Drim ngai 12/3, tàm thị trấn Liên Sơn, kơnhoàl Lăk, càr Dăk Lăk geh lơh Chờ pơrlòng plung dơm chi tàm tơnau dà Lăk dơ̆ 3 nam 2023. Do là dùl tàm 18 broă lơh tàm Dơ̆ lơh chơ kơphe Buôn Ma Thuột dơ̆ 8 nam 2023 gam geh lơh tàm Dăk Lăk. Chờ pơrlòng plung dơ̆ do geh 5 mpồl tus bal mờ 86 nă cau pơrlòng tus bơh ală xã, thị trấn mờ tiah nhơl chờ tàm kơnhoàl Lăk. Ală cau pơrlòng tus bal pơrlòng tàm 3 tơngume, geh: Pơrlòng plung dơm chi 4 nă cau, pơrlòng plung dơm chi 3 nă cau mờ pơrlòng plung dơm chi 2 nă cau. Tơl gùng pơrlòng jòng 300 thơk.

Tơn jơh pơrjum, mpồl bơyai lơh neh jàu 3 khà 1, 3 khà 2, 3 khà 3 mờ 6 khà pơn jờng tàm ală tơngume pơrlòng, mpồl thị trấn Liên Sơn geh khà 1 gùt mpồl. Jat mpồl bơyai lơh đơs, chờ pơrlòng plung dơm chi dơ̆ do pơn jat tai lơh tềl bơta tam gơl pa tàm broă lơh prap gàr ală bơta kuơ niam chài bơh yau jŏ rài mờ niam bơnĕ bơh ală jơi bơtiàn kòn cau tàm ƀòn lơgar dê, ai ală bơta kuơ niam chài rê wơl mờ rài kis mpồl bơtiàn drơng làng bol mờ nac nhơl chờ.

Bal mờ chờ pơrlòng plung dơm chi, ală ngai do tàm kơnhoàl Lăk kung bơyai lơh uă broă lơh cèng bơta niam chài krơi is jơi bơtiàn kòn cau dê, bè: lơh yàng dà mbòr, lơh yàng hòi dan pràn kơldang să jan rơ was, lơh yàng tơrmù plung tàm dà, tìp mat lơh kwèng niam chài, lơh chờ sàl mờ ràng tơlik phan bơh yau.

Tàm Anih tờm Dơ̆ lơh chờ Bản Đôn, xã Krông Na, kơnhoàl Buôn Đôn, càr Dăk Lăk, geh bơyai lơh dơ̆ lơh chờ Rơwas Buôn Đôn. Broă lơh niam ngan do neh gơ hòi gơ jà gĭt nđờ rơbô nă làng bol tàm càr bal mờ năc lòt nhơl tàm lơgar mờ lơgar ndai tus bal. Tus bal dơ̆ lơh chờ rơwas Buôn Đôn nam do geh 7 nơm rơwas hìu bơh ală cau pơđàu rơwas tus bơh ală mpồl lơh sa kă bro, hìu bơnhă tàm ù tiah kơnhoàl Buôn Đôn. Krơi mờ ală dơ̆ lơh chờ lài, Dơ̆ lơh chờ Rơwas Buôn Đôn nam do ờ geh ală broă lơh bè: Rơwas tàm pơrlòng ntoăt, rơwas coh plai, hào rơwas lòt gan dà dờng Srepok; ala tàm hơ̆ là ală bơta nhơl chờ rềp mềr mờ rơwas gam geh ală kông ty nhơl chờ tàm dunia ngui, bè: lơh hàng să ai rơwas in, Rơwas tus bal còp să năc lòt nhơl geh broă lơh niam ngan rlau jơh, dơ̆ sào buffet rơwas, cùp rùp bal mờ năc lòt nhơl. Tơn jơ̆h dơ̆ tàm pơrlòng, rơwas Khăm Sing bơh cau pơ đàu rơwas Y Wưn Byă jak ngan ai geh khà 1 tàm tơngume bong să. Bơdìh hơ̆, mpồl bơyai lơh neh jàu uă khà ndai ai ală cau pơđàu rơwas in mờ rơwas tus bal tàm dơ̆ lơh chờ rơwas.

Tàm Tiah nhơl chờ brê bơnơm mpồl bơtiàn Kŏ Tam, ƀòn dờng Buôn Ma Thuột, Mpồl bơyai lơh chờ kơphe Buôn Ma Thuột bơyai lơh Pơrlòng phan trah mòn niam chài bơh tờm kơphe. Pơrlòng mòn phan trah mòn bơh tờm kơphe geh 53 nă nghệ ñân tus bơh ală kơnhoàl, ƀòn dờng tàm càr Dăk Lăk mờ ală càr Dăk Nông, Gia Lai, Kon Tum mờ Lâm Đồng tus bal. Tàm 3 ngai do, ală nghệ ñân neh lời uă tŭ jơ mờ nùs nhơm nàng mòn gơs ală phan mờ tơngume bè rài kis bơh ală jơi bơtiàn kòn cau Tây Nguyên dê, bơta sền gàr tiah ơm kis, sền gàr phan kis kuơmàng ờ huan geh tai, bơta kơp kơnờm brồ guh, tơnguh bơta kuơ phan kơphe mờ ală phan trah mòn niam chài ngui nàng bơka drơng rài kis in.

Tơn jơh dơ̆ pơrlòng, mpồl bơyai lơh neh jàu 1 kjhà 1, 2 khà 2, 3 khà 3, 5 khà pơn jờng ai 11 nă cau geh khà jờng in, jàu khà jờng bơh mpồl dong kờl priă jền ai 15 phan in, jàu sră cơng tàng ai ală nghệ ñân tus bal dơ̆ pơrlòng in.