Tơnơ̆ 3 ngai geh bơyai lơh duh hồl, dơ̆ pơrlòng gơ hòi gơ jà rlau 800 nă cau chài, cau ràng tơlik mpồl bơtiàn tus bơh 26 sàh, sơnah ƀòn, tàm càr Dăk Lăk, ala mat ai 9 jơi bơtiàn, geh: Rơđê, M’nông, jrai, Bahnar, Sơdàng, Bru Vân Kiều, Mường, Tày, Nùng.

Ală mpồl tus bal ràng tơlik tàm 5 tơngume: ràng tơlik dròng cing mồng, đờng goòng jơi bơtiàn, đơs pơnđick, tam ya mờ lơh tơngŏ wơl bơhiàn lơh Yàng ờs mờng, mờ rlau 100 dơ̆ ràng tơlik niam ngan cèng bềng bơhiàn niam chài ală tiah dê. Uă gơl bơhiàn lơh Yàng bơh ală jơi bơtiàn dê neh geh lơh tơngŏ wơl, bè: dơ̆ lơh Yàng sa rơpu, dơ̆ lơh Yàng sơnđan mat, dơ̆ lơh Yàng chờ hờp sơnam tào dờng, dơ̆ lơh Yàng tơrmù tờm gơnơng, dơ̆ lơh Yàng duh khoai ƀòn.... bal mờ gĭt nđờ jơ̆t jơnau drìong cing, đờng goòng jơi bơtiàn, jơnau đơs pơnđick, tam ya geh ală mpồl ràng tơlik bềng bơta bơceh lơh mờ gơ kờñ ngan. Tơn jơh dơ̆ pơrlòng, Mpồl bơyai lơh jàu 8 khà gùt mpồl ai ală mpồl lơh geh cồng nha niam, pà khà jờng 37 dơ̆ ràng tơlik jak ngan. Mpồl cau chài sàh Liên Sơn Lắk  jak ngan ai geh khà 1 jơh gùt mpồl tàm dơ̆ pơrlòng dê.