Ờ geh uă jơnau đơs, dơ̆ lơh tamya Chum show – Bơta cum bơh bơta niam chài lam cau sền in mŭt tàm dùl dunia krơi is, do là ală tiah geh rùp rài ờs mờng tàm rài kis dê geh yal wơl mờ jơnau yal tàm jơnang tamya pa. Săp gùng đơs crih ală jơi bơtiàn geh mpong săp, geh tŭ brào, geh tŭ sơbăc mhar jăt tơl jơnau ơwañ bơh bơta àng gơcrà dê; ală cau chài kwan tềng che, pơdar, gơmù, hơ̆ sồng gơnguh jăt săp gùng đơs crih dê; mờ ală khàp, tŭ là lơh gơs phan teh, tŭ lơh gơs dùl bơnah bơh jơnau yal dê. Sền ờ mƀrơs măt tus tơl bơta gơlik geh tàm jơnang tamya, ồng Bachtijar, cau năc lòt nhơl tus bơh lơgar Nga sùm tơlik nùs nhơm gơboh kờñ ngan mờ đơs: “Añ đơs bơh tàm plai nùs añ dê, jăk chài ngan. Dơ̆ lơh do mùl màl niam bơnĕ ngan. Bol añ, ală cau năc lòt nhơl tus bơh lơgar Nga, gơboh kờñ ngan mờ ală cau chài tàm broă lơh do dê”.

Tàm bơta niam bơnĕ bơh bơta àng gơcrà tềng jơnang tamya, ală dơ̆ pơdar che par hờ đang jơnang tamya mờ tam dờp khàp neh lơh geh bơta niam bơnĕ ngan tàm măt cau sền in. Bơh tàm broă ơwañ să tamya, lơh jăt di pal bal mờ phan teh tus mờ broă lơh tờm mờ ờ ngòt geh bơta lơi tŭ gam hờ đang jơnang bơh cau chài dê, jơh ală neh pơgồp bal lơh geh dùl bơta geh uă nùs nhơm ngoh rơngăc ngan. Jăt bi Nguyễn Minh Hậu, cau chài rơwañ să đơs, nàng geh ală tŭ lơh geh tàm jơnang tamya là jơh dùl broă bơsram tàp sùm mờ uă bơta glar bòl ngan. “Gơwèt mờ añ den kal ke ngan, ờ tŭ lơi ƀuơn. Bol añ pal bơsram tàp sùm gơlik uă ngan dà kơl hề, geh tŭ geh bal dà măt, geh tŭ geh bal mhàm tai, nàng gơtùi lơh gơs broă do. Nùs nhơm bơh tơl dơ̆ lơh dê là krơi is, ờ gơtùi dơ̆ lơi kung ndrờm bal lơm".

Ờ mìng lơh gŏ niam măt cau sền, Chum show gam lơh geh dùl bơta niam săp ntas krơi is ngan. Tàm do, gùng đơs crih ờ gam là bơnah lơh geh bal, mờ neh gơs dùl bơnah bơh jơnau yal dê. Gơwèt mờ broă tus bal bơh ală cau chài tus bơh uă mpồl bơtiàn krơi is, ală săp gùng đơs crih ờs mờng bơh ală jơi bơtiàn dê bè Rơđê, Prum, Rơglai ha là Yoan, tŭ ntào is gơtùi sền gŏ bè ờs ngan, mơya tŭ geh ai tus bal tàm bơta chài jơnang tamya dê, den lơh geh dùl bơta đềt mềr mờ krơi is ngan. Ală bơta niam chài ờ gơtùi tam cah is, mờ pơgồp bal mờ broă ơwañ să bơh ală cau chài dê, bal mờ jơnau geh ai tàm jơnang đơs crih dê. Lŏ Trương Thu Hương, cau sền sơwì gùng đơs crih bơh broă lơh do pà git: bơh tàm broă pơgồp bal neh lơh geh bơta niam bơnĕ ngan ai dơ̆ tamya do in. “Geh uă ngan jơi bơtiàn tàm do mờ bơh bơta niam chài bơh ală jơi bơtiàn do dê, cèng geh tus tàm do ală gùng đơs crih là phan teh phan uh pơgồp bal mờ rài kis niam chài ha là phan uh, phan teh drơng ai broă lơh pin dờn in geh lơh tàm jơnang tamya do. Bol añ jòi geh broă pơgồp bal jơh ală gùng đơs crih hơ̆ bơh tàm broă ală cau lơh gơjăt bal, tam pà bal ală jơnau yal bè niam chài”.

Tàm jơnau đơs kòn cau Prum mờ ờ uă jơnau đơs tàm Tây Nguyên dê, chum là khàp”. Khàp, phan ngui đềt mềr mờ rài kis kòn cau Prum tàm tiah đah Jum tàm Gùl lơgar – Tây Nguyên dê, neh gơs rùp rài tờm ngan. Tŭ geh lơh niam, tŭ geh bơtồ dờp, tŭ geh ơn tàm bơta đềt mềr mờ kòn bơnus bal mờ bơta niam chài, khàp ờ gam là phan ờ git đơs, mờ neh gơs dùl bơnah bơh jơnau yal, geh yal mờ broă ơwañ să, săp ntas bal mờ bơta àng gơcrà dê. Jăt mò Nguyễn Thị Thảo Nguyên, ala măt hìu đơs crih Đó, sơnah ƀòn Bắc Nha Trang, càr Khánh Hoà đơs, broă lơh do geh lơh mờ jơnau kơ̆p kờñ prăp gàr niam ală bơta kwơ niam chài, mơya mờ dùl broă lơh pa. “Cum show là dùl dơ̆ lơh bè bơta niam chài pơgồp bal đah pe bơta niam chài Prum, Tây Nguyên mờ Yoan, geh kờp jơh 6 gơl lơh dềt, tàm hơ̆ tơl gơl lơh là dùl bơnah, yal bè broă bơtàu tơnguh rài kis dê. Jơnau kờñ bơh show dê là lơh geh sùm, bơtàu tơnguh mờ jờng rơ bơta niam chài tờm lơgar Việt Nam dê”.

Tàm bơta niam jơnang gùng tamya pa, ală bơta kwơ niam chài ờs mờng geh lơh di pal, ờ mìng lơh geh wơl mờ geh lơh pa nàng gơdờp bal mờ rài kis tŭ do dê. Bơh tŭ hơ̆, pơn jăt tai lơh geh mờ lơh geh uă rơlao tai tàm nùs nhơm cau sền, tàm hơ̆ uă ngan là gơwèt mờ cau năc tŭ tus mờ ƀòn dờng dà lềng Nha Trang.