Drim do, tàm Tiah Tềl lời wơl kah yau Dà lơgar is ồn Hìu duh khoai Bơtau Hùng (càr Phú Thọ) geh bơyai lơh Dơ̆ Duh kah Bơtau Hùng mờ Pơdơng bơkào tàm Rùp trah mòn “Wa Hồ tơm bơh bơr mờ Kwang bàng, cau ling Mpồl ling dờng Lam lài”. Tàm jơh ală tơngai jòng rài kah yau bơt bơtàu lơgar mờ sền gàr lơgar, nùs nhơm ưn ngài dà kơl hề mò pàng dê neh gơ gơs dang che tàm bơrkoăt bal, tiah kơl dìng nùs nhơm, bơta pràn is ồn bơh jơi bơtiàn dê, lơh geh ală cồng nha crih crài cèng mat Việt Nam tàm broă tam klăc bal rcang lài pleh mờ trồ tiah lơh aniai, bol sò tơm sơgràm phà, sền gàr mờ bơt bơtàu Dà lơgar.

Bơta pràn đah hwềng bơh Duh kah Bơtau Hùng dê bè jơnau hòi jà bơh plai nùs bơh tơl nă oh kòn Lạc sau Hồng dê wèt rê mờ mò pàng, rê mờ Dà lơgar mờ 2 nơm akhar dờng màng mờ rềp mềr “Làng bol”. Duh kah Bơtau Hùng ờ mìng là ngai chờ dờng bơh jơi bơtiàn dê lơm mờ gam là dơ̆ nàng lơh gơrề uă nùs nhơm kờñ gơboh dà lơgar, nùs nhơm lơh is pràn is mờ bơta kơ̆p kờñ brồ guh- bè jơnau Wa Hồ dê neh nting tơngkah: “Ală Bơtau Hùng neh geh dà kơl hề bơt bơtàu dà lơgar, Wa mờ sau he pal bal mờ gơ̆p gàr tĕ lơgar”.

 Lài hơ̆, bơh ngai 17/4 (hơ̆ là ngai 1/3 nam Ơseh), Broă lơh Duh kah Bơtau Hùng- Dơ̆ lơh Yàng duh khoai Hìu duh khoai Bơtau Hùng mờ Tơngleh Niam chài- Lòt nhơl Ù tiah Bơtau sơn rờp Dà lơgar nam 2026 neh geh bơyai lơh ală broă tàm pơrlòng dờng tàm Tiah Tềl lời wơl kah yau Hìu duh khoai Bơtau Hùng mờ ală sàh, sơnah ƀòn tàm càr Phú Thọ. Broă lơh nam do geh uă bơta pa pơn rơ, pơgồp bal đah prap gàr bơta kwơ bơhiàn ờs mờng bơh yau mờ pờ ơnàng tìp mat lơh kwèng ală lơgar dê.

 Do là nam sơnrờp càr Phú Thọ bơyai lơh dràng tơlik rùp wăc sềr ală lơgar, yal tơngĭt uă rùp hin Ù tiah Bơtau sơnrờp Dà lơgar tus mờ bơyô ală lơgar. Uă broă lơh niam chài ờs mờng bơh yau pơn jat tai geh gàr niam mờ bơyai lơh duh hồl, bè: Chờ sàl niam chài, ràng tơlik, yal tơngĭt uă, yal tơngĭt ală phan bơna ƀòn lơgar; Dơ̆ pơrlòng Đơs crih tam ya mpồl bơtiàn; Dơ̆ pơrlòng klơm, gơm mbar kơnâm lơmpòng- ƀŏ piang lă... Dơ̆ chu ñàng kah kơlôi ală Bơtau Hùng bơh ală sàh, sơnah ƀòn tàm càr Phú Thọ geh bơyai lơh jat 18 mpồl sàh, sơnah ƀòn.

 Dùl tàm ală bơta tờm là Dơ̆ lơh chờ Niam chài bơh yau gùng drà geh lơh wơl. Broă lơh do tàm tơrbŏ bal mờ broă lơh “Rùp să Lòt nhơl Ù tiah Bơtau sơn rờp Dà lơgar dê”, pơgồp bơnah gơ hòi gơ jà uă ngan làng bol mờ năc lòt nhơl tus bal; mơkung prap gàr, lơh niam ală bơta kwơ phan lời wơl niam chài niam ngan bơh tiah Ù tiah Bơtau sơn rờp Dà lơgar dê- mò pàng jơi bơtiàn Việt Nam dê, di pal mờ pơlam gùng dà bơtàu tơnguh niam chài jat Jơnau lơh nền tàm pơrjum sồ 80 bơh Ƀộ Cíñ trị dê.

 Pin dờn jat Yàng gah duh khoai Bơtau Hùng geh UNESCO cih mat là Phan lời wơl niam chài ờ di phan bơna ala mat bơh jơi bơtiàn kòn bơnus dunia dê bơh nam 2012. Ngai Duh kah Bơtau Hùng là dùl bơta kah yau krơi ờ hoan geh ngan pơndrờm mờ uă dà lơgar jơi bơtiàn tàm dunia. Ngan ngồn bơh dơ̆ lơh Yàng duh khoai Hìu duh khoai Bơtau Hùng dê tơngŏ 4 tơngume kwơ màng: Nùs nhơm gĭt kah ưn ngài; Nùs nhơm hùc dà kah tô dà; Nùs nhơm ală rơnàng dê wèt rê mờ mò pàng jơi bơtiàn mờ tơngŏ bơta is bơh gah pin dờn jat Yàng duh khoai mò pàng bơh cau Việt Nam.

Phó Pơgru dờng- Tiến sìh Bùi Hoài Sơn, ala mat mìng lơh dùl kơnòl broă Anih duh broă Niam chài- Bơto bơtê đơs là: “UNESCO jờng rơ uă ngan gơnoar bơh ală mpồl bơtiàn ală jơi bơtiàn Việt Nam dê tàm broă cih mat jờng rơ dùl gah pin dờn jat Yàng duh khoai Bơtau Hùng gơ gơs pơrya bơh jơi bơtiàn dê. Mờ bơh pơrya jơi bơtiàn hơ̆ lơh geh bơta tam klăc bal ai jơh gùt dà lơgar do in mờ dong ai bol he in geh dùl bơhiàn tam lơh bơt bơtàu lơgar mờ gàr lơgar tus tàm tơngai tŭ do tơn. Mờ dùl bơta tai là UNESCO jờng rơ uă ngan là pin dờn jat Yàng duh khoai Bơtau Hùng sùm tàm rài lài do geh lơh geh tàm rài kah yau mơya tus tơngai tŭ do kung gam geh sơl kung geh ală mpồl bơtiàn làng bol ală jơi bơtiàn Việt Nam lơh jat tai”.