Tềng bồ đap hìu rơng bơh yau, kra ƀòn – cau chài ồng Rơ Châm Nha kơnđu đờng goòng bè gàr dùl bơta kah kir, tơl nau tê tup tềng che đờng, teh gơs ală sap ntas bơkah tồr ngan. Mat ồng sền tiah ngài, jat sền tơl sap ntas, bè gam yal wơl jơnau ƀòn lơgar mờ să tờm dê tŭ gam pơnu.

Hơ̆ là tŭ ồng 20 sơnam, ồng tus bal broă lơh tam lơh tàm ƀòn lơgar hơ̆ sồng mut tàm mpồl ơruh pơnu lam lài, lơh kơnòl jun pơndiang kòi phe ai mpồl ling in dră wơl bol sò tơm Mỹ. Nam 1968, ồng geh bau mờ pơn jat tai lơh broă tam lơh tàm ƀòn lơgar. Tàm ală nam tam lơh, bulah kal ke, mơya ồng Rơ Châm Nha kung gam dồ nùs jat Đảng, jat Wa Hồ, tă pơgồp bơta pràn ai broă lơh tơngklàs tiah đah jum – tơrgùm dùl dà lơgar in.

Ồng Rơ Châm Nha pà git: “Ală nam 1961 – 1962, añ là dùl nă klau pơnu ƀòn dê. Tus nam 1963 añ geh tơmut Đoàn mờ tus nam 1965 añ geh jàu lơh cau lam bồ mpồl tam lơh. Klò ngai lơh broă ơruh pơnu tàm ƀòn bè ờs, trồ mang den lam mpồl ling lòt cuh ală pôs đồng bol sò tơm dê. Kwang bàng mờ mpồl ling tŭ hơ̆ dilah ờ geh cau lam gùng den kal ke ngan lòt rê. Tài he là cau tàm bòn, git loh bơta bol sò tơm sơ gràm phà mờ anih ơm mpồn bol sò tơm dê tềng lơi, bơnơm tềng lơi den tàng lam mpồl ling lòt cuh pôs đồng bol sò tơm dê ndrờm gơtùi lơm”.

Kah bè ngai 30/4/1975 – tŭ tơngai tơngklàs tiah đah jum dà lơgar – mat ồng Rơ Châm Nha dê gơlơh àng sơdah krơi is, sap ñŏ kung gơ jat bè tơl tềl huañ muh mat dê. Ồng sồr sau Rơ Châm Tứ teh đờng T’rưng nàng bal mờ ồng nhơl đờng goòng, teh bơrlŭ jơnau đơs crih gờm chờ dà lơgar tơngklàs: “Bơta chờ hờp bềng lìu ngan tŭ dà lơgar geh tơngklàs. Tơnơ̆ tŭ he tam lơh jai mờ bol sò tơm, dà lơgar geh tơngklàs, tơl nă cau bơh cau kra, cau kơnòm, ơruh pơnu, cau lơi ndrờm chờ hờp lơm gơ lơh bè geh hồ che kơt, chờ hờp chờ hờn bal mờ ƀòn lơgar. Lơh jat jơnau hòi jà tơng gơs ală mpồl ơruh pơnu mblàng yal, dùl mpồl lòt lơh đơs crih tamya, bơyai lơh pơn jờng srơh hòi jà, dùl mpồl lòt lơh sa, bơt bơtàu, gàr kơ̆ wơl dà lơgar, ƀòn lơgar. Chờ hờp ngan tài geh khat gơboh, dròng cing, tamya xoang jơh nùs”.

Gơ wèt mờ kra ƀòn – cau chài ồng Rơ Châm Nha, geh teh đờng, dròng cing tàm dơ̆ tơngkah kir sơnrai 51 nam Ngai tơngklàs tiah đah jum, tơrgùm dùl dà lơgar là tŭ tơngai wil tơl ngan rlau jơh, tiah mờ sap ntas gơ bơrlŭ bal mờ bơta pơn yờ să ƀòn tờm, dà lơgar tam gơl pa.