Bơh àng drim gờñ, ƀlàng cơl dŭ lơh broă bơta niam chài mờ yal tơngit kơnhoàl Ea Hleo, càr Dăk Lăk gal ngan cau tus. Tơl gah broă geh ai tàm ală tiah krơi is bè: tiah ràng tơlik sră mờ phan STEM, tiah ràng tơlik rùp niam jăt tơngu me, tiah lơh broă jòi nàng git sră mờ bơta niam chài sền sră, tìp bal, yal cau cih sră mờ dơ̆ pơrlòng yal yau jăt sră. Chờ hờp cèng phan pa geh pà tàm tê, oh Bùi Trần Bảo Thư, bơsram ơdŭ 6A5, hìu bơsram kấp 2 Lê Quý Đôn, thị trấn Ea Drăng, kơnhoàl Ea Hleo yal: “Bơh àng drim gờñ oh tus bal sền đơs crih tamya, dờp sră, tìp bal mờ ală mlŏ cih sră, mờ nhơl jơnau nhơl, jòi nàng git bơt niam chài sền sră. Tàm ală broă lơh den gơboh ngan là nhơl jơnau nhơl, lơh bơta niam chài bơsram tài geh uă bơta niam geh kwơ, mờ chờ tai. Oh kờñ hìu bơsram bơyai lơh uă broă lơh mờ jơnau nhơl ai ală bơyô in nhơl mpồl nàng geh tai jơnau git wă mờ pơ-rài bồ tơngoh”.

Ờ mìng geh lơh ală broă nhơl chờ hờp, geh kwơ, ală kơnòm bơsram tus bal broă lơh do gam geh dờp ală pang sră văn họk nghệ thuật ai kơnòm dềt in. Ală tơngu me tam pà bal bơh ală cau năc jà kung dong kờl kơnòm bơsram wă rơlao bè bơta kwơ bơh broă sền sră, bơh tŭ hơ̆ ală kơnòm bơsram geh nùs nhơm kờñ gơboh rơlao mờ broă sền sră mờ jòi nàng wă bơta ngăc ngar bơh tàm pang sră. Oh Phan Thị Phương Thúy, bơsram ơdŭ 9A, Hìu bơsram kấp 2 Kòn cau nội trú kơnhoàl Ea Hleo yal: “Oh kơno ală cau chài cih jơnau nrĭ, cau cih văn đơs chài ngan mờ gŏ gơlơh ngềr ngan ală mlŏ, wa hơ̆ đơs. Geh uă mpồl niam ngan, yal yau Wa Hồ gơlơh ngoh rơngăc ngan. Oh gơlơh ngềr ngan mờ kờñ geh lơh bè hơ̆ sơl. Oh kung ờ hoam sền sră tài kung ờ niam gơboh kờñ ngan sơl, mìng oh sền sră cih bè nùs nhơm gam sră văn họk den oh ờ hoan sền. Mơya tŭ do kơno ală mlŏ, wa yal den oh gơlơh gơboh rơlao, gŏ kờñ sền sră rơlao mờ gơboh mờ môn ngữ văn rơlao”.

