Broă do là bơhiàn ờs mờng lơh tềl bơta geh mat ngan ngồn bơh mpồl tàp pràn să jan ala mat 11 lơgar Đông Nam Á tus bal ASEAN PARA Games. Jat jơnau yal bơh mpồl bơyai lơh dê, tơl lơgar geh 30 nă cau pơrlòng, kwang bàng tus bal dơ̆ kơt bồng bi. Dơ̆ pơrlòng tàp pràn să jan cau kuet kơlte Đông Nam Á (ASEAN PARA Games dơ̆ 12) rơp geh lơh tàm lơgar Campuchia tàm ală ngai bơh ngai 03 tus ngai 09/6 do.

Jat jơnau yal bơh lơgar tờm lơh dê, ASEAN PARA Games dơ̆ 12 geh bơta tus bal bơh mờr 2 rbô 600 nă cau dê, tàm hơ̆ geh 1 rbô 400 nă cau pơrlòng tus bơh 11 lơgar tàm tiah Đông Nam Á. Ală cau pơrlòng rơp pơrlòng tàm ală môn ntoat, plai tơrnò, boccia, kờ vua, coh plai 5 nă, coh plai 7 nă, judo, yờ tạ, re dà, plai kơ ƀàng, nhơl bơlai nggui, ƀŏng rổ rơndeh chồl mờ tê, E-sport. Ngai 31/5, Mpồl tàp pràn să jan cau kuet kơlte Việt Nam neh lòt gùng tus lơgar Campuchia nàng tus bal pơrlòng mờ 159 nă cau, tàm hơ̆ geh 16 nă kwang bàng mpồl, 21 nă cau pơlam tàp mờ 122 nă cau pơrlòng tus bal pơrlòng tàm 8 môn tàp pràn să jan geh ntoat, re dà, yờ tạ, plai tơrnò, plai kơ ƀàng, kờ vua, judo mờ boccia.