Jat bơta pin dờn bơh yau bơh kòn cau Rơđê dê, tơnơ̆ tŭ tàm hìu bơnhă halà ƀòn lơgar geh cau sang rài, is ồn tài bơh kòp jê, rơ̆p gam wơl nhơm ờ niam, ờ bơtoah bơtoài pal geh ting bơtrơh nàng rài kis gờñ rê wơl mờ bơta ring lơngai. Den tàng, tơnơ̆ tŭ tơ̆p ƀồc jơh, hìu bơnhă, jơi nòi mờ ală cau tus tơn tàm dơ̆ tơ̆p ƀồc sùm lơh bơhiàn um dà, pì phan, lơh sàng goh să jan mờ ào mpha tàm dà mbòr halà dà croh ƀòn dê. Kra ƀòn ồng Zôn, ơm tàm ƀòn Wiâo A, sàh Krông Năng, pà gĭt bơhiàn do geh bơh jŏ rài tàm rài kis nùs nhơm bơh kòn cau Rơđê dê.

“Cau hòi hơ̆ là broă rào sàng goh să jan, lòt pì jơh ồi ào tàm dà mbòr halà dà croh nàng hiòng dà in pơr dô jơh ală bơta ƀơ̆ bơl, kòp bơtờp gơđềt tàm ồi ào; pal pì goh, sang tĕ jơh phan gơđềt ƀơ̆ bơl tàm să jan nàng ai gơ in sàng goh, ờ kờñ ală bơta ờ niam gam gơđềt wơl”.

Ờ mìng tơnơ̆ dơ̆ tơ̆p ƀồc lơm, mờ tơnơ̆ dơ̆ sa bơthi, kòn cau Rơđê kung bơyai lơh bơhiàn rào ƀơ̆. Tơnơ̆ bơnah lơh Yàng duh khoai tơngăc cau neh chơ̆t, jơh ƀòn lơgar lòt bal tàm dà croh um dà, pì phan, kŭp ka, pĭt biăp brê nàng ting bơtrơh jơh bơta muăt jrùm mờ kơ̆p kờñ geh pràn kơl dang să jan, lơngăp lơngai ai cau gam kis in. Bèp Roma, cau geh bơngă pin dờn ơm tàm ƀòn Wiâo B pà gĭt:

“Lài do ngan là bè hơ̆, cau lam lòt tuh jơh bơta ờ bơtoah bơtài, rào ƀơ̆ tơnơ̆ tŭ dơ̆ sa bơthi, mờ tơ̆p cau neh chơ̆t, tàm hìu bơnhă, jơi nòi bal mờ gơ̆p mù tàm dà crih, um dà, pì phan. Tàm kàl prang den khi pơgồp bal mờ dơ̆ bơyai lơh rào ƀơ̆ tàm dà croh den um dà pì phan mờ kŭp ka, hào bal rơwas sơwơr sơkal dà nàng gir ka mờ pĭc biăp brê sa sào tàm brê, nàng kờñ sang tĕ jơh bơta ờ bơtoah bơtoài mờ hŭi tĕ jơnau muăt jrùm tàm hìu bơnhă. Lài do, tơnơ̆ tŭ bơsong jơh broă ƀồc blàng dùl ngai den bơyai lơh mù tàm dà croh um dà pì phan kŭp ka dà croh tơn, tŭ do, gơ jat bal tơl ală bơta ƀuơn hơ̆ sồng lơh”.

Tŭ do, tài ală bơta ơm kis tam gơl, bơhiàn rào ƀơ̆ ờ gam geh bơyai lơh dờng bè lài do tai. Bulah bè hơ̆, uă hìu bơnhă tàm Krông Năng, càr Dăk Lăk kung gam gàr niam bơhiàn do bè dùl broă lơh pơndờm pơnđiang nùs nhơm tơnơ̆ tŭ roh rui tàm hìu bơnhă. Ồng Bi dê, cau tàm Mpồl ala mat Mpồl Cau dờng sơnam sàh Krông Năng pà gĭt:

“Jơh ală dơ̆ tơ̆p ƀồc, cau chơ̆t tài bơh bơta lơi, hìu bơnhă mờ jơi nòi tơnơ̆ tŭ rcang jơh ală bơta, cèng lòt tơ̆p ƀồc niam tàm hìu ƀồc jơh, ngan tơnơ̆ bol khi lòt tus 2 gah dà croh mờ kơ̆p kờñ: Dùl là kơ̆p kờñ ai tơl nă cau in geh pràn kơl dang să jan lơngăp lơngai, ting bơtrơh jơh ală bơta ờ bơtoah bơtoài tàm hìu bơnhă. Bàr là um dà pì phan, sang tĕ jơh ală bơta bơ̆ bơl, nhơm bơ̆ ờ gŏ di lời gơđềt tàm să jan, lơh sàng goh ào mpha, să jan bơh jơh ală cau tàm hìu bơnhă dê. Pe là lòt nàng lời tĕ jơh ală bơta lơh he muăt jrùm, bòl glar ală ngai do. Den tàng pal bơyai lơh lòt rào ƀơ̆ tàm dà croh, chờ hờp bal, pĭc biăp, kŭp ka bal sa sào bal tàm brê. Lài do, ƀòn lơgar geh rơwas, cau lam bal rơwas lòt sơwơr sơkal dà nàng tơl nă cau in gir kŭp ka ti, lòt den jơh ƀòn lơgar lòt jơh tơn. Ai tŭ do, tài ờ ru mờ broă lơh, ală bơta neh krơi bè lài do den tàng mìng bơyai lơh tàm hìu bơnhă, jơi nòi rềp lơm, ờ lơh lơngeh lơngañ jơh ƀòn tai”.

Bơhiàn rào ƀơ̆ bơh kòn cau Rơđê tàm Krông Năng, càr Dăk Lăk ờ mìng ƀuơn ngan là lơh sàng goh să jan tơnơ̆ dơ̆ tơ̆p ƀồc lơm mờ gam cèng gơtha niam. Do là broă lơh nàng tơl nă cau in lơh rài bơta jê sồt muăt jrùm roh cau pròc mhàm bal, lời tĕ bơta muăt jrum kơlôi sơnơng, pơndờm pơnđiang bal mờ gơ̆p pơn jat tai kis pràn, kis chờ hờp mờ pơgồp bal mờ mpồl bơtiàn ƀòn lơgar.