Bơh ƀlàng hìu duh khoai ƀòn Lạc Sơn, săp dròng cing mpong săp bơh tàm tŭ trồ rơ̆p rìng àng drim, bè jơnau hòi tơrgùm, hòi jà làng bol tus wơl mờ broă lơh yàng kwơ màng ngan tơnơ̆ Satềp. Cau kra, cau kơnòm tàm phan soh ờs mờng niam neh geh tus tơl, rơcang mŭt tàm tŭ sơn đờm kàl lơh sa pa. Jăt mờ bơhiàn ờs mờng kòn cau Mường dê, tờm gơnơng geh tơn tào bơh ngai 27 nhai 12 jăt tơngai he, ai tơngŏ tŭ ơm rơlô Satềp. Tŭ tơrmù tờm gơnơng kung là tŭ tơn jơh ală ngai chờ wă rò nam pa, làng bol tus wơl mờ broă lơh tàm suơn tàm sre. Lơh yàng tơrmù tờm gơnơng tài bè hơ̆ den tàng geh kwơ màng tàm broă lơh geh tơngai lơh broă pa, tơnguh nùs nhơm pin dờn tàm dùl nam lơh sa geh ƀuơn.

Cau chài Bùi Văn Thành, đơng lam broă lơh yàng tàm hìu duh khoai Lạc Sơn pà git, lơh yàng tơrmù tờm gơnơng kờñ geh jơnau kơ̆p gơn bè bơta lơngăp lơngai, pràn kơl dang mờ hờm ram. “Dan mờ ù tiah ƀòn do geh lơngăp lơngai pràn kơl dang, Dà lơgar bơtàu tơnguh, làng bol pas gơs pràn kơl dang. Làng bol kòn cau Mường tàm ƀòn dan bồ nam tơrmù tờm gơnơng, lik lơh broă tàm sre den lơ-òr sre lơh kòi, tàm suơn den tam tơngời, tam bùm lơh bè lơi nàng hòn gơs niam, bañ gơtìp tu kòp, kòi den ờ gơtùi tu sa aniai; mờ ai làng bol kòn cau Mường in là ờ geh cau gơtìp chơ̆t jê, mìng geh broă rò ƀan, jun bơrtơu, ƀòn lơgar geh lơngăp lơngai”.

Tàm sơnah ƀòn Tân Lập tŭ do geh 7 hìu duh khoai ƀòn bơh ală mpồl kòn cau Mường dê ntrờn ơm kis bơh ală càr đah Tô dà lơgar. Bơh ngai 7 tus ngai 10 nhai dùl jăt tơngai he, tơl hìu duh khoai ƀòn geh bơyai lơh sơn đờm lòt lơh broă, ai geh nùs nhơm niam chài mpồl bơtiàn chờ hờp tàm ală ngai bồ nam pa dê. Mò Bùi Thị Hợi, tàm mpồl ƀòn drà 2B, sơnah ƀòn Tân Lập pà git, làng bol rơcang ai broă lơh yàng bơh uă ngai lài, mờ jơnau kơ̆p kờñ gàr niam bơhiàn ờs mờng nàng ală rơnàng tơnơ̆ do in. “Tŭ he lơh bè do den he rơ̆p ai oh kòn, kòn sao in gŏ bơhiàn ờs mờng kòn cau Mường dê bè lơi nàng oh kòn kòn sao in git, nàng tơnơ̆ do rơ̆p bơto tai ai oh kòn kòn sao in tus sùm tàm rơnàng tơnơ̆ do”.

Tơnơ̆ bơnah lơh yàng là bơnah lơh chờ. To đúm, do là dùl jơnau nhơl krơi is ngan bơh cau Mường dê gơhòi gal ngan làng bol tus bal. ală plai đúm geh to tàm săp drao chờ, ai tơngŏ nùs nhơm kơ̆p gơn kờñ deh dùh, hờm ram. Duĭ che, hào ñjrong tơngi, pờng sur ù, kŭp ơda… lơh geh nùs nhơm chờ tềng hìu duh khoai. Ală nam pa do, lơh chờ gam geh broă tus bal bơh cau năc rềp ngài, tàm hơ̆ geh cau năc tus bơh ală lơgar. Ồng Mark Schmidt, cau năc lòt nhơl tus bơh lơgar Canada yal bè nùs nhơm bơh dơ̆ sơnrờp tus bal mờ lơh chờ do: “Añ chờ hờp ngan mờ pơnyờ să ngan geh tus bal mờ broă lơh chờ do. Do là dùl broă lơh chờ niam bơnĕ ngan pơgồp bal mpồl bơtiàn, hìu nhă bal mờ dà lơgar. Lơh chờ do pơn jờng rài lài do, tŭ do mờ wèt tus rơnàng tơnơ̆ do niam bơnĕ. Añ kơ̆p kờñ geh bơta pas gơs bơh dà lơgar mờ bơta gơboh gơbài bơh làng bol dê. Do là dùl bơta niam bơnĕ ngan, mờ añ kơ̆p kờñ añ gơtùi sền gŏ uă lơh chờ bè do rơlao tai”.

Lơh chờ mŭt lơh broă geh mpồl bơtiàn kòn cau Mường tàm càr Dăk Lăk lơh geh sùm tàm uă nam do, nàng prăp gàr bơta niam chài bơh mpồl bơtiàn tàm ƀòn ơm kis pa dê. Broă lơh tơrmù tờm gơnơng tơn jơh ală ngai bồ nam pa, pờ geh kàl lơh sa pa mờ nùs nhơm pin dờn, lơh ngan mờ kơ̆p kờñ bè dùl nam pa lơh sa geh ƀuơn, rài kis hờm ram.