Jơnang đơs crih tàm Festival Bơkào Dà Làc dơ̆ X nam 2024 geh sền là dùl tàm ală jơnang đơs crih geh lơh dờng ngan bơh lài tus tŭ do tàm ƀòn dờng Dà Làc mờ ơnàng tus mờr 2 sào. Bơta tơngŏ tờm ngan bơh jơnang đơs crih do dê geh 5 nơm rùp Led dờng, kờp jơh bơta dờng tus mờr 1 sào.

Phan pơdar dờng mờ phan Ba lăng đèng kung ngui tàm ală jơnau đơs crih. Jơnang đơs crih geh lơh niam ndrờm bè tàm lơma ngan sơl, mờ ală bơta àng gơcrà bơh ală mpồl phan bơka dềt là ală bơta bơkào krơi is ƀòn dờng Dà Làc dê bè: bơkào dum ti, bơkào Mimosa, bơkào Cẩm Tú Cầu, bơkào chi bơtăng, tàm hơ̆ rùp “Bơkào Chi bơtăng” geh lơh nàng ai tơngŏ nùs nhơm tam klăc bal mờ brồ să bơh kòn bơnus kis tàm ƀòn dờng dà Làc dê. Mang sơn đờm lơh Festival Bơkào Dà Làc dơ̆ X nam 2024 mờ jơnang đơs crih uă cờn mờ uă bơta àng gơcrà lơh geh bơta niam ờ gơtùi jơh ai git nđờ rơbô nă cau in tus sền.