Trồ mho tàm thôn Đăk Trăm 1, sàh Kon Đào, càr Quảng Ngãi. Tơnơ̆ dùl ngai lơh suơn mìr, ƀlàng hìu cau chài jak ngan ồng A Thu dê mpong ntas sap cing mồng, đờng t’rưng, klông pút, đờng lŭ. Cau dờng, ơruh pơnu, geh bal mờ ală oh dềt tus bơsram. Cau den tàp dròng cing, geh cau den tàp teh đờng, geh cau den sền ồng A Thu lơh niam wơl tơl sap ntas.

Tàm gùng prap gàr mờ lơh niam bơta kuơ gùng đơs crih bơh yau, ồng A Thu ờ mìng là cau git dròng cing jañ mồng, mờ ồng gam jòi git is, mòn mờ lơh wơl uă bơta đờng goòng bơh yau. Is ồn, bơh nam 2017, ồng sơn đờm kơlôi sơnơng đờng lŭ. Bơh 5 nrăng lŭ bơh chờm, ồng A Thu kơ̆ dơn lơh tơrlòng, tam gơl uă ngan rlau jơh nàng lơh gơs bòr đờng lŭ 15 nrăng. Bal mờ cing mồng, t’rưng, klông pút, đing pah, sơng gơr,.. ală đờng goòng hơ̆ gơ gơs dùl bơnah tàm ală broă bơyai lơh mpồl cau chài bơh ồng tề lam. Ồng A Thu yal:

“Bơh tŭ añ geh tơl nă cau git tus, khi jà añ tus bơto cing mồng. Sàh lơi geh cing mồng là khi jà añ tus bơto. Bơh hơ̆ tus tŭ do añ neh bơto wơl rlau 100 ơdŭ in rau. Añ lòt bơto tàm ală hìu bơsram, hìu bơsram kâp 2 mờ hìu bơsram ơm sa bic tơn. Thôn, ƀòn lơi kờñ bơsram dròng cing jañ mồng là añ tus mơ. Añ bơto dròng cing jañ mồng jai, iat sap ntas, lơh niam cing mồng jài; bơdìh hơ̆ tai gam bơto đờng klông pút, t’rưng, đờng lŭ gơ wèt tàm jơnau kờñ cau bơsram dê”.

Bơta pal sền ngac tàm cau chài ồng A Thu ờ mìng ơm tàm broă ồng git nhơl halà mòn đờng goòng. Ồng gam lơh ngan nàng ală cau kơnòm să tàm ƀòn kung git nhơl, git iat mờ git bơta kuơ ală sap ntas hơ̆ dê. Mpồl cing mồng, tamya xoang mờ đờng goòng kòn cau bơh ồng A Thu bơtòm tơrgùm wơl geh git nđờ jơt nă cau tàm mpồl, geh bal cau dờng sơnam mờ cau kơnòm să. Bơh nam 2019 tus tŭ do, mpồl neh uă dơ̆ tus bal ală pơrjum, dơ̆ bơyai lơh, pơrlòng tàm càr mờ bơdìh càr. Nam 2025, ală cay chài gam cèng ală sap ntas kòn cau Sơdàng dê tus mờ Ƀòn Niam chài - Lòt nhơl ală jơi bơtiàn Việt Nam tàm Đồng Mô, Hà Nội. Cau chài ồng A Hương, 47 sơnam ơm tàm thôn Đăk Trăm 1 là dùl tàm ală cau đềt mềr uă nam mờ mpồl ồng A Thu dê đơs:

“Lài do añ mìng git trah mòn rùp, tơnơ̆ hơ̆ añ mut tàm mpồl cing mồng mờ đờng goòng kòn cau bơh cau chài ồng A Thu dê. Ồng A Thu neh tề lam mờ bơto wơl cing mồng mờ đờng goòng kòn cau bol hi in. Ồng A Thu lam bol hi lòt bơyai lơh tàm uă tiah bè Ƀòn Niam chài - Lòt nhơl Đồng Mô tàm Hà Nội, Lâm Đồng, Dăk Lăk. Bơh hơ̆, bol hi geh tai tŭ niam nàng bơsram mờ yal tơnggit niam chài kòn cau he dê”.

Ồng A Don - Phó Lam bồ cơldŭ niam chài sàh Kon Đào, càr Quảng Ngãi đơs là, ală broă lơh cau chài jak ngan ồng A Thu dê ờ mìng ơm wơl tàm broă prap gàr bàr pe bơta đờng goòng halà gàr sùm dùl mpồl đơs crih tamya. Hơ̆ là tŭ tơngai lơh gơlik ală cau tàm pơrdờn wơl.

Ồng neh bơto wơl cing mồng mờ đờng goòng bơh yau ai git nđờ rhiang nă cau bơsram tàm ală hìu bơsram mờ mpồl bơtiàn in; mờ kung pơlam uă cau chài in git bơta chài lơh niam wơl mờ iat sap ntas cing mồng. Geh ală cau bơsram tơnơ̆ tŭ chài rơgơi den pơn jat tai ơm tàm mpồl cau chài, bal mờ ồng bơto wơl rơnàng kơnòm să in. Ồng A Don đơs:

“Añ gŏ ồng A Thu neh pơgồp bơnah uă ngan tàm broă sền gàr mờ lơh niam cing mồng; đờng goòng kòn cau Sơdàng. Ồng neh lơh ngan bơto wơl cing mồng mờ đờng goòng òn cau ai làng bol tàm ƀòn mờ jơh ală ƀòn ndai tàm sàh in. Bơdìh mờ bơto wơl tàm sàh, cau chài ồng A Thu gam lòt tus ală sàh ndai tàm càr nàng bơto wơl ală hìu bơsram mờ ală ƀòn geh cing mồng, đờng goòng mờ geh jơnau kờñ bơsram in. Añ gŏ cau chài ồng A Thu là dùl nă cau lơh ngan tàm broă lơh niam mờ sền gàr niam chài cing mồng mờ đờng goòng kòn cau Sơdàng dê, hơ̆ là dùl bơta kuơmàng mờ pal ki ngàm ngan”.

Bơta is ồn tàm cau chài jak ngan ồng A Thu là ồng ờ mìng gàr ală sap ntas kòn cau Sơdàng dê mờ mpàng tê bơh dùl nă cau chài dê, mờ gam mblàng wơl bơta gơboh mờ ală sap ntas hơ̆ tàm huềng nùs cau kơnòm să dê. Hơ̆ là bơta kuơ dờng ngan tàm broă ồng A Thu dê: ờ lời ală sap ntas mò pàng dê mìng gam mpong ntas tàm jơnau kah kir, mờ lơh gơ pơn jat tai mpong ntas tàm rài kis tŭ do.