Drim gờñ, tŭ ală tơngai sơn rờp pa sòl tàm dòr bơnơm Đồng Bò, ồng Bùi Xuân Phước, 91 sơnam, bŭt neh khồn, rơlĕ rơlùn chu ñàng tềng đăp rùp hìn duh khoai Wa Hồ tàm hìu duh khoai dềt. Nhŭ ñàng gơ rề uă tàm ù tiah ngềt ngơ̆t, bơdìh là tơnau dà bơkào sen pa gơ mờr lì, ƀồng bi pơr hê gơ par dồ ết tàm càl bơh dà lềng dê puh tus.

Gơwèt mờ ling griăp ƀòn sơnah ƀòn Nam Nha Trang, tiah kah kơlôi Củ tịc Hồ Chí Minh mờ ồng Bùi Xuân Phước dê lơh, neh gơ gơs ù tiah mờng kwèng. Ală bi sùm tus pơs wàs sàng goh, yồng ƀồng bi, rơndăp kơƀàng cơghĕ. Ntas săp mpơs nha ro, săp dŭi yồng bồng bi gơ par niam ngan tàm jrong jơnhoa tàm gùl ƀlàng jơng dê bơnĕ bơnài bal mờ bơta ƀô thồm trầm lơh geh dùl ù tiah yŭ rơyùm mơkung rềp mềr ngan sơl..

Ồng Trần Minh Cường, ling griăp ƀòn sơnah ƀòn Nam Nha Trang pà gĭt:

 “Ling griăp ƀòn tus dong kờl Tiah kah kơlôi pơs wàs sàng goh jơh, rơndăp tăp sèng kơƀàng, cơghĕ, yồng ƀồng bi. Bol añ gam rơndăp tăp sèng rơndeh rơndồ, tiah kơryan, tam pà gùng lòt bơto pơlam. Pah nam ală ngai chờ dờng bè ngai 3/2; ngai 30/4 mờ ngai 1/5; ngai 19/5; ngai 27/7; ngai 2/9…ală mpồl cau rê tàm do gal ngan”.

Ồng Bùi Xuân Phước deh nam 1935. Bơh dềt ồng neh tus bal bơsram mờ bơto bơtê tàm mpồl ling klàng, den hơ̆ sồng gơ gơs cau ling tam lơh tàm tiah tam lơh Phú Yên. Tơnơ̆ Jơnau kĭ hơ Genève nam 1954, ồng lòt bơsram tàm tiah đah Tô dà lơgar, geh bơto bơtê bơsram đại họk mìng gah Hìu ơn prap phan kwơ yau. Tơnơ̆ hơ̆ ồng pơn jat tai soh ào ling, tus bal tam lơh tàm tiah tam lơh lơgar Lào.

Tŭ jơh tơngai lòt ling, ồng lơh broă tàm gah hìu ơn prăp phan kwơ yau mờ sùm kơlôi sơnơng mờ broă kah kơlôi Wa Hồ. Ồng neh lời jơh rlau 30 nam rài kis he dê, blơi tơrgùm tơl ù tiah, tềm pềr priă nhai, priă tềm pềr, geh tŭ tăc jơh hìu gam ơm kis tàm drà nàng geh priă jền bơt bơtàu. Tơl nai găc, tơl kơlik hìu, tơl nơm lŭ lam mut tàm hìu duh khoai ndrờm lời tềl lời wơl mpàng tê mờ dà kơl hề bơh cau ling kra dê. Tus tŭ do, tiah kah kơlôi ơnàng rlau 2 rơbô thơk vuông mờ uă bơta bè rùp Củ tịc Hồ Chí Minh, hìu duh khoai, tiah pơrjum ờs mờng, tơnau bơkào sen, suơn chi mờ ală kƀàng ràng tơlik sră nggal bè rài kis Wa Hồ dê. Pah dơ̆ tus ngai chờ dờng dà lơgar dê uă mpồl kwang bàng, kơnòm bơsram, cau ling yau jòi rê tàm do chu ñàng, pơrjum tìp mat ờs mờng.

Ồng Đặng Đình Tuân, cau ling yau ơm tàm ƀòn drà Phước Thủy, sơnah ƀòn Nam Nha Trang, cau rềp mềr mờ tiah kah kơlôi bơh ală ngai sơn rờp, pà gĭt, bơta lơh geh tiah do là cồng nha bơh nùs nhơm kờñ gơboh Wa Hồ mờ nùs nhơm kơ̆ wền ờ hoan geh ngan bơh ồng Phước dê.

“Wa Bùi Xuân Phước là làng bol tàm tiah đah Jum dà lơgar,mờ jơh ală nùs nhơm gơwèt mờ Củ tịc Hồ Chí Minh, mờ bơta gĭt wă prap gàr, ơn prap phan kwơ yau bơh tiah đah Tô tus tiah đah Jum dà lơgar jòi tơrgùm, bơt bơtàu geh tiah do. Bơh sơn rờp kal ke ngan, bòl glar ngan mơya bol añ kung kờñ mờ ki ngàm ngan wa Phước tài bơh neh bơceh lơh, jơh nùs jơh tồr, kơ̆ nùs, tơriang tơryồng. Geh uă broă lơh mìng geh dùl nă wa dê lơh lơm, mờ nùs nhơm ki ngàm Củ tịc Hồ Chí Minh neh lơh geh tiah kah kơlôi do”.

Bulah neh dờng sơnam, să jan ờ gam pràn tai, ồng Bùi Xuân Phước kung gam rềp mềr ngai mang mờ tiah kah kơlôi. Ồng sơng ka sền gàr is suơn chi, jùt rào goh tiah duh khoai, lơh niam wơl rùp hin, tơl tơrñang cih kah jơnau bơto bơh Wa Hồ dê. Uă cau tus sền kung gam gŏ cau ling yau sŏ neh kò nggui ngềt ngơ̆t kềng gah tơnau dà bơkào sen, sền rùp Wa Hồ tàm gùl trồ tiah tơlir, đơs jơnau kơ̆p kờñ geh sùm jat Wa Hồ. Ồng pà gĭt:

“Añ hừh nùs ngan. Añ neh 91 sơnam rao, kis geh ngai lơi lơh ngan drơng broă ngai hơ̆, tŭ ờ gam kis tai kung lơngăp lơngai ngan sơl tŭ lòt jat Wa Hồ. Jơnau nting bơr lời wơl là tiah kah kơlôi do ờ gŏ di tăc, ờ pà, mơya lời wơl, mblàng wơl phan lời wơl do ai rài tơnơ̆ do in”.

 Tàm gùl ală tờm chi tàm dòr bơnơm Đồng Bò, tiah kah kơlôi Củ tịc Hồ Chí Minh mờ cau ling kra, bè dùl “tiah ơn prap phan kwơ yau” bơh nùs nhơm làng bol dê gơwèt mờ Wa Hồ. Mờ tàm tơl nơm nai găc, tơl gùng lòt, kung gam lời tềl lời wơl nùs kơ̆p kờñ bơh dùl rơnàng jơh rài kis bơsram, lơh jat krơh niam nùs nhơm, bơta phi să bơh cau Đơng lam bồ dờng dê.