Tìp mat cribơyai gơ hòi gơ jà uă ngan cau cih jơnau, cau đơs crih tam ya, cau pơgru, kwang bàng, cau ling mờ cau bơsram dờng tus bal, cribơyai bal bè bơta kwơ bơh ală jơnau cih cih bè Củ tịc Hồ Chí Minh mờ gơnoar bơh niam chài sền sră tàm lơh uă rlau tai jơnau kờñ kis, nùs nhơm bơsram is ai rơnàng kơnòm să tŭ do in. Uă jơnau đơs đơs là, tàm tơngai sồ, broă sền sră bè Wa Hồ ờ mìng dong rơnàng kơnòm să in wă rlau tai bè kah yau jơi bơtiàn dê lơm mờ gam pơgồp bơnah lơh geh nùs nhơm niam, rài kis niam mờ kơnòl mờ mpồl bơtiàn. Jat Thàk sìh Nguyễn Thị Phương, Pơgru Hìu bơsram Đại họk Adăt Hà Nội tàm Dăk Lăk, pà gĭt, broă gĭt mờ ală jơnau cih cih bè Wa Hồ dê tŭ do ờ mìng bơh tàm sră in lơm mờ gam mờ broă lơh ndai di pal mờ rơnàng kơnòm să dê.

“Niam chài sền sră là niam ngan. Mơya tŭ do ờ duh là ală bơyô pal blơi sră pơ àr nàng sền lơm mờ gơtùi iăt sră đơs, pơn yơu bè là VOV Live, sền lơma jơnau lời wơl halà ală broă lơh bè kah yau. Hơ̆ kung là dùl broă lơh gĭt mờ bơta gĭt wă”.

Tàm dơ̆ tìp mat cribơyai, cau đơs crih tam ya, cau kơlôi sơnơng niam chài mò Linh Nga Niê Kđăm tàm pà uă kir sơnrai tàm ală dơ̆ tìp mờ Wa Hồ, bơh hơ̆ lơh kah ngan rùp hin dùl nă cau đơng lam bồ ƀarah ƀarài ngan, rềp mềr mờ sùm lời ai bơta kờñ gơboh is ồn ai làng bol mờ kơnòm dềt in. Mò kung tơngŏ nùs nhơm ală jơnau cih cih bè Wa Hồ geh bơta pràn lơh gơ rề uă pràn kơl dang tus mờ rơnàng kơnòm să tŭ do dê.

“Añ kơ̆p kờñ ală jơnau yal, ală jơnau tam pà bal tŭ do ờ mìng lơh kah wơl rùp hin Củ tịc Hồ Chí Minh, cau jak niam chài dunia dê lơm mờ gam lơh gơ kờñ ai ală bơyô kơnòm să in jòi sền ală pang sră cih bè Wa Hồ nàng geh tai pơlam gùng dà ai rài kis mờ bồ tơngoh kơlôi sơnơng bơh he dê”.

Bal mờ bơnah tìp mat cribơyai, broă lơh gam geh ală dơ̆ bơyai lơh đơs jơnau pơnđick, vọng kổ mờ tìp mat lơh kwèng jòi gĭt bè rài kis, broă lơh bơh Củ tịc Hồ Chí Minh dê, gơ hòi gơ jà uă ngan cau bơsram dờng tus bal. Oh Quản Phạm Anh Thương pà gĭt, broă lơh dong cau bơsram dờng geh tai bơta sền gĭt bè rài kis, gùng lòt kăc màng bơh Wa Hồ dê kung bè gơtha bơh broă sền sră tàm bơsram sră mờ bơsram tàp să tờm dê.

“Dơ̆ tìp mat cribơyai geh kwơ uă ngan. Bol oh geh gĭt jrô rlau tai bè ală pang sră cih bè Củ tịc Hồ Chí Minh, geh tìp mat mờ ală cau cih jơnau, cau cih nrĭ mờ ală bơyô sền sră mờ ală bơta kơlôi sơnơng mờ ală gah sền krơi is bè ală pang sră cih bè Wa Hồ, gơtùi gĭt loh rlau tai bè rài kis Wa Hồ, gùng lòt bơh Wa Hồ dê”.

Jat Cau cih jơnau Niê Thanh Mai, Củ tịc Mpồl Cau cih jơnau Đơs crih tam ya càr Dăk Lăk, broă lơh gơrề uă ală jơnau cih, đơs crih tam ya cih bè Wa Hồ rơ̆p pơn jat tai geh lơh jat mờ uă broă lơh nàng ai bơta kwơ bồ tơngoh, nùs nhơm, rài kis mờ broă lơh Hồ Chí Minh dê tus rềp rlau tai mờ mpồl bơtiàn.

“Drờm bal mờ ală broă lơh cèng bơta sền gŏ tơn mờ mat den bol añ kung rơ̆p kŭp săp wơl ală jơnau nrĭ, ală jơnau đơs crih cih bè Wa Hồ mờ bol añ kung rơ̆p pơyoa tus ală mpồl lơh broă, tàm hơ̆ geh ală sơnah ƀòn mờ geh tŭ là bol añ kung neh lơh broă mờ ală hìu jàm mờ nàng gơtùi pà ală jơnau cih bơh gah yal tơngĭt jơnau tus mờ jơh tơl nă cau in”.

Tìp mat cribơyai ờ mìng pơgồp bơnah bơtơl tai nùs nhơm, bơta kờñ gơboh gơwèt mờ Củ tịc Hồ Chí Minh lơm mờ gam lơh gơrề uă niam chài sền sră tàm mpồl bơtiàn, is ồn là rơnàng kơnòm să. Bơh ală pang sră, jơnau yal mờ jơnau tam pà bal bè Wa Hồ, broă lơh neh lơh geh tai bơta gơ kờñ nàng tơl nă cau in jòi tus mờ sră bè dùl broă bơsram, bơsram tàp mờ ròng niam bơta kơ̆p kờñ kis niam, kis geh kwơ.