Pơrjum bơyai geh bơta tus bal bơh ală Sờh, gah, ală tiah, cau gĭt wă jrô broă lơh, mpồl lơh sa kă bro mờ mpồl lơh broă tàm gah lòt nhơl. Jat Jơnau rcang cih Ală jơnau neh lơh nền, Dăk Lăk pơlam gùng dà bơtàu tơnguh lòt nhơl jat gùng dà tơlir, kơnhăp kơ̆, pơgồp bal mờ prap gàr ală bơta kwơ niam chài ù tiah, phan kwơ tàm ù mờ bơt bơtàu phan bơna lòt nhơl pơn rơ bơh tiah Tây Nguyên dê. Ală mpồl phan bơna tờm geh sền gĭt là lòt nhơl ƀòn brê bơnơm, ơm rlô să, sền gĭt niam chài mpồl bơtiàn, lòt nhơl broă lơh sa suơn sre, lòt nhơl kơphê, lòt nhơl rơwas rềp mềr mờ lòt nhơl pơgồp bal mờ ù tiah niam chài cing mồng Tây Nguyên.

Tàm pơrjum bơyai, ală cau ala mat đơs là Dăk lăk geh uă bơta ƀuơn pràn bơtàu tơnguh lòt nhơl kơnờm ală brê, ñjùh dà, tơnau dà geh is bal mờ bơhiàn niam chài pơn rơ ngan bơh Tây Nguyên dê. Mơya, lòt nhơl Dăk lăk kung gam uă bơta gơ kòl bè phan bơna bơt bơtàu ờ hềt ring bal, ờ tơl phan bơna niam uă, drơng broă tàm trồ mang gam ờ hoan geh mờ ờ hềt geh mpồl lơh sa kă bro lam lài lơh geh bơta pràn lơh gơ rề uă. Càr pal lơh niam wơl phan bơna bơt bơtàu gùng lòt rê, kờp sền nền ală bơta lơi gam geh nàng bơtàu tơnguh gơnoar; ai lơh lài ală phan bơna cèng tềl lời wơl krơi is.