Ồng A Nuă, kra ƀòn ƀòn Ea Mao, xã Ea Yiêng, kơnhoàl Krông Păk, càr Dăk Lăk kah wơl, pơgap mờ do rlau 50 nam, tam lơh cui rơcai ngan, dùl mpồl cau Sơdàng pal ntrờn dô bơh kơnhoàl Đăk Tô, càr Kon Tum tus càr Dăk Lăk ngài rlau 300 kơi sồ gùng brê. Tus tŭ do neh mờr 50 nam tơnơ̆ ngai tơngklàs, Dăk Lăk neh gơ gơs ƀòn tờm dơ̆ 2 bơh cau Sơdàng dê. Ông A Nuă yal: Rài kis geh git nđờ bơta tam gơl, ală jơnau kah kir bè dùl tŭ tơngai rềp mềr mờ brê bơnơm, mờ suơn mìr ờ tŭ lơi gơtùi huĭ: “Tŭ gam ơm tàm ƀòn yau den bol hi kis rềp mềr mờ brê bơnơm, ngai pah ngai lòt lơh mìr, mut tàm brê pik biap, plai đo, geh tŭ geh uă ngan phan bè gòl, biap brê… Broă trŭ gơm phan sa tŭ hơ̆ añ gam kah là ồng mò mờng ngui ding gle đơr bè glah tŭ do, tŭ hơ̆, bol hi mìng ờ geh boh sa. Tàm ală hìu bơnhă mờ ờ geh boh den pal lòt jơng tus lơgar Lào nàng ƀuơn blơi halà pơl mờ uar, iar, kờñ jòi tờm chi sơnơm bè sa ñân den kung pal lòt tus lơgar Lào hơ̆ sồng geh, tài ƀòn yau rềp mờ lơgar Lào. Trŭ gơm phan sa tŭ hơ̆ den uă ngan là ngui ding gle đơr, tàm brê geh uă phan tĕ geh is, biap bơkah, plai lơngồt mùl geh den tàng phan sa cau Sơdàng dê tŭ hơ̆ li la ngan, kơnờm geh brê bơnơm ai pà”.

Tàm xã Ea Yiêng, kơnhoàl Krông Păk, càr Dăk Lăk, tŭ do geh mờr 1 rbô 360 hìu bơnhă, tàm hơ̆ kòn cau Sơdàng geh 1 rbô 300 hìu bơnhă mờ mờr 5 rbô 700 nă cau. Làng bol kis rềp mềr, tam klac mờ ală jơi bơtiàn kòn cau ndai, bal mờ gơp bơt bơtàu rài kis pa. Ồng A Điêt, kwang bàng gah niam chài xã Ea Yiêng pà git, bơdìh mờ gròi sền bơtàu tơnguh lơh sa hìu bơnhă, cau Sơdàng tàm do kung gam gàr bè ờs broă lơh tàñ ồi kòn cau bơh yau: “Ală mò, mè, bi ùr, oh ùr tàm ƀòn do kung gam gàr sùm broă lơh tàñ ồi àu kòn cau. Blah ồi kòn cau, ồi tơ̆, geh mò, mè bơto wơl kòn in, sau in, den tàng ală kòn, ală sau tŭ do kung git tàñ ồi àu kòn cau; nàng geh ală blah phan soh kòn cau, ồi tơ̆ pà ồng mò, mè bèp, oh mi he dê in. Tàm ală ngai lap bau tam bau ùr den ùr bơklau pa bau sùm ngui ală blah ồi àu kòn cau nàng pà ồng mò, mè bèp đah hìu klau, hìu ùr in jat bơhiàn bơh yau”.

