Tàm kơnhoàl ù tiah bơnơm đah măt tơngai Mŭt càr Quảng Ngãi dê, làng bol ală jơi bơtiàn bơyai lơh dơ̆ Duh kah Bơtau Hùng – Bơtau sơnrờp dà lơgar he dê, wèt hờ nggu rơyas jơi bơtiàn, gơhòi gơ jà gal năc lòt nhơl tus bal. Bal mờ lòt còp tiah lòt nhơl tiơng pơnrơ ngan, sền gŏ niam chài ală jơi bơtiàn ơm kis bơh jŏ tàm do dê, uă năc lòt nhơl kung lời tŭ jiơ tus ală tiah lơh sùm bơhiàn ờs mờng duh khuai Bơtau Hùng, bè Hìu duh khuai Lương Khế tàm sơnah ƀòn Kon Tum, hìu yàng Phờk Kwơ̆ Kỳ Quang, sàh Đăk Hà, nàng bal mờ làng bol ƀòn lơgar chu ñàng kah hờ nggu rơyas jơi bơtiàn dê. Bi Y Kha, tàm sàh Đăk Mar, pà gĭt:

“Bol hi tus bal dròng cing jañ mồng, tam ya xoang nàng kah kơlôi mờ jờng rơ dà kơlhề bơh ală rơnàng mò pàng dê neh geh dà kơlhề dờng ngan gơ wèt mờ ƀòn tờm, mờ dà lơgar”.

 Tàm Tiah tềl lời wơl kah yau niam chài dà lơgar Hìu duh khuai Lạc Giao, sơnah ƀòn Buôn Ma Thuột, gơnoar ătbồ mờ làng bol càr Dăk Lăk yŭ rơyùm bơyai lơh dơ̆ Duh kah Bơtau Hùng, Bơtau sơnrờp dà lơgar he dê nàng kờñ kah rơngal ală Bơtau Hùng neh geh dà kơlhề bơ̆t mòn lơgar. Dơ̆ bơyai lơh geh lơh tàm nùs nhơm ki ngàm bal mờ dơ̆ sơnđờm lơh bơh broă jañ sơnggơr, dròng cing jăt broă lơh ơn pơdơng duh khuai ờs mờng bơh yau; chu ñàng, pơdơng phan lơh yàng bơh làng bol tàm ƀòn lơgar càr Dăk Lăk dê; dơ̆ bơyai lơh yal dà kơlhề, jơnau cih kah wơl jơnau kah yau khin cha jak chài jơi bơtiàn dê. Tàm do gam geh lơh ală broă lơh cih jơnau nrĭ, yal tơnggĭt phan sa ờs mờng cau rài yau dê, đơs ai in sền jơnau đơs crih chèo, kwan họ, tìp măt lơh kwèng bal mpồl đờng tíñ, đơs then…mờ ràng tơlik ală phan bơna OCOP càr Dăk Lăk dê.

 Tàm Hìu duh kah Âu Lạc tềng hơđăng dung bơnơm Phượng Hoàng gơ wèt Tiah lòt nhơl ñrùh dà Prenn Dà Làc, càr Lâm Đồng dê yŭ rơyùm bơyai lơh Dơ̆ lơh chờ Duh kah Bơtau Hùng, Bơtau sơnrờp dà lơgar he dê, gơhòi gơ jà uă năc lòt nhơl mờ làng bol geh măt bal. Tơnơ̆ broă lơh yàng lòt rò phan lơh yàng, pơdơng phan lơh yàng duh khuai Bơtau sơnrờp dà lơgar dê mờ ơn pơdơng phan duh khuai ờs mờng bơh yau, đơng lam mờ làng bol càr Lâm Đồng bal mờ gal ngan năc lòt nhơl neh nă dồ nă chu ñàng Bơtau sơnrờp dà lơgar dê. Tàm do, gam geh ală broă lơh đơs crih tam ya cau rài yau dê, ală jơnau nhơl bè nhơl kờ tướng, hàu jrong bong tơngi, pờ glah, dar drà phan sa, ù tiah yal tơngĭt dà ce Việt Nam, jơnau nrĭ mờ ràng tơlik rùp…lơh tơnggŏ wơl ală bơhiàn niam chài cau rài yau dê niam bơnĕ is ngan.

 Tàm hìu duh kah Bơtau Hùng tiah nhàr lơgar Tuy Đức, càr Lâm Đồng, làng bol ală jơi bơtiàn ki ngàm ngan bơyai lơh dơ̆ Duh kah Bơtau Hùng, Bơtau sơnrờp dà lơgar dê. Hìu duh kah bơh làng bol ƀòn tờm Phú Thọ dê lơh bơh nam 2018 tàm ƀlàng ơnàng rlau 2 sàu 1. Do neh gơgơs tiah geh lơh uă broă lơh kah hờ nggu rơyas, prăp gàr mờ lơh jăt bơhiàn ờs mờng bơh yau, pơgồp bơnah lơh kơ̆ kơl jăp mpồl tam klăc dờng jơi bơtiàn tàm nhàr lơgar. Ồng Chử Anh Chương, cau tàm Mpồl ătbồ is hìu duh kah Bơtau Hùng tàm Tuy Đức, pà gĭt:

“Jơh tơl nă cau ndrờm kah hờ nggu rơyas, gĭt wă làng bol he dê, là: Bulah cau lơi lòt tiah do tiah ne, kah ngai duh kah Bơtau sơnrờp dà lơgar ngai 10 nhai 3 den rê. Làng bol cau lơi kung ndrờm đơs bè hơ̆ lơm”.

 Ngai do, làng bol ƀòn tờm Phú Thọ gam ơm kis tàm ală sàh đah măt tơngai mŭt càr Gia Lai tơrgùm rê hờ Hìu duh kah Bơtau Hùng tàm sơnah ƀòn Pleiku, kun bồ jơh nùs ki ngàm lơh yàng chu ñàng. Tàm do, kah wơl nggu rơyas, làng bol tàm tơngkah bal mờ gơ̆p lơh jăt niam jơnau lơh nền, gùng dà broă lơh Đảng, Dà lơgar dê mờ tơrgùm bơ̆t bơtàu lơh sa hìu bơnhă, bơ̆t bơtàu niam chài tàm tiah làng bol ơm kis. Ồng Đỗ Xuân Thu, mpồl tàm yal tơngĭt Mpồl cau ƀòn bal Vĩnh Phú tàm càr Gia Lai, pà gĭt:

“Nam lơi bol hi kung bơyai lơh nàng kah kơlôi tus Bơtau Hùng, Bơtau bơh jơh gùt jơi bơtiàn Việt Nam dê. Bol hi sùm pơniờ să he là cau kòn ù Tờm, chờ hờp chờ hờn ngan”.