Sền gŏ tàm ƀlàng dà lềng Quy Nhơn, tàm ală ngai do, cau năc lòt nhơl tus gal di mơ. Tàm tiah ƀlàng um, bi Hồ Văn Thắng, cau lơh broă dong kờl hìu năc ơm Hải Âu, sùm tàm bơta tŭ lơi kung rơcang lài, tê cèng phan pơrđồng, măt tŭ lơi kung sền tàm dà lềng. Gơwèt mờ bi, broă lơh do ờ gơtùi ờ sền gròi, tài rềs àr di gơlan gơtìp tŭ lơi mờ he ờ git lài. “Añ là cau lơh broă dong kờl, cau năc um hờ bơdìh dà lềng tàm tiah đah añ den kung pal sền gròi, pal sền gròi cau năc um bè lơi nàng di lah gơtìp geh bơta lơi pal mù dong kờl cau năc di tŭ, sơm mhar di tŭ”.

Ờ mìng tàm Quy Nhơn, tàm Tiah lòt nhơl Kỳ Co, khà cau năc lòt nhơl kung gơguh uă, geh bal tàm tŭ trồ tơngai duh tàm nggùl ngai. Khà cau dong klàs geh sồr lik lơh broă gal rơlao, cano sùm geh tàm bơta rơcang lài. Cau năc lòt nhơl geh bơto sồr bañ re ngài ir mờ tiah geh phan pơrđồng. Bi Lê Thanh Hùng Anh, cau lơh broă dong kờl tàm do pà git, tŭ khà cau năc sơlơ gal, bơta kal ke lơh broă sơlơ uă, den tàng pal tơrgùm nùs nhơm uă ngan. “Um dà lềng tàm Kỳ Co geh ai ală bă tiah geh phan pơrđồng den rơ̆p lơngăp lơngai, ală kơnòm dềt den um rềp tềng gah, di lah um ngài den hòi nàng yal rê hờ gờl. Di lah cau dờng tus tàm tiah dà jrô rơlao mờ bồ ñhiòng hòr den kung hòi nàng yal cau năc in rê hờ gờl. Di lah geh jơnau yal mhar rơ̆p ngui mô tô dà bal mờ phan lơh broă nàng yal ală cau in tus dong kờl bal”.

Broă geh sùm cau sền gròi bơh mpồl dong kờl dê, bal mờ phan pơrđồng gùt dar, neh lơh nùs iang nùs cau năc lòt nhơl in. Bi Nguyễn Hoàng Anh, cau năc lòt nhơl tus bơh Hà Nội đơs niam broă sền gàr lơngăp lơngai tàm do dê. “Añ gŏ gơlơh nền nòn ngan, jăk chài ngan, uă tiah ờ geh mpồl dong kờl bè do ờ, tàm do geh mpồl lơh broă dong kờl bal mờ phan pơrđồng tàm dà lềng tai den tàng añ gŏ gơlơh iang nùs mờ lơngăp lơngai ngan di lah um re tàm dà lềng”.

Jăt jơnau geh gŏ, ală tiah lòt nhơl dà lềng bè Quy Nhơn, Kỳ Co, Eo Gió, Nhơn Lý ha là Bãi Xép gam geh gal làng bol bal mờ cau năc tus. Mơya, bơta di gơlan gơtìp bŭ dà kung di gơlan gam gơtìp tŭ geh ờ uă cau gam ờ sền gròi, re ngài mờ tiah lơngăp lơngai ha là tus tàm tiah geh ñhiòng dà hòr ngài mờ ù gờl. Tềng đăp mờ bơta mùl màl do, gơnoar atbồ sàh sơnah ƀòn neh pơgồp bal mờ ală mpồl lơh broă geh gơnoar tơnguh broă mblàng yal, bơto sồr mờ ai mpồl cau lơh broă ơm sền gròi tàm uă tiah.

Ồng Phan Tấn Hoàng, Phó Củ tịc Duh broă sùm Anih duh broă làng bol sơnah ƀòn Quy Nhơn pà git, sơnah ƀòn do neh lơh sir mpồl lơh broă dong kờl mờ tơl phan lơh broă, bơyai lơh sền gròi jăt mpồl jơ di pal, mờ pơn jăt tai tơnguh uă bơta pràn jăt sền. “Bŭ lah là geh mpồl lơh broă dong klàs mờ gùng dà broă lơh dong klàs mơya kung gam lam sồr làng bol um tàm dà lềng pal soh phan pơrđồng tŭ re ngài nàng gàr niam lơngăp lơngai. Bơdìh hơ̆ tai, sơnah ƀòn kung gam lơh broă mờ mpồl pơlam sền nàng lơh crăp camera sền gròi pơgồp bal mờ rơcang pleh bŭ dà. Tŭ gŏ gờñ bơta di gơlan gơtìp mờ ală cau năc tus mờ Quy Nhơn den phan yal geh yal lài mơ nàng geh gùng dà broă lơh di tŭ”.

Tàm kấp càr, broă gàr niam lơngăp lơngai ai cau năc lòt nhơl in kung geh sồr pràn. Củ tịc Anih duh broă làng bol càr Gia Lai neh sồr ală gah, mpồl lơh broă, ală sàh sơnah ƀòn tơnguh broă lòt sền, jăt sền broă nhơl chờ tàm tiah dà. Ồng Bùi Trung Hiếu, Phó Kwang lam bồ Sờh Niam chài, tàp pràn să jan mờ Lòt nhơl càr Gia Lai pà git, broă lơh geh mpồl sơndră mhar, bal mờ broă lòt sền, sền gròi nền nòn rơ̆p là gùng dà broă lơh tờm tàm kàl lòt nhơl uă dê. “Củ tịc Anih duh broă Làng bol càr Gia Lai neh geh jơnau sồr sền gròi tus mờ lơngăp lơngai cau năc tus lòt nhơl sền tàm tiah do. Sờh Niam chài, Tàp pràn să jan mờ Lòt nhơl neh pơgồp bal nền nòn mờ ală gah lơh broă, ală sàh sơnah ƀòn lòt sền ală phan sền gròi nàng niam cau năc lòt nhơl in tŭ um dà lềng, lơh bè lơi tàm kàl rơlôi bơkang nam do cau năc tus mờ tiah dà lềng càr Gia Lai geh gàr niam tàm nùs nhơm chờ hờp, pơrài bồ tơngoh”.

Mùl màl pà gŏ, bơdìh mờ broă lơh ngan bơh mpồl lơh broă geh gơnoar dê, jơnau git wă bơh tơl nă làng bol bal mờ cau năc kung gam là bơta tờm. Broă lơh jăt ală jơnau bơto sồr, bañ re ngài mờ tiah niam lơngăp lơngai, rơcang ngui ào pơrđồng tŭ kờñ den rơ̆p pơgồp bal tàm broă tơrmù ờ uă ngan ală rềs àr, nàng tơl dơ̆ lòt tus mờ dà lềng sùm là ală broă lơh niam mờ lơngăp lơngai.