Ngai chờ Niam chài ală jơi bơtiàn dồ êt nă cau càr Gia Lai là dùl tàm ală broă mờ mpồl nhơl gùng đơs crih kòn cau jơi bơtiàn dồ êt nă cau ƀòn Roh, sơnah ƀòn Pleiku sùm geh mat mờ lời wơl bơta kah kir niam ngan tus cau sền. Cing, đờng T’rưng, đờng pút mpong ntas gơ bơrlŭ bal, lơh gơlik bơta gơ hòi gơ jà is ồn ngan.

Cau chài Siu Thưm, lam bồ mpồl pà git, nàng lơh gơs dùl mpồl nhơl gùng đơs crih niam, bơta kuơmàng ngan rlau jơh là bơta nhơl bơrlŭ bal chài rơgơi ală bơta đờng goòng krơi is. Mpồl nhơl gùng đơs crih ƀòn Roh dê geh đờng T’rưng tờm, đờng pút, đờng t’rưng dềt bal mờ phan teh, phan jañ pơgồp bal bè sơng gơr, cing, bơr lềm, chập chệ. Tơl bơta đờng goòng cèng dùl sap ntas krơi is, sồr cau nhơl ờ mìng git loh bơta chài mờ gam pal pơgồp bal bơnĕ bơnài, ndrờm bal mờ gơp nàng lơh gơlik dùl mpồl tơrgùm dùl: “Bơh chờm, pờ ơdŭ ờ huan geh cau, mơya rơhời gơguh uă gơ gơs mpồl lòt bơyai lơh. Tŭ do den neh geh 2, 3 mpồl lòt lơh làm bă tiah. Ală bơyô kờñ đờng goòng, kờñ bơta niam chài kòn cau he dê. He kung yal dồ êt ală bơyô in git, sùm kờñ gơboh bơta niam chài mò pàng he dê lời wơl, ală sau bañ sang tĕ đờng goòng nàng kơnòm dềt in chờ hờp lòt jat”.

Tờm gle kra den ƀang but. Tŭ ală cau chài dờng sơnam rơhời ờ gam tai, ală cau chài dềt bơh anih prap ơn gùng đơs pơnđik, gùng đơs crih ală jơi bơtiàn càr Gia Lai dê neh tàm pơ dờn wơl chài ngan. Tàm ƀòn Jut 1, sàh Ia Hrung, càr Gia Lai, bulah pa rơp 15 sơnam, Siu Ting Ning neh geh uă nam lòt jat bèp tus bal ală broă niam chài, dròng cing jañ mồng tàm ală dơ̆ bơyai lơh kuơmàng ƀòn dê. Ting Ning bal mờ bơyô gam khin cha crơng gơs mpồl cing kơnòm să, lòt lơh tàm ală hìu tac phan ñô sa tàm Pleku, mờ kung tus bal ală dơ̆ lơh chờ, ală broă lơh tìp mat lơh kwèng niam chài tàm càr mờ bơdìh càr: “Mpồl cing mồng oh dê là ală bơyô deh bơh nam 2008 tus nam 2011. Cau ùr den geh 7 nă, cau klau den geh 5 nă. Mpồl lòt lơh pa do ngan rlau jơh là tàm ƀlàng dờng Tam klac dờng tàm Pleiku, tàm ƀòn lơgar, ngài ngan rlau jơh là tàm Quảng Ngãi, Quảng Trị. Oh yal tơnggit bè gùng đơs crih ờs mờng bơh yau kòn cau dê mờ oh yal, pơlam khi in bơta chài nhơl. Oh gŏ chờ hờp ngan mờ pơn yờ să ngan bè bơhiàn bơh yau kòn cau he dê. Oh kơp kờñ bơhiàn do rơp geh prap gàr sùm tàm tơnơ̆ do”.

Niam chài bơh yau bơh ală jơi bơtiàn tàm càr Gia Lai dê tŭ do ờ mìng ơm tàm broă lơh wơl, ngui niam bơta kuơ ờ di phan bơna lơm gời, mờ neh tam gơl gơ gơs bơtàu tơnguh lơh sa. Tàm ƀòn K’Dang, sàh Tơ Tung, càr Gia Lai neh mpờl gŏ sơm pòl ồs lòt nhơl mpồl bơtiàn mờ ală bơta niam chài krơi is bơh kòn cau Bahnar dê.

Tàm Homestay A Ngưi, nac lòt nhơl ờ mìng sền mờ gam geh kis bal mờ bơta niam chài kòn cau Bahnar dê, tàm sap cing mồng, tàm tơl nơm rùp wac mòn, tơl rùp bơka tàm blah ồi kòn cau. A Ngưi git ngui ală mạng sàh hội bè Zalo, Facebook, website, fanpage mờ ală bơta măi sồ bè lòt nhơl nàng yal tơnggit tus cau nac lòt nhơl in, ngan là nac lòt nhơl tàm tiah ngài mờ nac ală lơgar. Bi yal: “Añ gam kờp dŭ rơp lơh dùl sàl bơceh lơh, sàl rlô bơkàng ai ală sau in rê sền git niam chài tàm ƀòn lơgar, git tamya xoang, git dròng cing jañ mồng, trŭ gơm ală phan sa ờs mờng bè piang prùh tàm ding đơr, iar buh. Bơh ală broă ƀuơn, rềp mềr bè hơ̆, añ pin dờn là, ală bơyô rơp kờñ mờ git sền dờng màng ală bơta kuơ mờ bèp ồng neh lời wơl mpồl bơtiàn mờ cau kơnòm să in”.

Lòt bal mờ ală bơyô kơnòm să, Mpồl lơh broă Đoàn ơruh pơnu kung lam lơh uă broă lơh ngan ngồn, pơgồp bơnah sền gàr mờ lơh gơ rề bơta kuơ niam chài bơh yau. Bi Đỗ Đức Thanh, Phó Ƀí thư Tỉñ đoàn càr Gia Lai pà git: “Mpồl lơh broă Đoàn, đội neh lam lơh uă broă lơh bè anih nhơl, gùng rê hờ tơngu rơyas tờm, ală dơ̆ mblàng yal, broă lơh sền git ngan ngồn, pơgồp bơnah prap gàr niam chài bơh yau. Ală bơyô kơnòm să neh ai tơnggŏ bơta kờñ gơboh dà lơgar, ƀòn lơgar, kờñ bơta niam chài kòn cau he dê. Bol hi gŏ là, ală broă lơh do rơp dong ală bơyô yal tơnggit rùp să, bơta niam chài bơh yau tus làm gùt ală tiah tàm lơgar”.

Tàm bơta tàm pơn jat bơh rài kis pa tŭ do dê, niam chài bơh yau tàm càr Gia Lai gam geh tàm pơ dờn wơl ai cau kơnòm să in, mờ să tờm ală cau kơnòm să kung gam crăp rơcang jòi broă nàng niam chài pơn jat tai geh mat tàm rài kis. Mờ bơta pơn yờ să, bơta bơceh lơh mờ nùs nhơm khin cha, khi gơ gơs là rbàng tơrbŏ niam chài ù tiah brê bơnơm mờ dunia pa tŭ do, nàng niam chài bơh yau ờ mìng là jơnau kah kir mờ gam gơ tàm pơn jat sùm tàm tơnơ̆ do.