Tàm ù tiah dờng ơnàng bơh Ƀlàng dờng Tam klac dờng, sơnah ƀòn Pleiku, càr Gia Lai dê, sap ntas cing mồng nggồr chờ, gơ hòi gơ jà gal ngan làng bol tàm ƀòn lơgar bal mờ nac lòt nhơl tàm kup tê tơrbŏ gơs dar tam ya xoang lơbơn niam. Do là jơnau dròng cing “Lơh yàng rơpu” bơh mpồl cau chài kòn cau Jarai tus bơh ƀòn Mlăh, sàh Phú Túc, càr Gia Lai dê lơh. Bơdìh mờ ală jơnau ring yau, mpồl cau chài kơnòm să gam dròng cing geh lơh pa, bal mờ sap ntas ngồr chờ tiơng pơn rơ ngan, cèng tus bơta chờ hờp chờ hờn, hô hơng, lời wơl bơta kơlôi sơnơng niam ai nac lòt nhơl tus mờ Gia Lai in:

“Añ kơp kờñ broă lơh do rơp pơn jat tai geh lơh nàng añ rơp lòt tus tai mờ Gia Lai nàng sền broă lơh do”.

Oh Ksor H’Huế là cau tàm mpồl cing kơnòm să tus bơh ƀòn Mlăh, sàh Phú Túc yal, pah dơ̆ geh soh phan ờs mờng kòn cau dê, bal mờ mpồl cing mồng - tamya xoang bơh ƀòn dê bơyai lơh tềng đap mat nac lòt nhơl, oh gŏ pơn yờ să ngan tài niam chài kòn cau Jarai dê kung gam geh sền gàr mờ geh cau kờñ:

“Oh kơp kờñ là, bơta niam chài ờs mờng kòn cau he dê rơp pơn jat tai geh gơ rề tus nac lòt nhơl lơgar ndai kung bè dà lơgar Việt Nam he dê”.

Tus mờ broă lơh “Cing mồng lồi poh - Sền mờ git” dơ̆ do tàm Pleiku, mpồl cau chài ƀòn Mlăh, sàh Phú Túc gam lơh wơl Dơ̆ lơh yàng ưn ngài yàng - dùl bơta niam chài jŏ rài ngan bơh cau Jarai dê. Tàm sap cing mpong ntas tàm ù tiah brê bơnơm, cau bơ jơu lam lơh ală bơhiàn lơh yàng hòi dan pràn kơldang, kàl lơh sa tơnhàu geh uă, ƀòn lơgar ring lơngai, kòn sau tam klac bal mờ rài kis hờm ram, wil tơl. Cau lơh rac yàng là kra ƀòn ồng Ralan Klil tàm ƀòn Mlăh, sàh Phú Túc, càr Gia Lai pà git, bơhiàn lơh yàng cèng gơtha gah huềng niam ngan, ai tơnggŏ nùs nhơm git ưn ngài bơh kòn bơnus dê gơ wèt mờ trồ tiah, ù tiah, brah yàng:

“Ngai do bol hi jơh nùs lơh yàng ưn ngài yàng, hòi dan yàng sền gàr hìu bơnhă geh ring lơngai, chờ hờp, pràn kơldang. Hòi dan ồng mò, mè bèp kis jŏ, kòn sau gơ lòng sồr. Bol hi dan pơdơng yàng in dùl nơm sur dam, 7 drăp tơrnờm, hòi dan yàng dờp phan pơ dơng do, ai pà bơta bơtuah bơtuài, ring lơngai wil tơl. Dan ai pà kàl lơh sa gơs niam, kòi bềng drong, tơngời bềng sơ̆, lơh sa ƀuơn ƀuài, geh phan prap, phan tềm pềr, rài kis hờm ram jŏ jòng”.

Bi Kpă H’Nhung, kòn cau Jarai là dùl nă cau pơlam tàm “Ƀòn lòt nhơl mpồl bơtiàn tàm Plei Chuet”, sơnah ƀòn An Phú, càr Gia Lai pà git, nhai lài mpồl cau chài cing mồng ƀòn dê kung neh tus bal broă lơh “Cing mồng lồi poh - Sền mờ git”. Nam bơsram pa do, Ƀòn lòt nhơl Mpồl bơtiàn Plei Chuet neh wă 8 hìu bơsram mầm non, kâp 1, kâp 2 mờ kâp pe bal mờ gal ngan nac lòt nhơl tàm lơgar mờ bơdìh lơgar tus sền git. Ală oh kờñ ngan tàp lòt ceh càng èk, ƀŏ phe, bơto tàñ sơ̆, tàñ ồi kòn cau hơ̆ sồng geh soh ală blah phan soh kòn cau gơ klŏ gơ crà nàng cùp rùp kir sơnrai. Bi Kpă H’Nhung pà git:

“Tàm hìu bơnhă, geh bèp, ală oh mi ndrờm lơh lòt nhơl mpồl bơtiàn lơm, tus bal ală broă lơh bơh dơ̆ lơh chờ dê mờ nùs nhơm ngac ngar, kờñ niam chài bơh yau mò pàng dê lời wơl. Mpồl cing Plei Chuet bol hi geh uă rơnàng cau, ơruh pơnu, cau klau, cau ùr, cau chài kơnòm să den tàng nùs nhơm tus bal dơ̆ lơh chờ là jơh nùs ngan, chờ hờp ngan nàng dròng cing, tamya ală jơnau xoang bơh yau kòn cau Jarai dê. Bol hi tus bal dròng cing jañ mồng, tamya xoang chờ hờp ngan, drơng nac lòt nhơl ală tiah in tus sền gal ngan. Bol hi sơlơ geh uă tai bơta chờ hờp mờ wă nac lòt nhơl tus mờ lòt nhơl mpồl bơtiàn tàm ƀòn”.

Ồng Bùi Trọng Hiền - cau kơlôi sơnơng gùng đơs crih bơh yau mờ niam chài ờs mờng Việt Nam (gơ wèt Hìu bơsram kơlôi sơnơng gùng đơs crih dà lơgar Việt Nam) neh geh uă nam đềt mềr mờ niam chài ală jơi bơtiàn tàm càr Gia Lai đơs là:

“Cing mồng lồi poh là anih nhơl pa, lơh gơlik bơta niam ai ală bòr cing yau in geh tŭ niam nàng mpong ntas tàm ù tiah brê bơnơm. Jat añ, bol he kờñ prap gàr cing mồng den pal geh ală mpồl cing mờ ală bòr cing yau mờ pal geh tŭ niam nàng he bơyai lơh. Añ gŏ broă lơh lòt nhơl mpồl bơtiàn ai cing mồng gơ gơs phan bơna lơh gơlik priă jền là jơnau kờñ mờ bol hi gam lam lơh”.

Tàm ù tiah ƀòn bơnơm Pleiku, càr Gia Lai, sap ntas cing mồng, jơnau tamya xoang lơh gơ kờñ ngan cau sền bal mờ gơ klŏ gơ crà niam chài kòn cau Jarai neh lời wơl ală bơta kah kir ờ gơtùi huĭ tàm nùs nhơm nac lòt nhơl. Ờ mìng là dùl broă lơh sền git, “Cing mồng lồi poh - Sền mờ git” gam pơgồp bơnah sòl pơnđàng bơta pràn kis kơ̆ dơn bơh ù tiah niam chài cing mồng Tây Nguyên dê.