Tàm Ngai chờ, làng bol mờ năc lòt nhơl geh sền gŏ uă broă lơh yàng mùl gŏ is bơh Sa tềp Bunpimay dê bè pơdơng phan lơh yàng Tắc – bạt, tơ um Phờk, kơ̆t che brài tềng ngko tê, bơ̆t kwơ̆ bràs, pơrđồng bơkàu tàm dà, sàc jrah dà kơ̆p kờñ bơtuah. Do là ală broă lơh wèt tus bơta sàng goh, răc dan lơngăp lơngai mờ jòi bơta lơngai lơngò ai sơnam pa in.

Gơ wèt mờ uă hìu bơnhă cau Lào ơm kis jŏ nam tàm Buôn Đôn, Sa tềp ờs mờng bơh yau ờ mìng là dơ̆ bơtòm tơrgùm măt bal mờ gam là broă prăp gàr dang che tàm bơrkuăt mờ mò pàng. Mò Kham Bo Lào, ơm tàm ƀòn Trí, sàh Buôn Đôn, yal: “Añ lòt duh khuai pơdơng bơkàu, plai chi, ƀañ kèu mờ dồ êt phan ơn pơdơng ală cau kơđơng yàng in nàng răc dan pràn kơldang, gơboh gơbài ai jơh hìu bơnhă in. Añ kung lòt tơ um dà Phờk in nàng răc dan lơngai lơngò ai jơh dồ hìu bơnhă, oh kòn kòn sau in”.

Bal mờ hơ̆, năc lòt nhơl gam geh tơmŭt bal să he tàm nùs nhơm lơh chờ bal mờ tam ya Lăm Vông, jơnau tam ya Chăm- pa, lơh yàng rò ùr yàng sơnam pa Nang Sangkhane, lơh chờ gùng drà; tus bal lơh ală broă lơh lòt nhơl đềt mềr mờ rwas, sền broă lơh đơs crih tam ya mờ pơrlòng phan sa ală jơi bơtiàn.

Bi Hoàng Thúy Lư, ơm tàm sơnah ƀòn Ea Kao, càr Dăk Lăk, pà gĭt: “Ngai do añ geh tus Buôn Đôn mờ geh măt bal tàm ngai Sa tềp cau Lào dê. Añ gŏ gơlơh chờ hờp mờ pơniờ să ngan bè rài niam chài jơi bơtiàn cau Lào dê tàm Buôn Đôn. Añ gŏ gơlơh là gơboh kờñ ngan ală phan soh ờs mờng bơh yau do, ală broă lơh sa tềp tàm do mờ añ gŏ gơlơh chờ hờp ngan tŭ geh măt bal tàm broă lơh tàm jrah tàm sàc dà, tơl nă cau nhơl dà chờ hờp chờ hờn ngan mờ gơdan ngan hờn chờ ngan.

Buôn Đôn, tàm dà cau Lào dê geh gơtha là “ƀòn bồt”, là tiah ơm kis jŏ rài bơh gĭt nđờ rơhiang hìu bơnhă cau Việt Nam jơi Lào dê tàm Dăk Lăk.

Jăt ồng Nguyễn Cảnh Tùng, Củ tịc Anih duh broă Làng bol sàh Buôn Đôn, tơnơ̆ tơmŭt bal, jơh gùt sàh geh 15 jơi bơtiàn ơm kis bal, tàm hơ̆ geh rlau 400 nă cau jơi Lào. Broă lơh sùm Sa tềp Bunpimay ờ mìng lơh geh jơnau kờñ niam chài đah nùs nhơm làng bol dê lơm mờ gam lơh geh ù tiah tìp măt lơh kwèng, bơ̆t bơtàu pràn kơldang mpồl tam klăc dờng gùt jơi bơtiàn, lơh pràn bơtàu tơngguh lơh sa – mpồl bơtiàn tàm ƀòn lơgar. 

Ồng Nguyễn Cảnh Tùng pà git: “Mpồl bơtiàn cau Lào tàm do geh pơgăp rlau 400 nă cau ơm kis tàm ƀòn lơgar sàh Buôn Đôn dê. Do là bơhiàn niam chài krơi is jơi bơtiàn cau Lào dê sền gàr bơh jŏ do ngan rao. Bol hi pah nam kung gam lơh sùm Sa tềp ai cau Việt Nam jơi Lào ơm kis tàm ƀòn lơgar do in nàng lơh geh bơta tam klăc đah ală jơi bơtiàn tàm mpồl bơtiàn tiah làng bol ơm kis, tàm dong, tàm kờl bal mờ gơ̆p tàm bơtàu tơngguh lơh sa – mpồl bơtiàn tàm ƀòn lơgar sàh Buôn Đôn”.