Jăt ồng Nguyễn Huy Dũng, Kwang atbồ phòng Văn hoá Thông tin kơnhoàl Ea Hleo yal, dờp bal Ngai sră mờ bơta niam chài sền sră nam 2023, kơnhoàl neh geh broă rơndăp lơh ndrờm bal uă broă lơh. Geh pơnrơ ngan bè: bơyai lơh sơn đờm Ngai chờ mờ tơngu me “Sră mờ cau kơnòm”; ràng tơlik, drơng cau sền 2 rơbô 500 pang sră mờ uă bơta bè: Sră văn họk kơnòm dềt, sră khoa họk kờñ wă, sră sền nàng wă; sră git wă rài kis, sră khoa họk kỹ thuật, adăt boh lam, lơh sơnơm, sră ƀăo. Ràng tơlik rùp niam mờ rùp sềr “Ea Hleo niam bơnĕ”; Bơyai lơh ală jơnau nhơl ờs mờng; pơnhồr chờ geh phan pơn jờng; tìp bal mờ ală cau chài cih văn, cau chài cih jơnau nrĭ; dơ̆ pơrlòng yal yau jăt sră,... Broă lơh do neh dờp geh bơta sền gròi, tus bal bơh mờr 1 rơbô nă kơnòm bơsram bal mờ cau pơgru tàm ală hìu bơsram kấp 2, kấp 3 tàm gùt kơnhoàl. Bal mờ hơ̆, kơnhoàl kung sền gròi tus ală kơnòm bơsram tàm tiah kal ke mờ uă broă lơh lam sồr pơrlòng, lơh geh uă bơta niam chài sền sră tàm ală hìu bơsram. Ồng Nguyễn Huy Dũng pà git: “Bol añ gam geh broă rơndăp lơh là lơh geh uă tus ală hìu bơsram, hơ̆ sồng ală tiah, tàm hơ̆ pà sră ai ală thư viện kung bè tă pơgồp sră hơ̆ sồng pà ai ală kơnòm bơsram geh rài kis kal ke in, den broă lơh geh lơh tàm jơh nhai 4 do mờ ală tơngai pơn jăt tai”.

Pà sră tus tềng tê kơnòm bơsram tàm tiah ngài kung là dùl tàm ală broă lơh geh pơnrơ ngan bơh Mpồl Văn họk nghệ thuật càr Dăk Lăk dê dờp bal Ngai sră mờ bơta niam chài sền sră tàm nam do. Mò Niê Thanh Mai, Củ tịc Mpồl Văn họk nghệ thuật càr Dăk Lăk pà git, dờp bal gơnoar bơh Mpồl Cau cih Văn Việt Nam dê, Mpồl Văn họk Nghệ thuật càr Dăk Lăk neh pà git nđờ rơhiang pang sră văn họk nghệ thuật tàm rơndăp broă “Pà sră văn họk nghệ thuật ai kơnòm dềt tiah ngài in”, mờ bôyai lơh uă broă lơh tìp bal, cri bơyai bal mờ cau chài cih sră. Mò Niê Thanh Mai kơ̆p kờñ, bơh broă lơh do, kơnòm bơsram geh tìp bal mờ rềp rơlao mờ uă rơlao mờ sră, bơh tŭ hơ̆ geh ai uă tơngai rơlao ai broă sền sră, jòi nàng wă tơl pang sră. “Ai sră tus mờ tiah ngài mờ geh ală broă lơh pà sră kung bè là ală broă lơh nàng lơh geh uă bè nùs nhơm gơboh gờñ bè broă gơwèt mờ kơnòm bơsram tàm tiah ngài. Tàm hơ̆ uă ngan là nam do mờ rơndăp broă lơh sră pà ai ală kơnòm dềt tiah ngài, tiah làng bol kòn cau den Mpồl Cau cih văn Việt Nam neh jào 4 rơbô pang sră tus càr Dăk Lăk mờ bal mờ Mpồl Văn họk Nghệ thuật càr Dăk Lăk neh tus ală hìu bơsram tàm kơnhoàl, tàm hơ̆ uă ngan là wèt tus ală hìu bơsram tàm ală ƀòn geh kơnòm bơsram kòn cau”.

Ờ mìng tàm broă dờp bal Ngai sră mờ bơta niam chài sền sră, broă pà sră tus ală hìu bơsram, tàm hơ̆ uă ngan là ală hìu bơsram tàm tiah ngài gam geh uă mpồl lơh broă tàm càr Dăk Lăk lơh jăt bơh ală broă lơh bè Thư viện ntrờn, Sòl àng bơta ngăc ngar, Hìu bơsram wàl bong. Bơh tŭ hơ̆, geh wèt tus jơnau kờñ lam sồr mờ lơh jăt bơta niam chài sền sră tàm mpồl bơtiàn, bơ̆t bơtàu bơta mờng sền sră, pơgồp bal tàm broă tơnguh bơtàu bơta niam chài sền sră ngai sơlơ geh cồng nha mờ mùl màl.