Tàm gùl jơnum 8, sơnah ƀòn Ayun Pa, bă suơn dềt bơh bi Kpă Sa gam gơs anih tus mờ làng bol tam yal bal pah tŭ kờñ jòi geh dùl tiah lơngăp lơngai, niam bơnĕ jăt broă lơh bơh kòn cau Jrai dê. Bơh nam 2018, bi Kpă Sa sơn đờm mŭt lơh bă ù kờñ lời tam phan, ròng phan, lơh gơs tơl bă ƀlàng dềt, tơl sèng tờm chi gơs song niam. Ờ mìng ơm wơl tàm broă lơh niam bă suơn ơnàng 200 thơ̆k vuông, Bi Kpă Sa gam tam pà ală phan sa ờs mờng bè nha bùm blàng gơm bal mờ plai blơn bơtăng, ală phan ngui kòn cau Jrai dê… tơmŭt tàm pang internet mpồl bơtiàn.

Ală gơl video, rùp bè ờs niam neh lơh niam nùs mpồl bơtiàn dê, hơ̆ sồng geh uă cau jòi tus sền bè tus dùl “tiah tơrgùm dềt” bơta niam cài ƀòn lơgar dê. “Tŭ lài añ kơlôi rơcang ngan, tài bă suơn añ dê ờ hềt niam, den tàng neh lơh niam mờ broă tam wơl biăp, lơh niam wơl suơn bè lơi nàng tàm suơn sền gơlơh niam bơnĕ ring bal rơlao, kloh rơlao. Añ lơh bă suơn do bơh nam 2018 tus tŭ do. Pah ngai añ ndrờm lơh, lơh suơn kơlôi sơnơng lơh bè lơi, bă đah ne lơh bè lơi nàng sền niam măt rơlao, roh uă ngan tơngai ai broă lơh tàm suơn do bè ròng phan mờ tam phan, bơh àng drim tus trồ mho geh tŭ kung ờ gơs broă sơl, ngai lơi kung pal lơh sùm nàng ai suơn sền gơlơh niam bơnĕ rơlao, nàng ală cau kờñ gơboh rơlao”.

Rê bơh Ayun Pa tus sàh Ia Ly, broă lơh “Ƀòn niam chài lòt nhơl kòn cau Jrai” bơh lŏ H’ Uyên Niê dê gam dong kờl lơh geh wơl ală broă lơh ờs mờng jàng lah neh gơtìp roh. Geh bơh nùs nhơm kơlôi rơcang tŭ gŏ broă tàñ ồi yau, tàñ sơ̆ ha là piah kòi rơhời ờ hoan geh lơh tàm rài kis pah ngai tai, lŏ bal mờ dùl mpồl cau ùr tàm ƀòn bơyai lơh ală broă lơh nàng cau năc lòt nhơl in sền. Jơh ală ndrờm yal geh cồng nha kơnờm bơh fanpage ƀòn dê. Kơnờm mờ hơ̆, cau ùr tàm ƀòn geh tai priă, geh prăp gàr broă lơh ờs mờng bơh broă lơh pah ngai bơh ală cau ùr dê.

Lŏ H’ Uyên Niê pà git: “Ală cau ùr geh tus bal bơh pang internet mờ pang fanpage ƀòn dê. Ƀòn geh dùl pang fanpage hơ̆ là ƀòn lòt nhơl mpồl bơtiàn. Tŭ cau năc lùp bơh tŭ hơ̆ ha là kung bơh broă yal bơh ală bơyô dê bal. Ală broă tờm ƀòn dê kung gam là tàñ ồi yau, tàñ sơ̆, piah kòi, broă trŭ gơm phan sa bè tram phe, sreh kơrlô nàng cau năc in tơmŭt phe tàm ding kơrlô, buh piang ding nàng sa tàm kàl lơi den cau năc geh lơh tàm kàl hơ̆. Bè tàm tŭ geh lơh uă tàm lồi nam hơ̆ là pic plai kơphe dum, den cau năc gơtùi pic mờ kŭp rùp”.

Di lah bi Kpă Sa mờ lŏ H’ Uyên Niê lơh nàng geh uă cau git tus bơta niam chài krơi is bơh ù tiah bal mờ phan geh lơh ờs mờng, den bi Rcom Bus, klao pơnu kòn cau Jrai rơ̆p 23 sơnam tàm sơnah ƀòn Pleiku rơwah gùng đơs crih tamya bal mờ rùp rài nàng yal jơnau bè ù tiah Tây Nguyên geh uă bơta pràn niam. Tàm pang Fanpage “Tarzan Tây Nguyên” bi geh rơlao 160 rơbô dơ̆ cau sền. Ală clip uh kơl wờk tềng gah ñrùh dà ha là hào bơnơm mờ să bồ pùt ntrờñ ờs mờng sùm geh bơta bơta niam bơh brê bơnơm dê. Bi Rcom Bus yal, bơh dùl nă kòn klao dềt ờ khin, ngòt tŭ at điện thoại tàm mpồl geh gal cau, bi rơhời mờng mờ broă lơh vlog mờ pin dờn rơlao bơh tơl video dê.

