Gơwèt mờ klau pơnu kòn cau Jrai chài uă Rơ Châm Blinh, ơm tàm sàh Ia Phí, càr Gia Lai, bơceh lơh neh gơ gơs dùl bơnah bơh rài kis dê. Jơh bơsram gah Hội họa, mơya bi den geh cồng nha tàm gah đơs crih tam ya mờ ală jơnau đơs 2 dà đơs Jrai mờ Yoan cèng săp đơs Tây Nguyên dê, lơh gơrề uă pràn kơl dang tàng internet. Geh săp đơs ñhào krơi, pràn kơl dang bal mờ broă lơh tơngŏ cèng uă ngan tiah brê bơnơm dờng ơning ơnàng, ală video “tơlak View” bơh Rơ Châm Blinh dê cèng tus ai cau iăt in bơta pa ngan. Bơh đơs crih tam ya, bi kơ̆p kờñ sền gàr, ngui niam bơhiàn niam chài is jơi bơtiàn he dê. Lơh jat Nam Lòt nhơl Dà lơgar Gia Lai 2026, bi lơh geh khà dùl dơ̆ pơrlòng video lòt nhơl Gia Lai 2026 mờ tơngume “Tơl nă làng bol Gia Lai là dùl cau ala mat lòt nhơl”. Tàm pơrjum KOL càr Gia Lai nam 2026, bơyai lơh ngai 11/9, Rơ Châm Blinh pà gĭt:

"Añ chờ hờp ngan tŭ geh Kwang àng càr Gia Lai jà tus bal Pơrjum KOL Gia Lai nam 2026. Tàm do, añ geh tŭ tơngai niam tìp mat mờ tơm bơh mờ uă oh mi bơceh lơh tơngume tus bơh Quy Nhơn kung bè ală tiah ndai. Do là dơ̆ niam ngan nàng mpồl bơtiàn bơceh lơh in lùp bơsram bal, tàm tơrbŏ bal mờ yal tơngĭt rùp hin ƀòn lơgar dê. Să tờm añ sùm kơ̆p kờñ ală cau bơceh lơh tơngume rơ̆p jơh nùs yal tơngĭt uă rlau tai bè bơhiàn niam chài, bơhiàn rài kis bơh yau mờ ală dơ̆ lơh chờ niam ngan bơh kơnhoàl ù tiah do dê”.

Kung mờ ală video rài kis bè ờs, bi Rah Lan H’Wĩ, ơm tàn thôn Kte Lớn A, sàh Phú Thiện, càr Gia Lai, gam pơgồp bơnah lơh gơrề uă rùp rài niam chài kòn cau Jrai tàm internet. Jơh bơsram Hìu bơsram Tàp pràn să jan Đà Nẵng, H’Wĩ geh bơta kờñ kă bro online tàm TikTok mờ Facebook. Ală video bè niam chài bơhiàn ờs mờng geh bi lơh tơn tàm ƀòn lơgar mờ tàm hìu bơnhă neh gơ hòi gơ jà tơlak nă cau sền. Bơh dơ̆ lơh Yàng duh khoai kòng, dơ̆ lơh Yàng khồm tồr, dơ̆ lơh Yàng hòi Hwềng tus ală phan sa mờng kwèng bè nha bùm blàng chàng, ka prùng mờ nha prìt, ƀŏ blơn bơtăng..., H’Wĩ ai niam chài kòn cau Jrai tus mờ cau sền mờ ală rùp hin rềp mềr. Pa do, video kŭp wơl video cau mè lơh tơrnờm Jrai ờs mờng pơn jat tai dờp geh bơta sền gròi bơh mpồl bơtiàn tàm internet dê. Gơwèt mờ H’Wĩ, bơceh lơh tơngume mơlà broă lơh, mờlà broă lơh lơh gơrề uă niam chài ƀòn lơgar dê.

