Tiah tềl kah yau Gơlang Nhạn càr Dăk Lăk mờr tus ngai Lơh yàng huềng soàn Mò geh gal ngan cau tus. Lŏ Tống Thị Hải Yến, cau năc tus bơh càr Phú Thọ pà git, lŏ pal geh dùl dơ̆ lòt mờ gùng ngài rơlao 180 kơi sồ bơh Buôn Ma Thuột càr Dăk Lăk den tàng glar ngan. Geh ờ uă cau năc tàm mpồl neh sơrbì dơ̆ lòt do, ờ tơl pràn nàng lòt jơh gùng lòt drim tàm brê bơnơm, mho tus tìp dà lềng; drim hùc kơphe Ban Mê, mho sền bùi dà lềng tàm Hòn Yến.

Lŏ Yến đơs là, bơta ngài đah ală tiah kờñ tus ngài ir, gùng lòt ờ niam den tàng tơngai nàng lòt gơtìp uă rơlao mờ tơngai lòt nhơl. “Do là dơ̆ sơnrờp añ tus tàm do, añ gŏ tiah do niam bơnĕ ngan, kòn bơnus đềt mềr, broă lơh kung niam. Mơya kung wah rơwời ngan, ờ hềt geh bơcri priă lơh di pal, ờ hềt geh uă broă lơh drơng ala nàng gàr jơng cau năc. Di lah bơtàu tơnguh niam den tiah do gam geh uă ngan bơta pràn”.

Lòt nhơl càr Dăk Lăk gam ờ tơrgùm bal, kung là jơnau đơs bal bơh uă mpồl lơh sa kă bro lòt nhơl dê. Ală gùng lòt ngài, phan lòt nhơl ờ geh lơh nền nòn lơh bơta niam gơmù uă. Bơh tiah drà Buôn Ma Thuột tàm tiah đah măt tơngai Mŭt tus tiah dà lềng đah măt tơngai Lik ngài rơlao 180 kơi sồ. Bơh Buôn Ma Thuột tus tàm ală tiah lòt nhơl dềt rơlao, bè tơnao dà Lăk, Buôn Đôn kung ngài rơlao 50 kơi sồ gùng lòt. Lŏ Phạm Bích Hạnh, ala măt dùl kông ty lòt nhơl tàm ƀòn dờng Hồ Chí Minh pà git: “Gùng lòt ngài ir, cau năc gơtìp glar di lah lòt bơh tiah đah măt tơngai Lik tus tiah đah măt tơngai Mŭt càr Dăk Lăk. Di lah lơh niam gùng lòt den khà cau năc tus tàm do gơguh niam ngan”.

Ồng Trần Hữu Phước, lơh broă tàm mpồl lơh broă lòt nhơl ală lơgar gơl gùng lơgar Việt Nam mờ lơgar Lào đơs là, bơta ngài uă ir, phan bơna tơrbŏ bal ờ hềt ndrờm bal lơh broă bơyai lơh ală dơ̆ lòt nhơl pơgồp bal đah brê bơnơm mờ dà lềng gam uă kal ke: “Tŭ do ală gơl gùng mờ tơrbŏ bal đah bơnơm tàm gùl lơgar mờ ală càr tiah jăt gah dà lềng đah jum tàm gùl lơgar gam ờ niam”.

Bal mờ broă gùng lòt, lòt nhơl tàm càr Dăk Lăk kung geh sền là gam lơh ờ nền nòn. Cau năc tus ală tiah lòt nhơl sền tàm càr Dăk Lăk, kŭp rùp hơ̆ sồng mhar lik lòt. Ală broă lơh niam chài tàm uă tiah kung gam lơh uă nùs nhơm lơh ràng tơlik, ờ geh bơta tam tìp bal mờ ờ geh ală broă lơh drơng ala tơn jŏ tơngai ơm, den tàng càr Dăk Lăk gơs tiah “ngài den kah sơn đàc – rềp den bè ờs”. Ồng Dương Quốc Tuấn, cau lam lòt nhơl mìng gơl gùng Tây Nguyên mờ jăt gah dà lềng đah Jum tàm Gùl lơgar pà git, broă gơtìp ndrờm bal tàm uă tiah tus lòt nhơl là bơta ờ pràn ngan càr Dăk Lăk dê. “Lơh sa mang den gam ờ pràn ngan, ờ hoan geh tiah nhơl tài bơta krơi is he ờ lơh sa mang ndrờm bè lơgar Thái Lan. Gam bè bơta niam den tŭ do cau năc ndrờm pơgồp jơnau đơs là ndrờm bal bè ală bơta tiah niam dềt, tài ală tiah do kung ndrờm bal lơm, ờ hềt geh bơta krơi is”.

Tơnơ̆ mờ tơmŭt bal, càr Dăk Lăk neh geh dà lềng, pờ geh bơta pràn dờng màng ai broă lòt nhơl sền brê bơnơm, um dà lềng. Mơya, khà bè priă geh kung pà gŏ dùl bơta mùl màl gam kal ke ngan. Tàm dơ̆ ơm rơlô ngai 30 nhai 4 mờ ngai 01 nhai 5 pa do, priă geh bơh lòt nhơl càr Dăk Lăk dê rơlao 520 tơmàn đong, ndrờm mờ di pơgăp nggùl khà priă mờ càr Gia Lai, mờ ndrờm mờ dùl bơnah pe càr Lâm Đồng, ndrờm mờ dùl bơnah pram càr Khánh Hoà lơh geh.

Broă dềt ờ pràn bơh gah lòt nhơl càr Dăk Lăk gam ai tơngŏ tàm bơta niam phan bơna ơm bic, tŭ mìng geh 2 hìu geh tơl khà 5 sơrmañ; 4 hìu tơl 4 sơrmañ, 9 hìu ơm geh 3 sơrmañ. Ală tiah lòt nhơl pơnrơ ngan càr Dăk Lăk dê bè Bản Đôn, Tơnao dà Lăk, Hìu prăp gàr phan kwơ yau càr, Tơnao dà Ea Kao… ndrờm ờ hoan geh pơgồp bal tàm broă gơguh lơh sa bal càr dê.

Jăt mò Nguyễn Thị Ngọc Anh, Chủ tịch Mpồl cau ùr kă bro càr Dăk Lăk pà git, lòt nhơl niam tàm brê bơnơm – mpồl bơtiàn là bơta pràn càr dê, mơya mpồl lơh sa kă bro mìng khin bơcri tàm broă lơh dềt tài ù tiah lòt nhơl mờ càr ai ơpah gam gơtìp ngui priă ù kă bro phan broă lơh drơng ala. Di lah càr Dăk Lăk ờ bơsong ală bơta gơkòl do, lòt nhơl tàm càr Dăk Lăk kal ke ngan kờñ gơguh pràn nàng lik bơdìh bơta dềt ờ pràn tŭ do dê. “Geh uă ngan broă lơh bè tiah kis, ù tiah mờ ală jơnau pal jăt geh ai gơrềng bal gam lơh gơkòl gơwèt mờ ală cau bơcri priă jơh nùs. Di lah broă dong kờl ờ tơl niam den kal ke ngan geh ală rơndăp broă lòt nhơl dờng mờ mìng geh bơtàu tơnguh jăt broă lơh dềt ờ pràn mơ”.