Gơ wèt mờ rlau 5 tơlak 300 rbô nă cau Việt Nam gam ơm kis mờ lơh broă tàm lơgar ndai, ngai Duh kah bơtau Hùng là “ngai niam ngan” nàng kah bè nggu rơyas. Gàr sùm bơta pin dờn duh khoai Bơtau Hùng tàm lơgar ndai là sền gàr bơta niam chài krơi is Việt Nam dê, dong rơnàng kơnòm să deh tàm lơgar ndai ờ huĭ nggu rơyas tờm he dê. 

Bơh nam 2015, Rơndap broă lơh Ngai Bơtau sơn rờp dà lơgar Việt Nam gùt plai ù geh lam lơh neh tàm tơrbŏ bal mpồl bơtiàn cau Việt Nam tàm uă lơgar nàng bal mờ gơp bơyai lơh Dơ̆ duh kah Bơtau sơn rờp dà lơgar jat dùl bơhiàn duh khoai bal. Ngai Bơtau sơn rờp dà lơgar Việt Nam gùt plai ù là broă niam chài geh gơtha krơi is, ờ mìng gơ wèt mờ mpồl bơtiàn cau Việt Nam gam ơm kis, bơsram sră, kơlôi sơnơng mờ lơh broă tàm lơgar ndai, chồl tơnguh bơta git gơp lơh bơyô ring lơngai đah Việt Nam mờ gơp bơyô ală lơgar.

Tus tŭ do, rơndap broă lơh neh tàm tơrbŏ tơn tàm internet Dơ̆ Duh kah bơtau sơn rờp dà lơgar mờ jờng rơ kòn sau Bơtau Hùng tàm mờr 50 lơgar tàm 5 kơnhoàl ù tiah tàm plai ù, sơlơ tàm tơrbŏ bal mpồl bơtiàn cau Việt Nam tàm gùt plai ù, mờ kung yal tơnggit rùp să Việt Nam tus gơp bơyô ală lơgar.

Gơ wèt mờ mpồl bơtiàn cau Việt Nam tàm lơgar ndai, Ngai duh kah Bơtau sơn rờp dà lơgar Việt Nam gùt plai ù geh gơtha nùs nhơm kuơmàng ngan. Gơ wèt mờ cau rơnàng dơ̆ 2, dơ̆ 3 … deh mờ dờng tàm lơgar ndai, do là tŭ niam kuơmàng ngan nàng ală oh in git bè kah yau, bơsram dà đơs lơgar tờm dê mờ pơn yờ să bè nggu rơyas he dê. Tàm hìu bal, tơl bơta krơi is bè rài kis, gơnoar broă halà bồ tơngoh kơlôi sơnơng… ndrờm lời wơl ai nùs nhơm làng bol dùl lơgar bal in.

Tàm nùs nhơm king crŭ, mpồl bơtiàn cau Việt Nam tàm càr U-đon Tha-ni (Udon Thani), tiah đah tô mat tơngai lik lơgar Thái Lan, neh yŭ rơyùm bơyai lơh Dơ̆ Duh kah bơtau Hùng. Ồng Lương Xuân Hòa, Củ tịc Mpồl cau Việt Nam càr Udon Thani đơs nền bơta kơp kờñ bơh làng bol Việt Nam tàm lơgar ndai dê: “Nam lơi, bol hi kung bơyai lơh bè do nàng kòn sau in sùm kah là să jan he cèng mhàm Bơtau Hùng dê. Bulah deh mờ dờng tàm ù tiah lơgar Thái Lan, mơya jriang mhàm cau Việt Nam dê kung gam gơ hòr sùm tàm plai nùs, mờ bol hi kung sùm dùl nùs kah bè ƀòn tờm, dà lơgar tờm”.

Lơh niam bơta kuơ Duh kah Bơtau Hùng ờ mìng ơm wơl tàm broă bơyai lơh ală bơhiàn bơyai lơh yŭ rơyùm mờ gam là tŭ tơngai sền gàr, ròng dờng nùs nhơm kờñ gơboh dà lơgar mờ jơnau git wă tam klac bal tàm tơl nă cau Việt Nam. Do là nggu rơyas tờm bơh bơta pràn dê, là bơta niam chài nàng jơi bơtiàn Việt Nam cơnđuà kơ̆ mut gơ rờm bal, mơya ờ gơ tam gơl. Bulah khat tàm tiah lơi, mìng kờñ gam kah bè ngai 10 nhai 3, gam duh khoai Bơtau Hùng den hiòng jơi bơtiàn kung gam gơ hòr sùm, tàm tơrbŏ bal mpồl bơtiàn cau Việt Nam gơ gơs dùl mpồl tơrgùm dùl, kơ̆ kơljap.