Gơwèt mờ làng bol Tây Nguyên, bulah ờ hềt dùl dơ̆ geh tìp Wa Hồ mơya tàm nùs nhơm tơl nă cau den rùp hin Wa Hồ mờ ală jơnau yal bè Wa Hồ kung gam sùm cih kah. Tàm tiah Pôs đồng kăc màng Krông Bông, ală jơnau đơs, broă lơh bơh Wa Hồ dê sùm geh làng bol lơh ngan ngồn tàm rài kis tŭ do. Bi Y Phang Byă, ơm tàm ƀòn Krông, xã Ea Trul, kơnhoàl Krông Bông pà gĭt: “Añ deh tŭ dà lơgar neh lơngăp lơngai, añ ờ hềt tìp Wa Hồ, mơya tàm rài kis den să tờm añ kờñ gơboh ngan Wa tài bơh Wa là dùl nă kwang đơng lam bồ dờng màng mờ geh gơnoar dờng. Tài bơh kờñ bơsram mờ lơh jat jơnau sồr Wa Hồ dê den tàm tơl broă lơh pah ngai kung bè tàm broă ơm kis tam bơh bơr mờ làng bol, añ ndrờm pơnđơl pràn lơh ngan bơsram jăt Wa Hồ bơh ală bơta dềt rơ hền ngan rlau jơh, pơnđơl pràn lơh ngan bơtàu tơnguh lơh sa hìu bơnhă, pơgồp dà kơl hề bơt bơtàu ƀòn lơgar, dong kờl ală cau kal ke tàm ƀòn lơgar”.

Bal mờ làng bol kis tàm gùt lơgar wă rò satềp Lơngăp lơngai krơi is Dà lơgar, tàm ală ngai do, làng bol kòn cau Bơnhàr kis tàm ală ƀòn tàm càr Gia Lai geh nùs nhơm kah tus Wa Hồ, do là cau neh cèng geh bơta lơngăp lơngai krơi is Dà lơgar Việt Nam dê. Ồng Yơu kis tàm ƀòn Ktu, xã Kon Gang, kơnhoàl Đăk Đoa yal: “Đơs bè Wa Hồ, bơh cau dềt tus cau dờng ờ geh cau lơi ờ git. Wa Hồ là dùl nă cau geh bồ tơngoh kơlôi sơnơng dờng ơnàng tàm dùl nă kòn bơnus bè ờs dê, là dùl nă kwang đơng lam jăk chài ngan dà lơgar he dê. Bŭ lah ờ hềt tŭ lơi tìp, tàm nùs bơl tơl nă cau sùm gŏ geh Wa Hồ, geh Wa Hồ sền gròi bơh tơl broă lơh. Mờ bơh tŭ hơ̆, cau lơi kung lơh ngan bơsram mờ đờm jăt bal bơta niam bơh Wa dê, sùm kah jơnau Wa nting bè lơh sa. Bơh tŭ hơ̆ ai geh bơta pràn tàm broă pơrlòng kờñ gơboh mờ dà lơgar mờ ală broă lơh mùl màl bè lơh kòi sre bàr kàl, tam kơphe geh cồng nha uă, niam, tam klăc bal dùl nùs... mờ ală nam bol añ kung bơyai lơh tam chi “Rài rài kah Wa Hồ”.