Tàm ƀòn Ea Mao, sàh Tân Tiến, càr Dăk Lăk, cau chài Hliêt, kòn cau Jêh-Triêng, 78 sơnam git tàñ ồi kòn cau bơh tŭ pa bau. Mò Hliêt yal, pô me mò dê là cau neh bơto wơl mò in bơta chài tàñ ồi kòn cau: “Rài yau kơnờm geh pô me bơto wơl jơh nùs, dilah he tàñ ờ niam, ờ kơrhia den mò ai gai peh tềng tê he dê. Dilah añ tơmut dang che brài ờ di rùp, ờ di bơta chài bơka den pô me ai trơs tê añ bơdìh”.

Bơh bơta kràñ cê hơ̆ neh gơ gơs bơta chài rơgơi bơh cau tàm pơdờn wơl tŭ do dê. Jat bơta chài tàñ bơh yau cau Jêh-Triêng dê, dùl blah ồi sùm geh 4 tus 6 bơta rùp bơka bè rùp kòn bơnus, sềm, klàng, sơmañ, chi che, bơkàu. Mò Hliêt pà git, nàng tàñ gơs dùl blah ồi tơ̆, blah ồi mă pal roh bơh 7 tus 10 ngai, sồr cau tàñ pal kơ̆ dơn, chài rơgơi mờ ngan ngồn kờñ tàñ ồi, tàm hơ̆ kal ke ngan rlau jơh kung gam là bơnah broă mòn rùp bơka, tài dilah mìng tìs dùl dang che brài den kung pal tă nàng tàñ wơl.

Kơ̆ dơn mờ broă tàñ ồi kòn cau, geh tŭ mò tàñ nàng tac, geh tŭ mò tàñ nàng pà. Gơ wèt mờ mò Hliêt, bơta kuơmàng ngan rlau jơh ờ di là pal tac geh priă kàr lơi, mờ là kòn sau, jơi nòi tàm ƀòn kung gam kờñ ală blah ồi kòn cau bơh yau. Mò gàr broă tàñ ồi kòn cau tài sơnđàc kòn sau, sơnđàc làng bol tàm ƀòn mờ tài bơh kờñ broă lơh bơh yau jơi bơtiàn dê.

Ai tàm sàh Đăk Tô, càr Quảng Ngãi, cau chài bi Y Trường, kòn cau Jêh-Triêng kung gam ngềt ngơt lơh kis wơl broă tàñ ồi kòn cau. Bi geh deh mờ dờng tàm hìu bơnhă geh broă tàñ ồi kòn cau bơh yau, geh uă rơnàng cau bơto wơl tàñ ồi kòn cau. Mơya hơ̆ sồng tŭ bi bau mờ cau ƀòn ngài, mè kung ờ gam tàñ tai, broă lơh bơh yau rơhời gơtìp roh huĭ. Bơta hơ̆ lơh bi kơlôi rơcang ngan. Bi rê tàm bơyai mờ mè, bàr nă mè mờ kòn bi kah wơ broă lơh bơh yau, nggùi wơl kềng bơrnơ̆ tàñ, lơh kis wơl broă lơh bơh yau.

Jat cau chài bi Y Trường, bơta niam is ồn bơh ồi kòn cau Jêh-Triêng dê là tàm rùp bơka mờ dà trum. Rùp bơka gơ jat bal mờ ù tiah he ơm kis. Bi Y Trường pà git, ồi kòn cau tŭ do geh tai dà tơlir, rơmit, mơya dà pơrhê mờ dà jù kung gam là tờm ngan, là dà bơh bơta geh is dê: “Gơ wèt mờ rùp bơka kòn cau bol hi dê là rùp pơrya ai ù tiah ƀòn lơgar mờ he ơm kis; ù tiah he ơm dilah geh uă dòr bơnơm den rùp bơka kung krơi sơl”.

Broă tàñ ồi kòn cau Jêh-Triêng tŭ do gam rơhời geh lơh wơl, kơnờm geh internet mờ mạng sàh hội, ồi kòn cau kung geh uă cau git tus. Bơta mờ ală cau ùr Jêh-Triêng kơp kờñ ngan rlau jơh ờ di là tac yòm ồi, mờ là geh tai ală cau kơnòm să nggui tềng bơr nơ̆ tàñ, bơsram mờ sền gàr broă bơh yau bơh mò, bơh mè dê. Ồng A Mrông ơm tàm sàh Tân Tiến, càr Dăk Lăk kung kơp kờñ geh tai ù tiah nàng ală cau chài in lơh wơl mờ bơto wơl broă bơh yau rơnàng kơnòm să in: “Tơnơ̆ tŭ ai ngui hìu niam chài mpồl bơtiàn sàh, kơp kờñ ală cau chài rơp geh anih nàng tàñ ồi bal mờ anih dờng ơnàng rlau, niam rlau… pơn jat tai gàr broă lơh bơh yau he dê dồ bă jŏ jòng ai ală rơnàng kơnòm să in bơsram, đòm jat”.

Sap bơr nơ̆ tàñ ồi tŭ do kung gam ntas tàm hìu, tàm ƀòn bơh cau Jêh-Triêng dê. Sap ntas hơ̆ ờ mìng tàñ gơs ồi àu, ồi mă halà ồi tơ̆ mờ gam gàr wơl bơta kah kir bơh thôn ƀòn dê, gàr wơl huềng niam chài jơi bơtiàn dê tàm git nđờ bơta tam gơl bơh rài kis dê.