“Añ lơh tơngume tàm Tiktok, uă ngan tàm pà bè broă lơh jòi priă nàng bơt lơh dùl nơm hìu ơm ai mè bèp in. Ală tơngume hơ̆ dờp geh bơta sền gròi, jat sền mờ kờñ bơh uă ngan cau dê. Geh tus bal Pơrjum KOL càr Gia Lai là dùl bơta chờ hờp mờ kung là bơta gơn kơnờm dờng ngan gơwèt mờ añ. Tàm gùng lòt lơh tơngume, añ sùm ưn ngài ală cau kờñ gơboh, kờñ mờ lòt bal mờ añ. Ngan là kơnờm bơta sền gròi bơh tơl nă cau dê mờ añ hơ̆ sồng geh bè tŭ do. Bơh pơrjum dơ̆ do, añ kung kơ̆p kờñ tă pơgồp dùl bơnah dềt rơhền dà kơl hề bơh he dê nàng yal tơngĭt uă, lơh gơrè uă ală rùp hin ƀòn lơgar dê”.

Ờ mìng ală cau kơnòm să lơh tơngume bè niam chài, rài kis pah ngai, mpồl Kwang àng kung gam  ngui mạng sàh hội nàng ai rùp hin rềp mềr, geh ngan tus mờ làng bol. Thiếu tá ồng Lại Văn Đạt, Kwang bàng Mpồl Lơngăp lơngai, Kwang àng sàh Phú Thiện, là dùl tàm ală KOL bơh càr Gia Lai dê geh mpồl bơtiàn internet gĭt tus mờ broă lơh “Kwang àng rê tàm ƀòn”. Tàm tŭ lơh broă, tơm bơh bơr mờ làng bol, bi bơsram is dà đơs kòn cau Jrai nàng mblàng yal adat boh lam mờ dà kòn cau; mơkung hòi jà jàu pà 500 nơm kong tàp ai kơnòm bơsram kal ke in lài mờ tŭ mut tàm nam bơsram pa. Ală rùp hìn bơh ƀòn lơgar geh Thiếu tá Lại Văn Đạt kŭp wơl, tàm pà tàm mạng sàh hội mờ tơngume geh ngan, gơ hòi gơ jà gĭt nđờ jơ̆t rơbô dơ̆ cau sền. Jat bi, broă bơsram is dà kòn cau Jrai, gĭt wă rlau tai niam chài bơh làng bol dê dong broă lơh mblàng yal, hòi jà làng bol rềp làng bol mờ geh cồng nha rlau tai.

“Tŭ añ bơsram is mờ gĭt đơs dà jơi bơtiàn dồ ết nă cau là cau Jrai den tàm broă lơh gơlơh ƀuơn ngan, rềp mềr rlau den tàng wă geh nùs nhơm bơta kơ̆p kờñ bơh làng bol dê. Bơh hơ̆, bol añ geh broă lơh lơh broă, mblàng yal rềp rlau tai mờ bơta geh ngan, den tàng làng bol chờ hờp ring bal dong kờl tàm tŭ bol añ mblàng yal mờ dà kòn cau Jrai kung bè dong kờl làng bol”.

Pơrjum KOL càr Gia Lai nam 2026, mờ tơngume “Brê bơnơm dờng ơning ơnàng tup dà lềng tơlir- lơh gơrề uă bơta pin dờn sồ”, geh bơyai lơh tàm tơngume Nam Lòt nhơl dà lơgar 2026, nàng tàm tơrbŏ bal mpồl bơtiàn, tam pà bal mờng chài mờ yal tơngĭt uă bal niam chài, lòt nhơl, kòn bơnus Gia Lai dê. Hơ̆ là dơ̆ tìp mat bơh ală gah sền, ală jơnau yal mờ ală cau gam ngai pah ngai ngui bơta pràn gơrềng bơh he dê nàng lơh gơrề uă jơnau yal geh ngan. Bơh hơ̆, bơt bơtàu dùl ù tiah sồ lơngăp lơngai, niam jak mờ pin dờn ngan.