Tàm hìu jòng bơh bi Y Wôn Knul (bàp Nhiên), ơm tàm ƀòn Ako Dhông, ƀòn dờng Buôn Ma Thuột, dùl mpồl ơruh pơnu mờr jơ̆t nă gam chờ hờp ngan pơlam tàp wơl ală jơnau bơyai lơh mờ đờng gòng kòn cau dê, tŭ den dròng cing gle, cing lơngô, tŭ den dròng đờng T’rưng, tŭ den uh kơwào mờ đơs yal jơnau yal yau. Bi Y Wôn Knul pà gĭt, ngai sơlơ geh uă năc lòt nhơl tus Buôn Ma Thuột kờñ geh iăt gùng đơs cih tam ya, jòi gĭt bơta niam chài bơh yau bơh kòn cau Rơđê dê. Kwơ màng ngan, tàm dơ̆ Lơh chờ Kơphê mờr tus, mpồl drơng broă nhơl chờ neh rcang bơyai lơh uă tơngai ràng tơlik tàm hìu.

Bi Y Wôn Knul đơs: Rcang ai dơ̆ lơh chờ in den oh mi kung geh ală tŭ tơngai nàng nggui wơl bal mờ gơ̆p, bơto pơlam wơl dròng cing jañ mồng halà ală đờng gòng kòn cau tus ală jơnau đơs Kư̆t, khan, bè đờng gòng bơh kòn cau Tây Nguyên dê, bè jơnau cing đơs bal bè là cing do, T’rưng do, đing buôt do, jơnau đơs kư̆t, khan do, nàng gơ in ring rlau, niam rlau, nàng yal tơngĭt, cèng bơta sền dờng màng niam chài bơh he dê mờ he kung sền dờng màng ală cau iăt kơno bè bơta hơ̆ sơl.

Là ù tiah nhơl chờ niam chài niam ngan tàm ƀòn dờng Buôn Ma Thuột, ală ngai do, ƀòn Ako Dhông gam geh bơka niam tai tài bơh ù tiah niam bơnĕ ngan nàng drơng ală broă lơh bơh Dơ̆ lơh chờ Kơphê dê. Bal mờ rcang ală phan ơm, tiah ơm kis ing homestay mờ phan trŭ gơm phan sa, ală hìu bơnhă tàm ƀòn pơs wàs wơl bơka niam wơl hìu jòng, bơka mpồng mŭt, sơng dà wơl kƀàng yồng, kƀàng sơñio pơlam gùng nàng năc lòt nhơl in ƀuơn ƀoài rlau tàm tŭ lòt sền, sền gĭt ală bơta tàm ƀòn. Bi H Tít Aliô, ơm tàm ƀòn Ako Dhông đơs, hìu bơnhă bi neh tă priă bơcri mờr 400 tơlak đong nàng lơh niam wơl hìu jòng bơh hìu bơnhă dê, rcang dong kờl wă rò năc lòt nhơl tŭ geh ală mpồl tus lòt nhơl, sa sào.

Bi H Tít Aliô đơs: Dơ̆ lơh chờ do geh gơrềng tus ờ mìng là kơphê lơm mờ gam là bơta niam chài bơh kòn cau Rơđê dê tàm ƀòn dờng Buôn Ma Thuột den là ƀòn lơgar chờ hờp ngan mờ hưh hơh kơ̆p gơn. Añ gơlơh sền gŏ ƀòn lơgar hô hơng rlau, gam dong kờl bal mờ gơ̆p rcang lài mờ drơng broă ai tơngai bơyai lơh Festival kơphê do in. Ƀòn lơgar geh ală broă lơh bè cing mồng do, phan ngui sa, geh ờ sa priă hùc dà kơphê tai. Tàm ƀòn den geh ală hìu bơnhă bè là Ay Ray, Tăng Bi, anih ràng tăc dà kơphê A Rul, anih tăc tăc dà kơphê Ako Dhông khi kung gam rcang mhar ngan ai dơ̆ Festibal dơ̆ do in.

Tàm ală ƀòn lơgar tàm càr Dăk Lăk, làng bol kung rcang uă tơngume lơh jat, lơh li la uă tai bơhiàn niam bơnĕ bơta niam chài bơh dơ̆ lơh chờ Kơphê dê, bè bơyai lơh Ngai chờ Niam chài- Tàp pràn să jan ală jơi bơtiàn kòn cau; bơyai lơh ală dơ̆ lơh yàng duh khoai bơh yau bè dơ̆ lơh Yàng duh khoai dà mbòr; dơ̆ lơh Yàng duh khoai hòi dan pràn kơl dang să jan; dơ̆ lơh yàng duh khoai Rơwas; dơ̆ lơh Yàng duh khoai hòi dan pràn kơl dang să jan Rơwas in,... Jat bi Y Thiên Adrơng, cau tờm dùl anih lơh broă nhơl chờ tàm Buôn Ma Thuột yal, bi neh rcang ală dơ̆ lòt nhơl geh bềng bơhiàn niam chài ƀòn lơgar dê nàng năc lòt nhơl in geh tŭ tơngai sền gĭt ù tiah niam chài, tìp mat tơm bơh bơr tơn mờ làng bol- cau tờm niam chài tàm tơl ƀòn lơgar dê.

Bi Y Thiên Adrơng đơs: Jat tơngume broă lơh bơh Dơ̆ lơh chờ Kơphê den rơ̆p geh ală broă lơh tàm ƀòn dờng Buôn Ma Thuột, broă lơh tàm Lăk mờ broă lơh tàm Buôn Đôn. Tơl tiah rơ̆p geh bơta mùl gŏ krơi is gơ dê, tơl gùng lòt mờ năc lòt gan là he rơ̆p ai năc in geh tìp mat lơh kuèng, geh sền gĭt bè nùs nhơm kòn bơnus dê, bơta kờñ gơboh năc, ală bơta niam bơnĕ tàm tơl tiah kòn cau, tơl ƀòn dê. He rơ̆p tàm tơrbŏ wơl mờ ală làng bol khi gam ơm kis tàm hơ̆, nàng khi in tam pà bal, khi yal ală jơnau bơh khi dê ai năc lòt nhơl in.

Dơ̆ lơh chờ kơphê Buôn Ma Thuột dơ̆ 8 do geh uă làng bol tàm càr Dăk Lăk hưh hơh ngan kơ̆p gơn. Tàm nùs nhơm hô hơng mờ nùs nhơm “Nhai pe Tây Nguyên”, ală ƀòn lơgar rcang tus bal bơnĕ bơnài bal nàng lơh geh bal dùl dơ̆ lơh chờ bềng tềl tơngŏ kơphê mờ li la uă bơhiàn niam bơnĕ niam chài dê.