơhiàn ờs mờng bơh yau, ù tiah pơrjum bal, lơh broă lơh sa bơh kòn cau Rơđê dê lơm mờ gam pơgồp bơnah sơlơ tơnguh tai tăc bro phan bơna tiah do dê, pơgồp bal bơtàu tơnguh lơh sa mờ prap gàr bơhiàn niam chài is. Bơh broă lơh livestream do, bol añ kơ̆p kờñ cèng tus ală sền gĭt rềp mềr, niam ngan mờ bềng bơta ngoh rơngăc”.

Bal mờ phan bơna lơh mờ tê, broă lơh livestream gam yal tơngĭt phan sa ờs mờng bơh yau mờ broă lơh lòt nhơl mpồl bơtiàn ƀòn Tơng Jŭ dê. Mờ broă lơh do, năc lòt nhơl gơtùi tus sền ù tiah ƀòn lơgar, jòi gĭt broă lơh ờs mờng bơh yau, sa phan sa, sền gĭt rài kis, broă lơh sa pah ngai bal mờ làng bol dê.

Mò H’ Yam B.Krông, Lam bồ mpồl lòt nhơl mpồl bơtiàn ƀòn Tơng Jŭ, sơnah ƀòn Ea Kao, càr Dăk Lăk pà gĭt:“Tus bal lòt nhơl làng bol gơtùi lơh uă broă, pơn yơu bè tam biăp, ròng phan, tam phan, ală phan bơna bơh làng bol dê lơh geh geh tăc bro tàm tiah he dê ơm kis, hơ̆ là bơta chờ hờp ngan. Den tàng tŭ lòt nhơl bơtàu tơnguh tàm ù tiah sơnah ƀòn Ea Kao den să tờm añ bal mờ làng bol là chờ hờp ngan, nàng geh gùng dà bơtàu tơnguh rài kis pah ngai bơh he dê ngai sơlơ niam rlau tai. Bơdìh hơ̆ là prap gàr bal niam chài bơh tiah do dê”.

Bal mờ ală broă lơh tàm ƀòn lơgar, tam gơl sồ tàm gah niam chài gam geh càr Dăk Lăk lam lơh dồ ròt bal. Tàm Hìu ơn prap phan kwơ yau Dăk Lăk, Phó Lam bồ ồng Trần Quang Năm, pà gĭt, broă ngui măi mok sồ neh lơh jat geh cồng nha tàm broă lơh jòi tơrgùm, tam pà bơta mờ rơwah phan bơna yau, sră nggal yau drơng ală mìng dùl tơngume ràng tơlik in. Mơkung pơgồp bơnah tơnguh uă bơta niam drơng broă năc lòt nhơl tus sền in:“Hìu ơn prap phan kwơ yau lơh măi mok sồ phan bơna, lơh sồ ală bơhiàn, dơ̆ lơh Yàng, dơ̆ lơh chờ ờs mờng bơh yau bơh ală jơi bơtiàn tàm ù tiah càr dê. Ngui ală măi mok AR, VR nàng geh bơta tàm tơngĭt bal, sền gĭt đah năc lòt nhơl mờ ală bơta kwơ phan lời wơl bơh yau niam chài ờs mờng bơh càr Dăk Lăk dê”.

Tus tŭ do, ală jơnau sồ drơng broă yal tơngĭt is neh geh lơh tàm 3 tiah tềl lời wơl kah yau dà lơgar tàm ù tiah càr Dăk Lăk dê, hơ̆ là: Hìu jàm Buôn Ma Thuột, Biệt điện Bảo Đại mờ Đình Lạc Giao. Măi mok yal tơngĭt jơnau kung geh ngui bè dùl phan ngui tờm tàm yal tơngĭt uă niam chài pơgồp bal mờ lòt nhơl. Tơngume mblàng yal geh lơh li la uă tàm ală tơngume sồ, dong pờ ơnàng bơta pràn tus bal bơh làng bol dê. Ồng Trần Hồng Tiến, Lam bồ Sờh Niam chài, Tàp pràn să jan mờ Lòt nhơl càr Dăk Lăk pà gĭt:“Bol añ neh pờ uă ngan ơdŭ bơto pơlam, ngui măi mok ai kwang bàng, kông cứk tàm jơh ală gah broă kung bè ai kwang bàng kông cứk bơh cơldŭ lơh broă niam chài mpồl bơtiàn ală sàh, sơnah ƀòn in. Pơgồp bal mờ ală mpồl lơh sa kă bro măi mok, lơh broă rơndăp lơh, lam lơh bàr pe tơngume geh gơrềng tus broă lơh tam gơl sồ bơh gah broă dê, bè là ngui bè tam gơl sồ tàm gah phan lời wơl, lòt nhơl, tàp pràn să jan kung bè là tàm ală broă lơh niam chài”.

Tam gơl sồ gam lơh geh tai ù tiah nàng niam chài in geh mat loh làng rlau tai tàm rài kis pah ngai tàm Dăk Lăk. Bơh hơ̆ pơgồp bơnah lơh gơrề uă bơta kwơ niam chài, pờ ơnàng tŭ tơngai bơtàu tơnguh broă lơh sa ai làng bol in mờ sền gĭt gùng lòt kơnhăp kơ̆ ai lòt nhơl tiah do in tàm tơngai tus.