Ờ geh bơsram tus gùng dà tàm gùng đơs crih, bi Rcom Bus kung gam lơh geh ai tơngŏ niam krơi is. Să jan pràn kơl dang, sŏ jòng bal mờ nùs nhơm sơrmah niam neh lơh bi geh cau sơnđan là “Tarzan Tây Nguyên”. Ală gơl lơma hào bơnơm, đì che, teh, uh jơnau đơs crih bơh Rcom Bus dê ndrờm geh git nđờ rơbô dơ̆ cau sền; clip sơnrờp geh rơlao 200 rơbô dơ̆ cau kờñ gơboh. Bơh tŭ hơ̆, Rcom Bus gơs dùl “cau ala măt lòt nhơl” is ngan. “Añ yal bơta niam chài mờ bơhiàn ờs mờng tàm pang internet mpồl bơtiàn nàng ală cau in git tus bơta niam chài Tây Nguyên dê geh ală bơta niam mờ uă bơta ngan. Tây Nguyên là dùl bơta lơi krơi is ngan, trồ tiah, ù tiah gơrờm bal, niam bơnĕ ngan. Să tờm añ là cau kòn ù tiah Tây Nguyên dê, añ gŏ kung ờ hềt jòi nàng git jơh ù tiah Tây Nguyên do, ală ăp dròng cing mồng, bơta niam chài bơh làng bol jơi bơtiàn ờ gal cau añ gơlơh gơboh kờñ mờ pơnyờ să ngan tŭ bơtàu tơnguh bơta niam chài rơgơi is jơi bơtiàn añ dê, añ yal jơh ală cau in git tus uă rơlao”.

Bi Đỗ Đức Thanh, Phó Ƀí thư Duh broă sùm Tỉñ đoàn, Củ tịc Mpồl ơruh pơnu càr Gia Lai đơs là, do là cơng tàng pà gŏ loh làng ngan ai gơnoar broă bơh broă tam gơl sồ dê gơwèt mờ ơruh pơnu. Broă bơceh lơh bơh tơl nă cau ờ mìng dong kờl să tờm ală cau hơ̆ dê geh bơtàu tơnguh mờ gam lơh geh uă rùp rài càr Gia Lai, do là dùl ù tiah geh uă bơta niam chài, đềt mềr, geh uă bơta pràn bơtàu tơnguh lòt nhơl.

Bi Đỗ Đức Thanh pà git: “Gơrùi đơs măi mok pa bal mờ pang internet mpồl bơtiàn là dùl tàm ală bơta phan geh kwơ màng ngan, ai tơl bơta niam nàng ală bơyô đoàn viên gơtùi tus rềp bal rơlao mờ bơta niam chài jơi bơtiàn dê, kung bè broă mŭt lơh broă, lơh is geh ală video clip, rùp rài nàng yal să tờm gam lơh broă lơi nàng mŭt lơh broă. Ală bơyô gơtùi đơs nàng ală cau in git bè nùs nhơm pơnyờ să kung bè broă lơh bơh să tờm dê gam lơh nàng kơ̆p kờñ bơtàu tơnguh să tờm. Bơh tŭ hơ̆ ală bơyô yal rùp rài ƀòn lơgar bal mờ ală bơta krơi is ờs mờng nàng rùp rài bơh ƀòn lơgar tus mờ mpồl bơtiàn, hòi jà uă rơlao tai cau năc tus”.

Bơh ƀă suơn dềt ờ ơnàng tàm Ayun Pa tus mờ ală bơnơ̆ tàñ ồi tàm Ia Ly ha là săp uh kơl wờk mpong săp tàm brê bơnơm Pleiku… Ală cau kơnòm să jơi bơtiàn ờ gal cau tàm càr Gia Lai gam yal is jơnau niam chài bơh ƀòn lơgar dê jăt broă lơh pa ngan, hơ̆ là: bơceh lơh, lơh pa mờ pơnyờ să. Ală cau do là ală cau ala măt niam chài Tây Nguyên dê, pơgồp bal kwơ màng tàm broă ai rùp rài càr Gia Lai tus rềp mờ cau năc lòt nhơl tàm lơgar bal mờ lơgar bơdìh.