Ngai 30/8, sàh Vân Hoà, càr Dăk Lăk, bơyai lơh dờp rò mat jờng rơ tờm chi Phan lời wơl Việt Nam gơwèt mờ 1 tờm chi Cộng (gam hòi là tờm Sui) mờ 3 tờm chi Đỏ (gam hòi là tờm chi Dâu da đỏ), pa geh Mpồl Sền gàr Ù tiah brê bơnơm mờ Tiah ơm kis Việt Nam dê dờp. 3 tờm chi Đỏ geh sơnam kis rlau 200 sơnam mờ tờm chi Cộng neh rlau 350 sơnam. Tờm Đỏ neh ai làng bol in gĭt nđờ rơhiang kàl plai lơngồt, ai tờm chi Cộng neh ai bơsơ̆t tram mờ cồng kam pañ bơh ală ngai sơn rờp cau pờ ù, kŭp mòc phan gàr bơta kis, tam dră mờ bol sò tơm sơgràm phà.

Bơh jŏ, ală tờm chi Phan lời wơl do neh là cơng tàng kah yau, là niam chài, là bơhiàn niam bơnĕ bơh ù tiah dê mờ là bơta pơn yờ să bơh làng bol ƀòn lơgar dê. Bi Lê Quốc Nam, ơm tàm sàh Vân Hoà, càr Dăk Lăk pơn yờ să đơs:  "Tờm chi Cộng do den gơ lòt gan uă nam kis gơs bơh gĭt nđờ bơta mìu càl rơbŭt dờng, gĭt nđờ bơta ờ niam bơh trồ tiah dê, gơ kung gam ntào kơ̆, kơ̆ dơn tàm tiah hơ̆. Den tàng tờm chi Cộng do gơwèt mờ làng bol kung là bơta kơldìng nùs nhơm dờng. Mờ gơ kung tơngŏ ndrờm bè nùs nhơm cau tàm do dê sơl”.

Bal mờ broă dờp rò mat jờng rơ tờm chi Phan lời wơl, sàh Vân Hòa bơyai lơh tơngŏ wơl drà Đồn tềng hơ đơm nggu tờm chi Cộng do. Do là drà neh geh bơh gĭt nđờ rơhiang nam lài do dê tàm gùng lòt phan lời wơl tàm tơrbŏ bal mờ tiah dà lềng tus tiah kơh bơnơm dờng ơning ơnàng. Mơkung gơ hòi gơ jà ală broă lơh yal tơngĭt uă, tàm tơrbŏ bal mpồl lơh sa kă bro bơcri priă mờ lơh broă bal tàm ù tiah Vân Hòa dê; gơ hòi gơ jà ală broă lơh lòt nhơl ƀòn brê bơnơm pơgồp bal mờ lòt sền ală suơn Đỏ - bơta plai chi pơn rơ ngan bơh ù tiah do dê.

Ồng Phạm Quốc Hoàng, Phó Chủ tịch Anih duh broă Làng bol sàh Vân Hòa pà gĭt, gĭt wă loh bơta kwơ, gơnoar bơh tờm chi Phan lời wơl dê, gơnoar atbồ bal mờ làng bol kung is ồn sền gròi tus broă prap gàr mờ ngui niam bơta kwơ ală tờm chi dờng yau dê: "Bol añ gam geh broă rơndăp lơh là rơ̆p kờp sền wơl ală tờm chi do mờ rơ̆p jà ală cau gĭt wă jrô lam lài tàm gah brê bơnơm rê nàng bơyai lơh pơlam tàp, dong kờl bơta chài sơng ka sền gàr, sền gàr tờm chi Đỏ do nàng gơ in gơs niam rlau tai mờ làng bol gơtùi ngui nàng lơh lòt nhơl geh niam rlau tai”.

Tŭ do tàm tiah đah mat tơngai lik càr Dăk Lăk geh 25 tờm chi Phan lời wơl geh dờp. Bơdìh mờ tờm chi Cộng mờ 3 tờm chi Đỏ pa đơs, gam geh mpồl 20 tờm chi pơ ò dờng yau tàm Tiah tềl lời wơl kah yau niam chài dà lơgar hìu Yàng Phờk Từ Quang, sàh Tuy An Bắc mờ 1 tờm chi Bồ Đề rlau 200 sơnam tàm tiah tềl lời wơl dà lơgar Hìu duh khoai cau tiơng pơn rơ Lương Văn Chánh.

Ồng Nguyễn Thành Sơn, Phó lam bồ Cơldŭ lơh broă Niam chài- Mpồl bơtiàn, sàh Phú Hoà 2, càr Dăk Lăk pà gĭt, ală hìu bơnhă, mpồl bơtiàn geh tờm chi Phan lời wơl ndrờm tơnguh uă nùs nhơm geh kơnòl, tàm sơm bat tê bal sền gàr bơta kwơ “phan lời wơl tơlir” do dê:  "Pah nam den bol añ hòi jà bal hìu bơnhă, jơi nòi den làng bol, ngan là lài mờ kàl mìu là bol añ pal koh ntê, wàs khòm, pleh digơlan là tờm chi gơtìp pă pừ tàm mìu càl rơbŭt”.

Gĭt nđờ rơhiang nam lòt gan, ală tờm chi dờng yau- tờm chi Phan lời wơl kung gam kơ̆ kơl jăp tàm rơyah chi dê, pơn jat tai gơs niam, geh mat sùm bè là cơng tàng bơh dùl ù tiah, gơ lòt mut tàm kir sơnrai bơh uă rơnàng dê. Broă sền gàr tờm chi Phan lời wơl Việt Nam ờ mìng geh gơtha bè tiah ơm kis, li la siñ họk lơm mờ gam là bơta sền dờng màng mờ kah yau, nùs nhơm gĭt ưn ngài gơwèt mờ cau lài do neh geh dà kơl hề rồ ù tiah, bơt bơtàu broă lơh, prap lời wơl tus tơngai tŭ do mờ tơnơ̆ do dê.