Tàm uă ƀòn tàm càr Lâm Đồng, săp dròng cing sùm mpong tàm ală dơ̆ pơrjum mpồl bơtiàn; phan soh ờs mờng geh lam soh tàm rài kis bè ờs pah ngai; ală jơnau đơs pơn đik, broă tàñ ồi yau, tàñ sơ̆, tàñ nir ha là lơh yàng tàm rài kis kung gam geh ală rơnàng prăp gàr mờ bơto nàng ală oh kòn, kòn sao in git. Niam chài ală jơi bơtiàn kòn cau kis bơh yau tàm do bè: K’Ho, Mạ, Cru, Mnông, Prum... tàm càr Lâm Đồng ờ bic lơhă tàm rài lài do, mờ geh gŏ ngan tàm tơl dơ̆ sào sa, suơn mìr, tàm broă lơh mờ ù tiah geh is bal mờ mpồl bơtiàn dê.

Cau chài Ka Duýp, tàm sàh Đinh Trang Thượng, pà git: "Là cau K’ Ho, añ gŏ tŭ do di lah ờ prăp gàr bơta niam chài jơi bơtiàn dê den tơnơ̆ do rơ̆p roh jơh. Sền gŏ gơnoar do, tàm Đinh Trang Thượng, añ drơng broă lơh dùl Mpồl dròng cing kơnòm bơsram. Bơh ală broă lơh dềt bơh ală kơnòm bơsram dê, kung bè dùl tơlut ồs nàng ală bol oh in git wă bơta kwơ niam chài, git prăp gàr mờ sền gàr. Bơdìh hơ̆ tai, tàm Đinh Trang Thượng gam geh uă ngan mpồl lơh broă ndai, mờ jơnau kờñ tờm ngan là nàng prăp gàr bơta niam chài ờs mờng kòn cau K’ Ho dê”.

Bi Kră Jañ K’ Druynhs, dùl nă cau chài gam kơnòm să kòn cau K’ Ho tàm sơnah ƀòn Lang Biang – Dà Làc pà git, bi bal mờ di pơgăp 20 nă cau tàm mpồl là ală ùr ơruh klao pơnu tềng jơng bơnơm Lang Biang tŭ do gam tus bal lơh broă tàm tiah lòt nhơl Lang Biang Land. Tàm tơngu me ală jơnau dròng cing, săp tamya ờs mờng, mpồl kung ndrờm bal pơgồp tai ờ uă bơta pa nàng cèng geh nùs nhơm đềt mềr, niam rơlao ai cau năc lòt nhơl in, mơya kung gam geh nùs nhơm niam chài bơh yau sơl. Ală cau tàm mpồl geh lơh broă bal sùm tàm tiah lòt nhơl mờ 3 dơ̆ lơh pah ngai, kơnờm mờ hơ̆ geh priă kơl jăp rơlao.

Ồng K’ Keo, tàm thôn Hàng Làng, sàh Di Linh, càr Lâm Đồng pà git, ală nam do, Đảng mờ Dà lơgar sùm ai tơl bơta niam nàng dong kờl làng bol lơh geh wơl ală broă lơh niam chài ờs mờng. Ờ mìng tàm ƀòn lơgar, cing mồng gam geh ai tàm broă bơto tàm ală hìu bơsram, mờ bơsram dròng tàm uă mpồl lơh broă niam chài. Kơnờm mờ hơ̆, den tàng ngai sơlơ geh uă ùr ơruh klao pơnu mờ kơnòm pa tào tus bal bơsram dròng cing. Jăt ồng K’ Keo, broă bơyai lơh chờ gờm kòi pa là dơ̆ kwơ màng ngan nàng oh kòn kòn sao pơn jăt tai, ngui bơta niam chài jơi bơtiàn dê. “Să tờm añ là kra ƀòn, cau geh bơngă pin dờn tàm tiah làng bol jơi bơtiàn ờ gal cau, den tàng kờñ ngan lơh geh wơl bơta niam chài krơi is do, nàng prăp gàr mờ bơto ală oh kòn kòn sao in tơnơ̆ do in bơsram. Di lah geh tơl bơta niam rơlao tai den lơh, lơh geh wơl nàng pơn jăt tai prăp gàr niam chài cing mồng jơi bơtiàn dê, tus bal mờ mpồl bơtiàn ală jơi bơtiàn oh mi”.

Tơnơ̆ mờ tŭ tơmŭt bal càr Lâm Đồng, Dăk Nông mờ Bình Thuận, càr Lâm Đồng pa neh mhar lơh uă gùng dà broă lơh mùl màl nàng prăp gàr niam chài mờ bơtàu tơnguh kơl jăp. Ală broă lơh lòt nhơl mpồl bơtiàn, bơta niam chài cing mồng, ơdŭ bơto broă lơh ờs mờng geh lam sồr bơtàu tơnguh tơn tàm ƀòn lơgar. Làng bol gơs cau tờm prăp gàr, sền gàr niam chài, mờ lơh geh broă lơh kơl jăp bơh tàm phan lời wơl niam chài dê. Mùl màl pà gŏ, broă ai bơta niam chài bơh yau rê wơl mờ rài kis pah ngai ờ mìng pơgồp bal tàm broă prăp gàr ală bơta kwơ bơh mò ồng lời wơl, mờ gam ai tơngŏ bơta niam chài krơi is geh tàm càr Lâm Đồng dê tàm ñhiòng hòr tơrgùm bal. Do mùl màl là bơta tờm kwơ màng nàng bơta niam chài ală jơi bơtiàn bơh yau geh prăp gàr kơl jăp, kis mờ tŭ do mờ lơh geh uă tus rài tơnơ̆ do in.