Tàm xã Ea H’Đing, kơnhoàl Cư Mgar, càr Dăk Lăk, kòn cau Sơdàng kung neh ơm kis rlau 50 nam do mờ gàr sùm ală bơta niam chài bơh yau kòn cau he dê. Tàm hơ̆, lơh yàng ñô lir bông là ngai lơh yàng dờng ngan rlau jơh tàm nam bơh làng bol kòn cau Sơdàng dê tàm ƀòn Kon H’ring geh lơh tàm ngai sa tềp Tây. Bèp Sương, kra ƀòn Hring, xã Ea H’Đing, kơnhoàl Cư Mgar, càr Dăk Lăk pà git: Lơh yàng ñô lir bông geh lơh tàm ngai sơn rờp nam pa dê, ờ mìng là tŭ nàng làng bol in sền wơl cồng nha bơh dùl nam lơh broă lơh sa, mờ gam là dang che tàm tơrbŏ tơl nă cau tàm mpồl bơtiàn cau Sơdàng, tơngkah làng bol gàr sùm, prap gàr bơta niam chài kòn cau dê: “Pah nam, ƀòn Hring kung gam bơyai lơh yàng ñô lir bông. Do là dơ̆ lơh yàng ưn ngài brah yàng neh sền gàr, ai pà làng bol in pràn kơldang să jan, dùl nam mìu niam càl niam, kàl lơh sa tơnhàu geh uă. Tŭ do, ờ roh uă tŭ tơngai mờ phan bơna, bol hi tam gơl broă bơyai lơh, lơh bal ala mờ tơl hìu bơnhă bơyai lơh is bơh ngai do tus ngai ndai den geh roh tŭ tơngai lơh broă lơh sa, tŭ do jơh gùt ƀòn tơrgùm bơyai lơh dùl dơ̆ tàm ngai bồ nam pa, hìu bơnhă lơi geh sur den lơh poac sur, geh iar den lơh poac iar, jơh ală làng bol tàm ƀòn ndrờm tơrgùm tàm hìu rông nàng rac yàng mờ lam lơh dròng cing, jañ mồng, tamya xoang”.

Ồng Y Mang, Phó kwang atbồ Cơldŭ Văn hóa Thông tin mờ Truyền thông kơnhoàl Cư Mgar, càr Dăk Lăk pà git: ƀòn Hring, xã Ea H’Đing là tiah ơm kis tơrgùm bal bơh cau Sơdàng dê. Làng bol kung gam gơtùi sền gàr bơta niam chài krơi is kòn cau he dê. Tàm do, gam 50 nă cau git dròng cing, tàm hơ̆ geh rlau 30 nă cau kơnòm să, 10 nă cau git tàñ ồi kòn cau, mpồl tamya geh rlau 10 nă cau mờ 1 nă nghệ ñân lơh niam wơl cing jak. Ƀòn tŭ do kung gam 4 bòr cing, tàm hơ̆ geh dùl bòr cing, sơnggơr gam bè ờs nàng ngui tàm ală dơ̆ lơh chờ, lơh yàng tàm ƀòn; ai tŭ lòt lơh tiah ndai, mpồl cèng 16 pang, jơh bal cing mờ sơnggơr. Mpồl cing mồng bơh ƀòn Kon H’ring dê sùm geh ală kâp, ală gah broă lơh rơ wah jà tus bal ală dơ̆ pơrlòng, dơ̆ bơyai lơh tàm uă tiah tàm gùt lơgar: “Làng bol ƀòn Hring kung gàr sùm uă broă lơh chờ, lơh yàng bè: ñô lir bông, lơh yàng ƀă bòng dà. Pah nam, ƀòn Hring ndrờm lơh yàng ñô lir bông tàm ngai sa tềp tây mờ bơta tus bal bơh gal ngan làng bol kòn cau Sơdàng tàm ƀòn mờ nac nhơl chờ dê. Do là dơ̆ lơh yàng kuơmàng ngan den tàng ƀòn pal sền gàr, tàm xã Ea H’Đing tŭ do mìng geh ƀòn do gàr sùm broă lơh yàng do mờ kơnờm geh bơta sền gròi, dong kờl bơh dà lơgar dê tàm broă prap gàr mờ ngui niam bơta niam chài kòn cau. Bơh hơ̆, bol hi sơlơ mblàng yal, hòi jà làng bol uă rlau tai nàng làng bol git sền gàr mờ ngui niam bơta niam chài bơh yô yau mờ bèp ồng he dê lời wơl”.