Đơs tus bơhiàn lơh yàng gơ rềng tus lơh broă sa suơn sre, cau Sơdàng sùm lơh dùl bă ờs mờng sùm mờ ală dơ̆ lơh yàng king crŭ, yŭ rơyùm ngan, jơh nùs ki ngàm nàng duh khoai, ưn ngài brah yàng, dùl tàm khà hơ̆ là dơ̆ lơh yàng ƀă bòng dà. Jat bơhiàn ờs mờng, ƀă bòng dà là dơ̆ duh khoai yàng geh cau Sơdàng bơyai lơh tŭ dà gam ngui ờ gam gàr bơta niam mờ ờ tơl tai halà tŭ pa lơh ƀòn halà tŭ rơcang mut tàm tơngai mờr tùc tam kòi, sùm là nhai 3, nhai 4 pah nam.

Cau chài ồng A Kên ơm tàm kơnhoàl Đăk Tô, càr Kon Tum đơs là, ƀă bòng dà gam geh cau Sơdàng lơh tàm tơngai lồi nam tây tŭ khi bơyai lơh yàng chờ sa piang kòi pa. Tŭ do, jơh gùt làng bol tàm ƀòn bal mờ gơp tus mbòr dà pơs wàs nàng rơcang lơh yàng tuah wàs mbòr dà. Cau chài ồng A Kên đơs: “Geh lơh lài mờ ngai sa tềp nàng rơcang wă rò nam pa den tàng pal lơh wơl bòng dà pa. Rơngòt bòng dà yau gơtìp dà bơkang, nha chi, gơ klar phan ƀơ̆; rài yau tàm ƀòn geh dà mbòr bơh dà ƀă mờ bòng mut tàm ƀòn, hơ̆ là rài yau, ai tŭ do den uă ngan là ngui dà tơrlung lơm”.

Cau Sơdàng kơlôi sơnơng là, dà kuơmàng rlau mờ khat dùl bơta phan ndai lơi, là phan kuơmàng ngan rlau mờ piang sàu àu soh. Rài kis geh niam bơnĕ, gơs tơlir kung là kơnờm dà sàng mờ gơs. Bè hơ̆ den tàng broă bơyai lơh yàng ƀă bòng dà là nàng ală yàng dà, yàng bơnơm, yàng dà dờng in git tiah hơ̆ geh làng bol ơm kis mờ ai pà pràn kơldang, lơh sa bơtàu tơnguh mờ rlau mờ hơ̆ den làng bol tàm ƀòn sùm tàm kờñ gơboh bal mờ gơp, tam klac mờ tam pà bal mờ gơp.

Ồng Phan Văn Hoàng, Phó Kwang atbồ Sở Văn hóa, Thể thao mờ Zu lịc càr Kon Tum pà git: Pah nam tơnơ̆ tŭ tơnhàu jơh phan tam, cau Sơdàng bơyai lơh yàng ƀă bòng dà pa nàng hòi dan trồ tiah mìu niam càl niam, kàl lơh sa tơnhàu geh uă, kòn bơnus geh rài kis hờm ram, chờ hờp. Tài gơ wèt mờ cau Sơdàng, dà pa pal geh gròi sền, pơs wàs pah nam. Geh bè hơ̆ den hơ̆ sồng dà sùm sàng goh, lơngờm, ală brah yàng rơp ờ đơs lah làng bol tàm ƀòn mờ sùm sền gàr, dong kờl làng bol tàm ƀòn in. Tài bè hơ̆ den tàng nam lơi làng bol kung sùm lơh niam, pơs wàs wơl mờ lơh yàng ƀă bòng dà pa. Ồng Phan Văn Hoàng đơs: “Tài đơs ngan gơ wèt mờ làng bol tàm do den brê ndu gơn rơh ngan, khi rơngòt ngan ờ khin mut, bè hơ̆ den tàng dà tàm hơ̆ geh chi che gàr niam ngan, bè broă do den tàng làng bol bal mờ kra ƀòn neh tàm bơyai, rơ wah 1 ngai nàng lơh nền lơh yàng mờ khi lòt lơh niam wơl bòng dà”.

Tŭ kra ƀòn neh lơh nền ngai lơh yàng, bơh sơn rờp den rơp pơrjum, cribơyai mờ jơh ală hìu bơnhă tàm ƀòn. Tŭ do den jat bơta jàu kơnòm bơh Mpồl duh broă kra ƀòn dê tơl nă cau dùl broă, khi rơp bal mờ gơp pơgồp bal rơcang phan pơ dơng ai ngai lơh yàng in.

Dùl bòng dà sàng goh bal mờ dà geh tuah wàs hòr niam là bơta kuơmàng ngan bơh làng bol tàm ƀòn dê. Bè hơ̆ den tàng ală klau pơnu bal mờ ală cau geh bơngă pin dờn rơp rơ wah nàng lòt jòi phan lơh bòng dà, sùm là ală tờm kơrla dờng mờ jòng.

Nàng geh dùl dơ̆ lơh yàng wil tơl, ală bơnah broă rơcang ai ngai lơh yàng ngan pal ngan ngồn wil tơl mờ nền nòn, bơh jơnau đơs tus broă lòt rê kung bè ală jơnau rac yàng nàng ală brah yàng in gơtùi gŏ bơta jơh nùs bơh làng bol tàm ƀòn dê. Bơdìh hơ̆ tai, broă rơcang phan kis pơ dơng lơh yàng ƀă bòng dà kung là broă kuơmàng ngan, mờ phan geh rơ wah hơ̆ là sŭ. Gơ wèt mờ cau Sơdàng, sŭ là phan sàng goh mờ bơtuah bơtuài den tàng pal geh gơ nàng lơh yàng tuah wàs dà ai làng bol tàm ƀòn in bơdìh mờ iar, sur. Cau chài ồng A Kên pà git tai: Dơ̆ ai phan pơ dơng lơh yàng là dùl nơm sŭ tài do là phan cèng wơl bơtuah bơtuài, cèng wơl hờm ram ai làng bol tàm ƀòn in nàng ờ gơtùi đe sa kap aniai phan tam.

Tŭ ală phan pơ dơng lơh nàng neh geh rơcang wil tơl, lài mờ ngai lơh yàng, cau ùr geh sồr jì wàs mờ koh tờm chi lơh jrong đơng, cau klau den kơl tờm kơrla kràñ nàng mòn bòng ƀă lam dà rê tàm ƀòn. Tàm anih sơn rờp mờ anih dut ndơp bòng dà dê, làng bol tàm ƀòn rơp lơh tờm chi gơnơng, lơh mờ tờm gle nàng kờñ blơi dà mờ yàng dà. Tàm tờm chi gơnơng, cau Sơdàng yồng ală kòng wil dềt geh mòn mờ ding kơrla mờ geh tàm tơrbŏ bal mờ gơp. Do geh sền là tềl tơnggŏ nàng yàng dà, yàng brê git nàng sền gàr tơl nă cau in, nàng ai pà mìu niam chàl niam, ờ lơh gơbàn bơta trồ prang dờng soat dà mờ dà kŏ dà cò tus làng bol tàm ƀòn, dà ờ tŭ lơi soat mờ sùm wil tơl.