Do là dơ̆ sơnrờp lơh chờ geh bơyai lơh tàm kấp càr. Lơh chờ kờp dŭ geh bơyai lơh bơh ngai 15 nhai 8 tus ngai 02 nhai 9 tàm sơnah ƀòn Buôn Ma Thuột, sàh Krông Păc, sơnah ƀòn Tuy Hoà mờ ală sàh tam tờm sầu riêng tàm càr Dăk Lăk. Lơh chờ geh 17 broă lơh mờ mpồl broă lơh niam chài, kă bro phan, lòt nhơl.

Bơta tơngŏ tờm là broă lơh sơn đờm tàm Ƀlàng dờng ngai 10 nhai 3; tiah ràng yal mìng gah sầu riêng mờ phan OCOP; lơh chờ phan sa; tour lòt nhơl tàm suơn sầu riêng; pơrjum bơyai tơrbŏ bal lơh, tăc plai sầu riêng. Kwơ màng, tàm pơgăp 500 nơm rơndeh ƀăn tải rơ̆p lòt bơh sàh Krông Păc tus tiah tờm sơnah ƀòn Buôn Ma Thuột nàng yal plai sầu riêng, lơh geh bơta pơnrơ Guinness mờ drơng cau năc in sa plai sầu riêng. Bal mờ hơ̆, show lòt sền tiah niam “Kah hìu hờ đang jòng” ngui măi mok 3D mapping rơ̆ geh lơh tàm mang ngai dơ̆ prao, dơ̆ poh mờ Ngai rơlô pah poh tàm ƀlàng dờng Hìu prăp gàr phan kwơ yau càr Dăk Lăk tàm tơngai geh bơyai lơh chờ.