Dơ̆ dờp lơh oh mi bơh cau Rơđê dê geh bơyai lơh tềng đap bơta sền gŏ bơh jơh bal 2 hìu bơnhă, làng bol jơi nòi tàm ƀòn rềp ngài dê. Do là dùl bơhiàn lơh yàng gơ jat bal mờ nùs nhơm oh mi, jơi nòi tus rài kòn sau. Cau bơ jơu ồng Y’Wươn Niê Kdăm (60 sơnam, ơm tàm ƀòn Wiâo A, thị trấn Ea Hồ, kơnhoàl Krông Năng, càr Dăk Lăk) pà git, phan pơ dơng lơh yàng geh ồi kòn cau tàñ mờ tê, kòng lơngô mờ iar. Bulah bè hơ̆, dilah ờ geh tơl phan pơ dơng lơh yàng kung gam gơtùi bơyai lơh yàng sơl, tài cau Rơđê đơs là, bơta kờñ gơboh là kuơmàng ngan rlau jơh. Broă lơh yàng geh lơh jat nùs nhơm kờñ is bơh jơh bal 2 gah dê, ờ di tài hàm kờñ bơta kuơ lơi. Mờ kuơmàng, ală cau dờp lơh oh mi pal geh mat lài mờ 5 jơ drim nàng sền cau tờm hìu lơh poac sur, rơcang ală phan pơ dơng lơh yàng, kơt drăp tơrnờm: “Tŭ dờp lơh oh mi den hòi jơh bal 2 hìu bơnhă, jơi nòi tus sền mờ git là, bơh tŭ do rê hờ ngkời, 2 hìu bơnhă git he là oh mi jơi nòi bal mờ gơp. Dùl mè bal, dùl bèp bal. Tơnơ̆ hơ̆ nàng 2 nă oh mi tàm kờñ gơboh bè oh mi tờm pròc mhàm, pà gơp in ồi kòn cau, tơn dò kòng lơngô”.

Tŭ tơl nă cau neh gàr kơ̆ anih nggui, cau ùr sùm geh nggui hờ đah jum hìu jòng, ai cau klau nggui tiah đah tô hìu jòng, ală nghệ ñân dròng cing yal tơnggit broă lơh yàng rơp sơn đờm. 2 nă cau dờp lơh oh mi nggui rềp sơlàu piang duh khoai mờ ală phan pơ dơng lơh yàng. Ală cau tus bal nggui gùt dar nàng sền dơ̆ lơh yàng in geh cau bơ jơu, cau kra ƀòn, cau atbồ ƀòn halà ală cau geh bơngă pin dờn. Cau bơ jơu ồng Y’Wươn Niê Kdăm pà git, tàm dơ̆ lơh dờp lơh oh mi, bơhiàn tơn dò kòng lơngô ai cau dờp lơh oh mi in king crŭ ngan. Kòng lơngô geh tơn dò là dùl phan lơh tềl kuơmàng ai tơnggŏ bơta tam klac rềp mềr đah 2 nă cau dờp lơh oh mi. Ồng Y’Wươn Niê Kdăm mblàng lơh loh: “Lài mờ tŭ tơn dò kòng den lơh yàng mờ iar, drăp tơrnờm nàng yal mò pàng in. Tơn dò kòng yal yàng in bơh tŭ do rê hờ ngkời là oh mi dùl hìu, geh sùm tam pà bal mờ gơp ală bơta tàm rài kis. Broă tơn dò kòng là kuơmàng ngan, kung bè ală jơnau hơ pơrgon bơh ùr bơklau dê, 2 nă cau dờp lơh oh mi hơ pơrgon geh sùm kờñ gơboh, gròi sền, dong kờl gơp. Mờ bơh tŭ do jơh gùt ƀòn rềp ngài ndrờm git tus 2 nă cau là oh mi dùl hìu”.

Tơnơ̆ dơ̆ lơh yàng, 2 nă cau dờp lơh oh mi bè oh mi tờm pròc mhàm, chờ hờp halà moat jùm tam pà bal, kờñ gơboh, dong kờl bal mờ gơp tŭ kal ke, tàm tơngkah gơp lơh sa, sền gàr gơp tus rài kòn sau tơnơ̆ do. Ồng Y’Wươn Niê Kdăm pà git tai: “Tŭ do, làng bol kung gam bơyai lơh dơ̆ lơh yàng dờp lơh oh mi. Jat añ den dơ̆ lơh yàng dờp lơh oh mi kuơmàng ngan, tơnguh nùs nhơm tam klac ƀòn lơgar, làng bol bal mờ gơp sền gàr mờng kwèng niam tàm rài kis ƀòn lơgar. Dùl tờm chi ờ gơtùi mòn gơs bơnơm, 3 tờm chi tơrgùm wơl gơs bơnơm jơnhua. Kơp kơnờm kòn sau tơnơ̆ do geh bal mờ gơp bơsram bơta chài dròng cing, bơsram bơta chài đơs tòng bơr, bơsram ală bơta niam chài rơgơi kòn cau he dê”.

Dơ̆ lơh yàng dờp lơh oh mi ai gŏ cau Rơđê sền dờng màng nùs nhơm kờñ gơboh tàm ƀòn lơgar mờ cèng bơta niam chài, bơto bơtê kòn sau sùm kah bè ală bơta niam bơnĕ tàm rài kis. Tŭ do, broă lơh yàng do kung sùm geh lơh tàm ală ƀòn. Tơnơ̆ tŭ lơh yàng dờp lơh oh mi, ờ mìng 2 hìu bơnhă gơ gơs oh mi dùl hìu, tàm dong kờl gơp tàm tơl broă, bal mờ gơp sơr lèt gan tơl kal ke mờ gam tam klac bal mờ tơl nă cau tàm jơi nòi bal, dùl nùs bal bơt bơtàu ƀòn lơgar ngai sơlơ hờm ram, pas sơm niam bơnĕ.