Bơh 6 jơ mang, tŭ ală gơl gùng àng đèng, ù tiah gùng mang Drà dềt sơn đờm nggồr nggàc. Rlau 60 ki-ốt dồ ròt pờ đèng àng, ràng tac li la ală bơta phan sa, dà hùc, phan bơkah tiơng pơn rơ ƀòn lơgar dê mờ phan kir sơnrai. Nùs nhơm lòt nhơl sơnam pa, blơi phan bồ nam duh hồl ngan, ờ mìng cèng wơl bơta chờ hờp ai làng bol in mờ gam pơgồp bơnah chồl tơnguh broă lơh kă bro phan, broă drơng ala lòt nhơl trồ mang tàm ƀòn lơgar. Oh Lê Trúc Thảo Nguyên chờ hờp yal: “Oh rơ wah tus gùng mang Drà dềt do, tài do là drà sơn rờp pờ tàm sơnah ƀòn Pleiku, ù tiah tàm do ơnàng ngan, chờ hờp ngan, ală anih ràng tac phan ndrờm niam ngan bal mờ uă bơta phan niam, phan sa bơkah”.

Ờ mìng ală bơyô kơnòm să, uă hìu bơnhă kung rơ wah tiah do lơh anih tus bồ sơnam pa. Bi Võ Thị Thu Diễm – ơm tàm sơnah ƀòn Diên Hồng pà git: “Añ tus gùng mang Drà dềt den sền gŏ tàm do gal ngan cau, chờ hờp ngan, nggồr nggàc ngan. Phan sa den li la, di ngan mờ ală oh dềt, ală cau kơnòm să mờ hìu bơnhă tus trăng sền. Gùng mang geh bơka niam ngan”.

Pa ai lơh broă, mơya gùng mang Drà dềt neh sơrbac mhar gơ gơs là bơta tờm tàm broă rơndap lơh bơtàu tơnguh lơh sa mang bơh ƀòn lơgar dê. Is ồn tàm ală ngai bồ sơnam pa, khà nac gơguh uă dong broă lơh tac bro duh hồl rlau, cèng bal mờ bơta kơp kơnờm bè dùl nam pa lơh sa  ƀuơn ƀuài.

Tàm dùl anih tac phan sa ờs mờng, bi Ksor H’Khal tac ală bơta phan sa bơkah tiơng pơn rơ làng bol kòn cau Jarai dê bè piang prùh tàm ding đơr, iar buh, poac sur buh, poac kơnrồ buh, nha bùm blàng wơr mờ blơn bơtang, rơ tồñ. Bi chờ hờp pà git: “Mờ khà nac lòt nhơl gal bè do den añ chờ hờp ngan tài geh nac lòt nhơl git tus phan sa bơkah tiơng pơn rơ ƀòn lơgar Gia Lai dê kung bè phan sa làng bol kòn cau Jarai dê. Bol hi pơn yờ să ngan tài càr lơh gơlik bơta niam nàng yal tơngggit ală bơta phan sa bơkah ƀòn lơgar he dê, bè jŏ jòng den làng bol rơp git tus he uă rlau”.

Gùng mang Drà dềt geh lơh rềp dà croh Hội Phú, dùl ù tiah niam tiơng pơn rơ tàm gùl tiah drà Pleiku, mờ kung là tiah làng bol ơm kis jŏ rài, gơ jat bal mờ uă tềl kah yau lài mờ ngai tơngklàs. Ồng Đặng Toàn Thắng – Củ tịc Anih duh broă Làng bol sơnah ƀòn Pleiku pà git: “Pờ gùng lòt jơng tàm trồ mang nàng bơtàu tơnguh lơh sa lòt nhơl tàm trồ mang jat ală jơnau kờñ bơh Jơnau lơh nền tàm pơrjum dờng Đảng ƀộ càr Gia Lai mờ Jơnau lơh nền tàm pơrjum dờng Đảng ƀộ bơh sơnah ƀòn Pleiku dê. Bơh hơ̆ lơh gơlik ù tiah, anih tus nàng nac lòt nhơl gùt lơgar mờ càr Gia Lai đơs bal rơp geh ù tiah nàng lòt sền tàm trồ mang gơ wèt mờ sơnah ƀòn Pleiku đơs is mờ tiah dơlam ƀòn dờng Pleiku yau đơs bal”.

Gùng mang Drà dềt gal cau tus nggùl mang tơn. Do ờ mìng là tiah blơi phan, nhơl ñŏ mờ gam là anih tàm bơrkuăt bal mpồl bơtiàn, yal tơnggit niam chài bơh jŏ tàm ƀòn lơgar mờ chồl tơnguh lơh sa broă drơng ala bơh ƀòn bơnơm Pleiku dê. Tàm bơta trồ tiah sơnam pa tiah kơh bơnơm dê, rài kis pa gam duh hồl, hơ pơrgon dùl nam uă tam gơl niam.