Tàm 2 ngai lồi poh pa do, tàm Gùng sră geh bơyai lơh ală broă lơh niam ngan bè: yal tơngĭt sră kơnòm dềt “Cà Nóng lòt nhơl Trường Sa” mờ tìp mat lơh kwèng mờ cau cih sră Bùi Tiểu Quyên; yal tơngĭt pang sră yal jơnau “Dế Mèn phiêu lưu ký” mờ tìp mat mờ ală cau cih sră ờs cih ai kơnòm dềt in; tơm bơh bơr mờ cau cih sră Tống Phước Bảo tàm ƀòn dờng Hồ Chí Minh bè tơngume “Bol he kờñ sơl lơh cau cih sră”.

Tus bal broă lơh, ală kơnòm dềt gam geh pà ală pang sră yal jơnau kơnòm dềt tiơng pơn rơ bè: “Đất rừng phương nam”, “Trên đồi gió thổi”, “Năm đứa trẻ xóm đồi” halà “Dế mèn phiêu lưu ký”. Tàm broă lơh, Mpồl cau cih jơnau đơs crih tam ya càr Dăk Lăk bơh rơndap broă lơh “Pà sră văn học nghệ thuật ai kơnòm dềt tiah sar lơgar ngài in” bơh Mpồl cau cih sră lơgar Việt Nam dê neh pà 600 pang sră kơnòm dềt ai ală kơnòm dềt tus bal in.