Dơ̆ lơh chờ tơrnờm kòn cau M’nông dê kềng gah tơnau dà Lăk geh lơh tàm 2 ngai, ngai 29 mờ ngai 30/8. Dơ̆ lơh chờ bơh sàh Liên Sơn Lăk bơyai lơh, geh 10 broă lơh mờ tơngume "Kañ bơkah brê bơnơm dờng - Huềng cau M’nông kềng gah tơnau dà Lăk”. Pơn rơ ngan là Dơ̆ pơrlòng Bơtau tơrnờm; ràng tơlik broă mòn phan ù buh cau M’nông dê; broă ƀĕ kañ mờ ƀĕ tơrnờm; ală bơta nhơl ñŏ bơh yau; ai rơ was lòt tàm gùng, plung dơm chi mờ ù tiah ràng tơlik, yal tơnggit phan lơh gơs, niam chài ƀòn lơgar.

Ală broă lơh nàng kờñ jờng rơ, prap gàr mờ lơh niam ală bơta kuơ niam chài bơh yau làng bol kòn cau M’nông dê, mờ kung yal tơnggit rùp să, kòn bơnus, niam chài, phan lơh gơs tiơng pơn rơ krơi is mờ bơta pràn lòt nhơl ƀòn lơgar dê. Ồng Nguyễn Anh Tú - Chủ tịch Anih duh broă Làng bol sàh Liên Sơn Lăk pà git, sàh kơp kơnờm dơ̆ lơh chờ rơp pơgồp bơnah ai rùp să ù tiah, kòn bơnus M’nông kềng gah tơnau dà Lăk tus rềp rlau mờ nac lòt nhơl tàm lơgar mờ ală lơgar: “Lơh gơ rề jơnau yal tơnggit bè dơ̆ lơh chờ tus làng bol tàm càr, gùt lơgar mờ ală lơgar in. Bơh hơ̆, pơgồp bơnah yal tơnggit rùp hin sàh Liên Sơn Lăk - ƀòn lơgar gơ ơm tàm rơndap ù tiah bơtàu tơnguh lòt nhơl càr Dăk Lăk mờ dà lơgar dê; mờ kung hòi jà mpồl lơh sa kă bro sền gròi, lòt bal bơcri priă, pơgồp bơnah chồl tơnguh lòt nhơl ƀòn lơgar dê bơtàu tơnguh”.

Ai tàm tiah tờm sàh Ea Knuếc, sap cing mồng, sap đơs nŏ chờ hờp tàm ală anih ràng tac sầu riêng, phan OCOP mờ ală broă lơh niam chài, đơs crih tamya, phan sa. Ngai chờ neh ai phan bơkah tiơng pơn rơ tus rềp rlau mờ nac lòt nhơl, pờ gơs ù tiah nàng mpồl bơtiàn in yal jơnau bè tiah tam, bè broă lơh sa mờ niam chài he dê.

Bơta tờm broă lơh dê là bơhiàn rò “Ùr bơtau sầu riêng” bơh tờm chi jŏ nam rê hờ tiah lơh chờ. Tàm sap cing mồng, ală ùr ơruh àñ sơ̆ bal mờ 2 nơm rơ was lơh gơs mpồl rò cèng bơta niam chài krơi is Tây Nguyên dê. Bơhiàn hòi dan hờm ram, wil tơl bơh làng bol kòn cau Rơđê dê kung geh lơh wơl, pơyua bơta kơp kờñ kàl lơh sa ƀuơn ƀuài, sầu riêng tơnhàu geh uă, tac geh giă, ƀòn lơgar hờm ram. Ồng Y Feel Knul - ơm tàm ƀòn Tara, sàh Ea Knuếc pà git, dơ̆ lơh chờ cèng tus bơta chờ hờp mờ kơp kơnờm ai cau tam sầu riêng in: “Do kung là dơ̆ nàng yal tơnggit niam chài ală jơi bơtiàn tiah do tus gơp bơyô mờ nac lòt nhơl. Là dùl nă cau lơh broă sa tam sầu riêng, añ kơp kờñ phan lơh gơs bơh suơn sre ngai sơlơ geh giă tac kơ̆ kơljap rlau nàng làng bol in ờ huan bòl glar”.

Tàm ală broă lơh “Ea Knuếc mut tàm kàl lơh sa” gam geh drà kă bro phan, ràng tơlik phan OCOP, phan lơh gơs bơh suơn sre, phan sa, lòt sền suơn mờ livestream yal tơnggit sầu riêng tàm ală măi mok sồ. Bơh hơ̆, nùs nhơm Dơ̆ lơh chờ sầu riêng Dăk Lăk geh gơ rề tus tiah tam, lam nac lòt nhơl mờ drà kă bro tus rềp rlau mờ cau tam.

Tàm dơ̆ sơn đờm mut lơh, sàh Ea Knuếc kung neh yal mat sơnđan phan kă bro mpồl bal “Sầu riêng Ea Knuếc”. Mò Trần Thị Vân - Phó Chủ tịch Anih duh broă Làng bol sàh pà git, do là bơta pơn yờ să ƀòn lơgar dê, mờ kung lơh gơlik bơnàng jă đơs nền mat kă bro, tơnguh priă lơh geh phan bơna, rề ơnàng drà kă bro mờ wèt tus bơtàu tơnguh kơ̆ kơljap jŏ jòng sùm:

“Tơnơ̆ dơ̆ lơh chờ do, ƀòn lơgar rơp pơn jat tai lơh pràn tam gơl sồ, yal tơnggit phan sầu riêng tàm ală anih tac phan điện tử. Bơh do, mat kă bro phan sàh dê geh đơs nền mờ làng bol lơh broă sa chờ hờp lơh sa gàr bơta niam, rề ơnàng sầu riêng dùl bă kơ̆ kơljap jŏ jòng sùm”.

Sàh Ea Knuếc tŭ do là dùl tàm ală tiah tam sầu riêng uă ngan rlau jơh càr Dăk Lăk mờ mờr 6 rbô lồ; tàm hơ̆ rlau 2 rbô 800 lồ gam pik tơnhàu, khà lơh geh rlau 70 rbô tấn, kờp jơh priă lơh geh mờr 4 rbô tơmàn đong. Git nền, sầu riêng là chi tam tờm ngan, ƀòn lơgar tơrgùm bơt bơtàu màh sồ tiah tam, anih dăp ơn klơm, jòi git anih lơh gơlik, bơtàu tơnguh mpồl lơh broă bal mờ lơh bal lơh gơlik, tac phan.