Biăp tờr yòng (geh tiah hòi là biăp rơhum brê) là biăp brê ƀuơn jòi, sùm hòn tềng gah dà croh, tềng hơđơm mƀur chi brê sù iò. Làng bol kòn cau Bahnar pĭc biăp tờr yòng gùt nam. Biăp sùm geh pĭc tàm drim gờñ tŭ gam uă sơntŭ, geh bơta sràt dồ ết mờ niam ai să jan in. Bơkah ngan rlau jơh là ală cồng bơnung, nha tơlir niam. Biăp tơnơ̆ tŭ pĭc geh rào goh, lời rơsơh. Mò Y Giang ơm tàm ƀòn Plei Tơngia, sơnah ƀòn Đak Cấm, càr Quảng Ngãi pà gĭt broă trŭ gơm biăp tờr yòng:“Biăp tờr yòng pĭc tàm drim gờñ, gam uă sơntŭ, hơ̆ sồng geh bơta sràt bơkah, geh bơta lơngồt bơkah. Ƀòk phe pal ƀŏ halà măi gơ lik ƀòk, gơn dà rơngŏ tĕ ƀòk phe rơlĕ rơlùn, xoài ring tê den dà hơ̆ sồng sàng, biăp hơ̆ sồng bơkah”.

Ƀòk ngui nàng gơm biăp sùm là ƀòk phe halà ƀòk tơngời. Tŭ gơm, glah dà geh ơn tềng bơnhă ồs, gơn dà rơngŏ den tĕ ƀòk phe rơlĕ rơlùn, tĕ jài xoài jài nàng biăp ờ gơtìp gơ klăc. Tơnơ̆ hơ̆ hơ̆ sồng tĕ biăp tờr yòng bal, tĕ tai dồ ết boh mờ phan tĕ ndai. Jat bơta kờñ sa bơh hìu bơnhă dê, digơlan tĕ tai ka dà croh, koàc halà dồ ết poăc, mơya biăp tờr yòng gơm gời kung là uă ngan rlau jơh....

Bơta is ồn tàm biăp pài tờryòng là bơta bơkah bơh gơ dê bè ờs ngan mờ ƀuơn sa. Mò Y Lat, ơm tàm ƀòn Plei Tơngia, sơnah ƀòn Đak Cấm, càr Quảng Ngãi pà gĭt:“Biăp pài tờr yòng là pan sa mờng kwèng bơh kòn cau Bahnar dê bơh lài do. Phan sa mìng kờñ geh biăp tờr yòng mờ dồ ết ƀòk phe lơm là jơh hìu bơnhă neh geh dơ̆ sa bơkah rao. Dilah geh tai dồ ết poăc halà ka gơm bal den phan sa bơkah rlau. Gơm biăp pài do là pal rơlĕ rơlùn, ờ gơ jal, xoài ring dê den biăp hơ̆ sồng bơkah”.

Tàm rài kis mpồl bơtiàn, biăp pài tờr yòng sùm geh tàm dơ̆ sào piang hìu bơnhă dê tơnơ̆ dùl ngai jòng lòt tàm mìr, halà tàm ală dơ̆ pơrjum bal bơh ƀòn dê. Glah biăp geh ơn tàm gùl hìu rơng, tơl nă cau tơrgùm gùt dar, sa bal, tơm bơh bơr bal. Phan sa  do ờ mìng ròng siam să jan lơm mờ gam tam klăc bal nùs nhơm kờñ gơboh đah ală cau tàm hìu bơnhă mờ mpồl bơtiàn.

Tŭ do, bulah rài kis bơh làng bol kòn cau Bahnar dê neh geh uă tam gơl, uă phan sa pa geh tŭ do, mơya biăp pài tờr yòng kung gam geh sền gàr bè dùl bơnah kir sơnrai niam chài dê.