Tàm ƀlàng coh plai thôn Như Ngọc, sàh Phước Hữu, càr Khánh Hòa, git nđờ rhiang nă ơruh pơnu kòn cau Prum tàm phan soh ờs mờng tus bal tamya bal tàm sap sơng gơr Paranưng mờ kơmbuat Saranai hô hơng. Ală jơnau tamya geh rơcang lơh nền nòn ngan, ai tơnggŏ wơl niam ngan rài kis pah ngai mờ lơh broă bơh cau Prum dê, bơh rùp sơ̆ àñ òi, lơ òr sre, tàñ brài tus ală jơnau tamya bơh yau cèng bơta niam chài krơi is. Gơ rờm bal tàm mpồl nac tus bal dơ̆ lơh chờ gal ngan, mò Đàng Thị Hơi, ơm tàm sàh Phước Hữu, càr Khánh Hòa đơs:

“Dơ̆ lơh chờ nam do geh bơyai lơh bơh bồ ƀòn tus lồi ƀòn, chờ hờp ngan. Ală jơnau bơyai lơh niam ngan, ală cau chài kung hô hơng, jơh nùs ngan tus bal bơyai lơh”.

Rija Nagar là dơ̆ lơh chờ wă rò nam pa bơh cau Prum dê, mờ ală bơhiàn lơh yàng hòi dan mìu niam càl niam, kàl lơh sa tơnhàu geh uă mờ rài kis ring lơngai ai mpồl bơtiàn in. Tơl bòn cau Prum bơyai lơh chờ tờm tàm 2 ngai mờ ală bơhiàn lơh yàng bơh yau, bulah bè hơ̆ tŭ tơngai bơyai lơh digơlan krơi is den tàng nùs nhơm dơ̆ lơh chờ sùm jŏ jòng uă ngai tàm mpồl bơtiàn. Bi Trần Thị Dung, nac lòt nhơl tus bơh Hà Nội đơs:

“Oh neh lòt uă dơ̆ lơh chờ tàm uă tiah bơh tiah đah tô mut tiah đah jum dà lơgar mơya do là dơ̆ lơh chờ cau Prum dê, gơ lơh krơi is ngan. Hơ̆ là bơta tam klac bal jơi bơtiàn dê, jờng rơ niam chài bơh jŏ tàm ƀòn lơgar niam ngan. Oh gŏ gơ lơh niam ngan, git ưn ngài, pơn yờ să tŭ geh tus bal dơ̆ lơh chờ tàm ù tiah do”.

Dơ̆ lơh chờ Rija Nagar gam là anih ơn prap, prap gàr uă bơta bơyai lơh bơh yau krơi is bơh mpồl bơtiàn cau Prum dê, bơh gùng đơs crih, tamya tus ală bơhiàn lơh yàng bơh yau. Do là ù tiah nàng ală bơta kuơ niam chài bơh yau pơn jat tai geh prap gàr mờ tàm pơ dờn wơl uă rơnàng in.

Phó kả sư Lưu Sanh Thanh, sàh Phước Hữu, càr Khánh Hòa pà git:

“Dơ̆ lơh chờ nam do ngai 1 nhai 1 gơ di tàm ngai 16/4 tây, kung là dơ̆ tơngkah kir sơnrai ngai tơngklàs càr Ninh Thuận yau, làng bol kòn cau chờ hờp ngan. Đảng mờ Dà lơgar tàm tơngai lài neh sền gròi uă ngan tus rài kis làng bol kòn cau dê. Bol hi kơp kờñ dơ̆ lơh chờ Rija Nagar pơn jattai geh prap gàr, lơh niam mờ gờñ geh tơmut tàm mat phan lời wơl niam chài ờ di phan bơna kâp dà lơgar”.

Ală sap ntas sơng gơr Paranưng mờ sap uh kơmbuat Saranai mpong ntas pah kàl lơh chờ, tàm bơrkuăt bal mpồl bơtiàn mờ prap gàr jơnau kah kir niam chài bơh cau Prum dê. Mờ bơh ală ù tiah lơh chờ bè Rija Nagar, bơta niam chài cau Prum dê pơn jat tai geh prap gàr, gơ rề uă tàm rài kis tŭ do.