Geh lam lơh bơh ngai 23/11/2022 mờ jŏ jòng tus ngai 21/02/2023, dơ̆ pơrlòng rùp niam chài “Kơphê Việt Nam- Gùng lòt bơceh mòn phan lời wơl niam chài dunia” geh 4 tơngume bè gah kơphê Việt Nam, wèt tus jơnau kờñ jờng rơ kơphê Việt Nam. Do kung là dùl tàm 18 broă lơh tờm bơh Dơ̆ lơh chờ Kơphê Buôn Ma Thuột dơ̆ 08 nam 2023 dê. Tơnơ̆ 03 nhai lam lơh, mpồl bơyai lơh neh dờp geh rlau 1 rbô 100 pang rùp pơyua pơrlòng bơh 170 nă cau dê tus bơh 30 càr mờ ƀòn dờng tàm gùt lơgar pơyua tus dơ̆ pơrlòng in. Bơh sac rwah neh sac rwah geh 76 pang rùp niam chài nàng ràng tơlik tàm dơ̆ ràng tơlik mờ jàu 15 khà jờng ai ală pang rùp jak ngan rlau jơh in, geh 4 khà jờng dờng màng ndrờm pal mờ 4 tơngume, 10 khà jờng pơn jờng mờ 1 khà jờng bơh cau sền rùp dê sac rwah. Jăt jơnau đơs bơh mpồl bơyai lơh dê, geh uă ngan pang rùp niam, bềng nùs nhơm ngoh rơngăc, dong lơh gơrề rùp să kơphê Việt Nam, lơh gơrề rùp să kơphê Buôn Ma Thuột tus mờ ală cau kờñ gơboh mờ kờñ ngan kơphê tàm gùt dunia in.