Mờ tơngume “Mai añ đào Dà Làc – Bơtòm tơrgùm bơta niam nam pa dê”, dơ̆ lơh chờ jờng rơ bơta niam bơh bơkàu là rùp pơrya Dà Làc dê, mờ kung yal tơnggit rùp hin kòn bơnus Dà Làc lơbơn niam, sơrmah sơrmài, niam chài, kờñ nac. 

Dơ̆ lơh chờ geh lơh bơh ngai 16/01 tus bồ nhai 02/2026 tàm uă anih tờm mờ tiah rềp bal, tàm hơ̆ bơta tờm là ală anih bơceh niam chài tàm gùng Trần Hưng Đạo, cùp rùp, sềr rùp, bơyai lơh tàm gùng mờ yal tơnggit phan lơh gơs bơh suơn sre, phan OCOP, ce, kơphe tiơng pơn rơ is ồn ƀòn lơgar dê. Ù tiah lơh chờ gam geh rề ơnàng tus tiah lòt nhơl dà lơgar tơnau dà Tuyền Lâm, tiah ce Cầu Đất, Thung lũng tình yêu, gơ jat bal mờ ală broă lơh lòt sền lòt nhơl broă lơh sa suơn sre, tìp mat niam chài mờ bơyai lơh dròng cing jañ mồng, pơgồp bơnah tơnguh jơnau kờñ lòt nhơl mờ yal tơnggit rùp hin ƀòn rbô bơkàu.