Mờ tơngume “Mpong sùm jơnau đơs crih Hồ Chí Minh”, broă lơh đơs crih tamya nàng kờñ tơngkah rơnàng tŭ do ờ huĭ dà kơl hề dờng màng bơh Củ tịc Hồ Chí Minh dê. Broă lơh đơs crih tamya geh lơh mờ 3 bơnah “Jơnau đơs crih jờng rơ jơnau song”, “Pơ dơng Bác Hồ in rbô bơkàu yal cồng nha” mờ “Ƀòn dờng Hồ Chí Minh- Gơguh jak, tam gơl pa, nùs nhơm niam”.

Mờ ală jơnau đơs crih bè “Tềl jơng tềng hờ đap”, “Cau Kộng sản sơn rờp”, “Sap đơs crih tàm gùl brê Pác Bó”, “Pha lin Điện Biên”, “Nùs nhơm Bác Hồ lơh àng gơ crà rài kis he”, “Bác Hồ gam mờ bol sau lòt ling”, “Wèt hờ Sài Gòn”, “Bè geh Bác Hồ tàm ngai chờ pha lin dờng”, “Sap đơs crih bơh ƀòn dờng cèng mat sơnđan Bác Hồ”, ală jơnau đơs crih niam ngan neh ai gŏ wơl bơta bòl glar, kal ke bơh Bác Hồ dê tàm lơgar ndai tus tŭ rê wơl hờ lơgar tam lơh, sền sră cih jơnau yal bơr lơngap lơngai is, crơng gơs lơgar Việt Nam Zân củ Kộng hòa.