Dơ̆ pơrlòng nam do hòi jà geh mờr 500 nă cau tus bơh 13 càr geh gal làng bol kòn cau ơm kis tàm tiah đah jum bơh ƀòn dờng Đà Nẵng mŭt đah jum, tàm hơ̆ geh: Phú Yên, Lâm Đồng, Ninh Thuận, Bình Phước, Gia Lai, Quảng Nam, Kon Tum, Khánh Hòa, Đak Nông, Bà Rịa-Vũng Tàu, Bình Định, Đăk Lăk mờ Quảng Ngãi. Di lah pơn drờm mờ dơ̆ pơrlòng dơ̆ XII geh bơyai lơh tàm càr Quảng Ngãi tàm nam 2022, pơrlòng dơ̆ do neh geh tai càr Bà Rịa – Vũng Tàu tus bal.

Tàm dơ̆ pơrlòng nam do, ală cau pơrlòng geh bơyai lơh tàm 07 môn, tàm hơ̆ geh: Ntoăt, coh plai cau klao, nhơl bơlai cau klao – cau ùr, pañ sơna kam, lòt cah càng èt, chồl gai mờ duĭ che. Dơ̆ pơrlòng tàp pràn să jan ală jơi bơtiàn kòn cau gùt lơgar dơ̆ XIII, tiah II nam 2023 kờp dŭ geh bơyai lơh tus jơh ngai 23 nhai 06.