Cau chài ồng Y Dŭ Êban yal, ờ git bơh tŭ lơi, sap ntas cing neh gơ mut tàm bồ tơngoh ồng dê. Ồng mìng kah là, ồng neh dờng tàm sap ntas cing bơh ồng mò dê mpong ntas bè sap ñrùh dà hòr, bè sap sềm nrau tàm brê. Tŭ gam là kơnòm dềt, ồng neh geh gơ rờm să jan tàm sap ntas cing bơh dơ̆ lơh chờ, kàl sa nam hùc nhai dê mờ bơta chài mùl geh bơh tŭ deh, ồng neh git ală sap jơnau cing mờ ală sap đơs pơnđik lơ bơn niam: “Añ iat uă jơnau cing tŭ tàm ƀòn geh ală dơ̆ lơh chờ mờ sap ntas cing neh gơ mut tàm bồ tơngoh añ dê, tài añ sùm nggui rềp mpồl dròng cing nàng git. Uă wa, uă kòñ neh ai añ dròng mờ añ kờñ ngan mờ bơsram jat. Añ git dròng cing tŭ gam pơnu. Uă cau chài gŏ añ git dròng cing den tàng neh ai añ mut tàm mpồl mờ bơto wơl ală cau ndai in dròng cing”.

Bơh yô yau, tàm ală dơ̆ lơh chờ mờ broă lơh niam chài mpồl bơtiàn, sap ntas cing là dang che tàm tơrbŏ kòn bơnus mờ brah yàng, tàm tơrbŏ tơl nă cau tàm ƀòn lơgar. Bè hơ̆ den tàng, sap ntas cing là huềng ƀòn dê. Tŭ sền gŏ bơta niam chài cing mồng gam rơhời gơtìp roh huĭ, cau chài ồng Y Dŭ Êban neh lời tŭ tơngai, dà kơl hề nàng pờ ơdŭ bơto wơl ai kòn sau tàm ƀòn in. Uă cau kơnòm să tàm ƀòn neh git dròng cing mờ lòt lơh tàm uă tiah. Cau chài ồng Y Dŭ Êban yal: “Tàm ƀòn den añ là cau lơh niam wơl cing, bơto dròng cing ai ală cau chài tàm ƀòn in nàng bal mờ gơp gàr sap ntas cing mồng mờ lòt lơh tàm tiah ndai den añ sùm lòt bal mờ mpồl dròng cing. Añ kung bơto ală sau dềt pơgap bơh 15 tus 16 sơnam in mờ mpồl cing kơnòm dềt do kung neh geh tŭ lòt dròng cing tiah ndai 2, 3 dơ̆ bloh”.

Nàng gơtùi geh ală cồng nha do, cau chài ồng Y Dŭ Êban ờ ngòt bòl glar, kal ke, bal mờ ală cau chài tàm ƀòn tàp wơl ală jơnau dròng cing, lời uă tŭ tơngai nàng bơto ală kơnòm dềt in, ală ngai rlô bơkang là tŭ tơngai dipal ngan rlau jơh. Ồng gam lòt teh tơl mpồng hìu, hòi jà mè bèp mờ ală oh dềt lòt bơsram wil tơl. Bơh bơta jơh nùs gàr sap ntas cing mồng, tơmut huềng he tàm sap ntas cing mồng den tàng cau chài ồng Y Dŭ Êban hơ̆ sồng gơtùi lơh geh cồng nha crih crài là geh uă cau kơnòm să kờñ sap ntas cing mồng kòn cau he dê: “Ơdŭ bơto dròng cing kơnòm dềt in añ neh geh tŭ tam pà gơs 2 ơdŭ là A mờ B. Tŭ do, ală sau lòt bơsram wơl tàm hìu bơsram den tàng kung kal ke ngan kờñ rơ wah tŭ tơngai dipal. Añ kơlôi rơcang ngan lơh bè lơi nàng cau kơnòm să in git dròng cing, ờ lơh roh bơta niam chài jơi bơtiàn he dê. Tàm bơta tam gơl bơta mpồl bơtiàn dê, ală bơta niam chài kung rơhời roh tĕ jơh. Añ kơp kờñ là tŭ he gam pràn den gam gơtùi bơto wơl cau kơnòm să in”.

Cing mồng gơ wèt mờ cau Rơđê ờ mìng là đờng goòng, mờ gam là phan kuơmàng geh tàm gơl mờ uă rơpu, kơnrồ, là phan ndu gơn rơh hìu bơnhă dê. Sap cing chờ hờp jat rài kis bơh klau pơnu, ùr ơruh Rơđê dê, bơh tŭ pa deh tus tŭ sang rài. Cau chài ồng Y Dŭ Êban đơs bơta kơp kờñ ồng dê nàng sap cing mồng gam mpong ntas sùm den pal geh bơta pơgồp bal, dùl nùs bal bơh làng bol tàm ƀòn mờ gơnoar atbồ ală kâp dê: “Dilah mìng dùl hìu bơnhă añ lơh nàng bơto wơl den rơp ờ gơtùi gàr sap cing kòn cau he dê. Pal geh bơta lòt bal bơh cau atbồ ƀòn, gơnoar atbồ dê. Geh bơta pơgồp bal bơh mpồl bơtiàn mờ cau chài bè bol hi. Bol hi kơp kờñ ală sau rơp git mờ sền dờng màng, sền gàr bơta niam chài do jơi bơtiàn he dê”.

Mờ bơta git wă bè sap cing, lơh niam wơl cing bal mờ bơta tă pơgồp dờng màng ngan tàm broă lơh prap gàr, sền gàr, ngui cing bơh cau Rơđê dê, cau chài ồng Y Dŭ Êban neh dờp geh uă sră jờng rơ bơh ală kâp dê. Hơ̆ là ală phan ƀàn dipal ngan, pơn jờng nùs nhơm ală cau chài bè ồng pơn jat tai lơh gơ rề bơta kờñ gơboh, nàng sap cing in rơp mpong ntas sùm.