Tàm bơta trồ tơngai duh tiah tàm gùl brê bơnơm dờng Trường Sơn dê, bơh àng drim gờñ, tơl mpồl cau bơh ală ƀòn gơwèt kơnhoàl Kà Lừm, càr Sê Kông, lơgar Lào – do là tiah rềp bal mờ sàh Hùng Sơn, ƀòn dờng Đà Nẵng (kơnhoàl Tây Giang, càr Quảng Nam lài do) neh tam jà bal, tam hòi bal nàng lòt tus thôn A Tu 1, sàh Hùng Sơn bè lòt chờ. Tàm mpồl cau bơh đah ne nhàr lơgar tus, cau lơi kung soh tàm să ală ào mpha niam ngan. Ală săp ñŏ nhơl bè hơ̆ sùm geh tàm muh măt neh gơtìp tơngai àl. Geh cau tề cau kra, kòn dềt nàng lòt bal. Geh cau àñ bal tàm sơ̆ phan geh bơh ƀòn lơgar dê…

Ồng Savandi chờ hờp đơs, git jơnau yal đah sàh Hùng Sơn geh bơyai lơh Satềp Bunpimay, làng bol tàm ƀòn cau lơi kung chờ hờp lơm, tam jà bal nàng lòt jơng tus tàm hơ̆ ñô sa chờ bal. “Nam lơi tus Satềp Bunpimay, làng bol tàm ƀòn kung kơ̆p gơn ngan… Tŭ tus tàm do cau lơi kung chờ hờp lơm, ram mhŭ ngan. Do là Satềp lơgar Lào dê, mờ ală bơyô lơgar Việt Nam bơyai lơh nền nòn, ndrờm bè Satềp ờs mờng bơh lơgar Việt Nam dê sơl. Tus tàm do geh tìp măt oh mi, geh ñô sa, chờ hờp, wă rò Satềp bal… chờ bè Satềp tàm hìu tờm sơl”.

Tàm sàh Hùng Sơn, ală phan sa ờs mờng bơh kòn cau Kơ Tu dê neh geh rơcang lài nền nòn, geh uă ngan nùs nhơm wă rò năc bơh cau kis tàm tiah bơnơm dê. Ồng Plong Rang, Ƀí thư Ci ƀộ thôn A Tu 1 chờ hờp đơs, cau lơi kung sền do là broă bal ƀòn lơgar dê, tă is priă, tă is ngai lơh broă. “Lơh mpràp, rơcang jơnang lơh chờ; lam làng bol lòt pic biăp, dus bùm blàng nàng trŭ gơm uă phan sa ờs mờng drơng mpồl cau tus Satềp lơgar Lào in. Ală phan sa krơi is bè poăc sur, poăc iar, ka, piang ding, ƀañ ngke rơpu geh rơcang nàng wă rò làng bol lơgar Lào. Nùs nhơm gal ngan, chờ hờp ngan”.

Ngai lồi poh, git nđờ rơbô nă cau tus bơh 5 ƀòn kơnhoàl Kà Lừm, càr Sê Kông dê, cèng bal nùs nhơm chờ bơh Satềp Bunpimay nggồr nggàc gùt brê bơnơm tiah nhàr lơgar Hùng Sơn. Săp đơs săp ñŏ pơgồp bal mờ săp đơs crih mpong sùm tàm brê bơnơm dờng. Ală jơnau nhơl ờs mờng bè duĭ che, droh gai, sơn đoh ƀào… geh bơyai lơh nggồr nggàc ngan, geh bal làng bol kis tàm bàr đah nhàr lơgar tus bal. Bơta tờm bơh ngai chờ dê là Drà Satềp Bunpimay lơh geh uă nùs nhơm git gơ̆p lơh bơyô bal tiah nhàr lơgar đah lơgar Việt Nam mờ lơgar Lào dê.

Tàm do, làng bol ờ mìng geh lòt drà ờ sa priă mờ gam “wă rò Satềp” mờ phan sa ờs mờng. Ală phan pà bŭ lah ờ uă, mơya geh uă nùs nhơm niam ngan bè phe, ƀung mi, ka rì, ào mpha pa… hơ̆ sồng geh bal yoas, kao, wơu ală phan ngui đềt mềr mờ rài kis lơh broă pah ngai dê, geh jào tus tàm tê làng bol in bè dùl phan pà Satềp geh uă nùs nhơm niam.

Đại tá Hoàng Văn Mẫn, Cíñ ủy Mpồl Đơng lam Ling sền gàr tiah nhàr lơgar ƀòn dờng Đà Nẵng đơs nền, ală phan pà mùl màl, broă lơh nàng ngui tàm rài kis làng bol in, tus mờ ală broă lơh niam chài, tàp pràn să jan… ndrờm wèt tus mờ làng bol cau Lào dê bè cau pròc mhàm bal. “Tàm Satềp lơgar Lào ha là Satềp lơgar Việt Nam dê, bol añ ndrờm bơyai lơh nàng làng bol in tus bal; làng bol lơgar Lào geh dờp nùs nhơm chờ hờp tŭ bơyai lơh Satềp lơgar Việt Nam dê, mờ làng bol lơgar Việt Nam kung geh dờp bơta chờ tŭ Satềp lơgar Lào tus. Ală nam pa do, nùs nhơm niam đah làng bol bàr đah nhàr lơgar, ală mpồl lơh broă sền gàr tiah nhàr lơgar, gơnoar atbồ bàr đah nhàr lơgar là đềt mềr ngan, pơgồp bal nàng bơ̆t bơtàu tiah nhàr lơgar ring lơngai, git gơ̆p, lơh bơyô, lơh broă bal”.

Tàm gùl brê bơnơm Trường Sơn dê, Satềp Bunpimay nam do dùl dơ̆ tai tơrbŏ rềp bal ală jơng lòt bàr đah nhàr lơgar dê. Ală mpàng tê at tê bal, ală săp ñŏ tìp bal… bŭ lah bè ờs mơya ram nùs ngan.